ކާބުލް، އަފްގާނިސްތާން (ނޮވެމްބަރު 28) - ތާލިބާން ސަރުކާރުން އެހެން ގައުމުތަކުގެ ކަންކަމަށް ނުފޫޒު ފޯރުވަން ނޫޅޭ ކަމަށާއި ބޭރުގެ ޖަމިއްޔާތަކުން އެހީދިނުމަށް އެދޭ ކަމަށް ބޮޑު ވަޒީރު މުއްލާ މުހައްމަދު ހަސަން އަހުންދް ބުނެފި އެވެ.
ތާލިބާނުންގެ ފައުންޑަރު އަދި މިހާރު ބޮޑު ވަޒީރުގެ މަގާމުގައި ހުރި ހަސަންގެ އޯޑިއޯ ހިތާބު ދައުލަތުގެ ޓީވީން އިއްވި އިރު، މިއީ މިދިޔަ އޯގަސްޓް މަހު ވެރިކަމަށް އައި ފަހުން އޭނާ ގައުމާ މުހާތަބުކޮށް ވާހަކަދެއްކި ފުރަތަމަ ފަހަރެވެ. ހިތާބު ދީފައި މި ވަނީ އަންނަ ހަފުތާގައި އެމެރިކާއާ އެކު މަޝްވަރާ ފަށަން ތައްޔާރުވަނިކޮށެވެ.
"ހުރިހާ ގައުމުތަކަށް ވެސް ޔަގީންކަން ދެން އެ ގައުމުތަކުގެ ދާހިލީ ކަންކަމަށް ނުފޫޒު ފޯރުވަން މަސައްކަތެއް ނުކުރާނަން. ބޭނުން ވަނީ ހުރިހާ ގައުމަކާ އެކު ވެސް ރަނގަޅު އިގްތިސާދީ ގުޅުމެއް ބާއްވަން،" 30 މިނެޓުގެ އޯޑިއޯގައި ހަސަން ބުންޏެވެ.
"އަޅުގަނޑުމެން މި ދަނީ އަޅުގަނޑުމެންގެ އަމިއްލަ މައްސަލަތަކުގައި ގެނބެމުން. މި މަސައްކަތް ކުރަނީ މާތް ﷲ ގެ ވާގިފުޅާއެކު ރައްޔިތުން މިކަމުން ސަލާމަތް ކުރެވޭނެ ގޮތްތައް ހޯދައިދެވޭތޯ."
އޯގަސްޓް 15 ވަނަ ދުވަހު ތާލިބާނުން ވެރިކަމަށް އައި އެމެރިކާގެ ތާއީދާއެކު އޮތް ސަރުކާރު ވައްޓާލުމަށް ފަހު 20 އަހަރުގެ ދިގު ހަނގުރާމައެއް ނިމުމަކަށް ގެންނަމުންނެވެ. ތާލިބާނުން ބާރު ހޯދި ދަނޑިވަޅުގައި އެމެރިކާ ސިފައިން އަފްގާން ފަސްގަނޑުން ފޭބި އެވެ.
އަފްގާނިސްތާނުގައި ކުރިން އޮތް ތާލިބާން ސަރުކާރު ވެއްޓުނީ މީގެ ވިހި އަހަރު ކުރިން އެމެރިކާ ސިފައިން އަފްގާނިސްތާނަށް އެރުމުންނެވެ. އެއީ އަލް ގައިދާ އިން ސެޕްޓެމްބަރު 11، 2001 ގައި ދިން ހަމަލާތަކާ ގުޅިގެން އެޅި ފިޔަވަޅެއް ކަމަށް އެމެރިކާ އިން ބުނެ އެވެ.
އެމެރިކާ އިން ތުހުމަތު ކުރީ އަލް ގައިދާ ޓެރަރިސްޓުންނަށް މިނިވަންކަމާ އެކު އުޅުމުގެ ފުރުސަތުގެ ތާލިބާން ސަރުކާރުން ދިން ކަމަށެވެ. މިހާރު އަފްގާނިސްތާނުގެ ބޮޑު ވަޒީރު ހަސަން އަކީ ތާލިބާނުންގެ ފުރަތަމަ ރޫހާނީ ލީޑަރު މުއްލާ އުމަރުގެ ގާތް މީހެކެވެ.
މިހާރު 60 ގެ އަހަރުތައް ގުނަމުންދާ ހަސަން ވަނީ 1996 އިން 2001 އަށް ތާލިބާނުން ވެރިކަން ކުރިއިރު ފޮރިން މިނިސްޓަރުކަމާއި ޑެޕިއުޓީ ބޮޑު ވަޒީރުކަން ކޮށްފަ އެވެ. ތާލިބާނުންގެ ހަރަކާތްތަކާ ގުޅިގެން އދ. ގެ ސަލާމަތީ މަޖިލީހުން ދަތިކުރުމުގެ ފިޔަވަޅު އަޅާފައިވާ މީހުންގެ ލިސްޓުގައި އޭނާ ހިމެނެ އެވެ.
