ވޮޝިންޓަން، އެމެރިކާ (ނޮވެމްބަރު 28) - ރަޝިއާ އާއި ޗައިނާގެ ސަފީރު ގުޅިގެން ލިޔުއްވި "އޮޕީނިއަން" އެއްގައި އެމެރިކާ އިން ވާޗުއަލް ޑިމޮކްރަސީ ސަމިޓު ބާއްވަން އުޅޭތީ ވަރަށް ބޮޑަށް ފާޑުވިދާޅުވެއްޖެ އެވެ.
ރަޝިއާގެ އެނެޓޮލީ އެންޓޮނޮވް އާއި ޗައިނާގެ ގިން ގޭންގް ވިދާޅުވީ ޑިމޮކްރަސީ ސަމިޓަކީ އެމެރިކާގެ "ފިނި ހަނގުރާމަ ވިސްނުމުގެ އުފެއްދުމެއް" ކަމަށެވެ. ޑިސެމްބަރު 9-10 އަށް ބާއްވަ ސަމިޓުގެ ސަބަބުން ދުނިޔެ ބައިބައިވެ، ފިކުރީ ކުރިމަތިލުންތައް އިތުރުވާނެ ކަމަށް ދެ ސަފީރުން ވިދާޅުވި އެވެ.
ޑިމޮކްރަސީ ސަމިޓަކީ ރައީސް ޖޯ ބައިޑެންގެ ރިޔާސީ ވައުދެކެވެ. ބައިޑެންގެ ހާރިޖީ ސިޔާސަތުގައި އިސްކަން ދެއްވާފައިވާ އެއް ކަމަކީ ހުދުމުހުތާރު ވެރިކަންތަކާ ދެކޮޅުވެ، ޑިމޮކްރަސީ ކުރިއެރުވުމެވެ.
ސަމިޓަށް ދައުވަތު ލިބޭ 110 ގައުމުގެ ލިސްޓުގެ މިދިޔަ އަންގާރަ ދުވަހު އާއްމުކުރި އިރު، ރަޝިއާ އާއި ޗައިނާ ހިމަނާފައެއް ނުވެ އެވެ. އެހެންވެ، ދެ ގައުމުން ވެސް ނުރުހުން ފާޅުކުރި އެވެ.
ވަކިން ހާއްސަކޮށް ޗައިނާ އިން ނުރުހުނީ، ޓައިވާނަށް ދައުވަތު ދިނުމުންނެވެ. ޓައިވާނަކީ މިނިވަން ދައުލަތެއް ކަމަށް ޓައިވާން ސަރުކާރުން ބުނި ނަމަވެސް، ޗައިނާ އިން ދެކޭ ގޮތުގައި އެއީ ޗައިނާގެ ބަޔެކެވެ.
ނޭޝަނަލް ޖާނަލްގައި ޝާއިއުކުރި ލިޔުމުގައި ޗައިނާ އާއި ރަޝިއާގެ ސަފީރު ވިދާޅުވީ "ތަފާތު އެކި ގޮތްގޮތުން ޑިމޮކްރަސީ އަށް ވާސިލްވެވިދާނެ ކަމަށާއި އެއް މޮޑެލްއަކުން ހުރިހާ ގައުމަކަށް ނުފުދޭނެ" ކަމަށެވެ.
"މުޅި ދުނިޔޭގެ ސިޔާސީ މަންޒަރާ މެދު ގޮތް ނިންމުމުގެ ހައްގު އެއްވެސް ގައުމަކަށް ލިބިގެނެއް ނުވޭ،" ލިޔުމުގައި ވެ އެވެ.
އޭގެ އިތުރުން ޑިމޮކްރަސީ ފެތުރުމުގެ ނަމުގައި ހިންގާ ހަނގުރާމަތަކާއި ހަމަނުޖެހުންތަކުގެ ސަބަބުން "ސަރަހައްދީ އަދި ބައިނަލްއަގްވާމީ ސުލްހަ އާއި ހަމަޖެހުމާއި ކުރިއެރުމެއް ހުރަސް އެޅޭ" ކަމަށް ފާހަގަކޮށްފައި ވެ އެވެ.
"ޔުގޮސްލޭވިއާ އަށް ބޮން އެޅުމާއި، އިރާގާއި އަފްގާނިސްތާން އަދި ލީބިޔާ އަށް ސިފައިން ފޮނުވުމާއި، ޑިމޮކްރެޓިކް އިންގިލާބުގެ ނަމުގައި ހިންގާ ކަންކަމުން ލިބެނީ ހަމައެކަނި ގެއްލުން،" ދެ ސަފީރުން ލިޔުއްވި އެވެ.
"ގައުމުތަކުން ވިސްނަންވީ އެ ގައުމެއްގެ އަމިއްލަ ކަންކަން ރަނގަޅަށް ހިންގަން، އެހެން ގައުމުތަކުގެ ކަންކަމަށް ބާރު ފޯރުވައި ފާޑުކިޔާކަށް ނޫން."
ސަމިޓު ފޯ ޑިމޮކްރަސީގެ ފުރަތަމަ ބައްދަލުވުން އަންނަ މަހު ވާޗުއަލްކޮށް ބޭއްވުމަށް ފަހު ދެ ވަނަ ބައްދަލުވުން އޮންނާނީ އަންނަ އަހަރު ހުރިހާ ލީޑަރުން އެއްތަންވެގެންނެވެ.
