އިންޑިއާގެ އެހީގައި މާލެއާ ތިލަފުއްޓާ ދެމެދުގައި އަޅާ ބްރިޖުގެ މަޝްރޫއަށް އެ ގައުމުން 15 މިލިއަން ޑޮލަރު ދީފި އެވެ.
ބްރިޖު މަޝްރޫއަށް އިންޑިއާއިން ފައިސާ ފޯރުކޮށްްދީފައިވާކަން "އަދަދު" އަށް ވަނީ ކަށަވަރު ވެފަ އެވެ. އަދި އެ ފައިސާ ދެ ދުވަހެއްގެ ތެރޭ ރާއްޖެ ސަރުކާރަށް ލިބޭނެކަމަށް ވެސް ވަނީ މައުލޫމާތު ލިބިފަ އެވެ.
އެ ފައިސާއަކީ ބްރިޖުގެ މަޝްރޫއަށް އިންޑިއާ ސަރުކާރުން ފޯރުކޮށްދޭ 100 މިލިއަން ޑޮލަރުގެ ހިލޭ އެހީގެ އެޑްވާންސް ފައިސާކަން ވެސް މި ނޫހަށް ވަނީ މައުލޫމާތު ލިބިފަ އެވެ. އެގޮތުން އެ ފައިސާ އަކީ ހިލޭ އެހީގެ 100 މިލިއަން ޑޮލަރުގެ 15 ޕަސަންޓު އެޑްވާންސް ފައިސާ އެވެ.
ގާތްގަނޑަކަށް 7.7 ބިލިއަން ރުފިޔާ ހޭދަވާނެ ކަމަށް ބެލެވޭ މި މަޝްރޫއަކީ މިހާތަނަށް ރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއެވެ. މި ޕްރޮޖެކްޓަށް ހަރަދުކުރަނީ އިންޑިއާ ސަރުކާރުން ދިން 100 މިލިއަން ޑޮލަރުގެ ހިލޭ އެހީ އާއި އިންޑިއާ އެގްޒިމް ބޭންކުން ހަމަޖެހިފައިވާ 400 މިލިއަން ޑޮލަރުގެ ލޯނުންނެވެ.
ބްރިޖުގެ އަމަލީ މަސައްކަތް އަދި ނުފަށަ އެވެ. އެ މަސައްކަތްކުރަން ހަވާލުކޮށްފައިވަނީ އިންޑިއާގެ އެފްކޮންސް ކުންފުންޏާ އެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ބްރިޖުގެ މަޝްރޫއު މި ދައުރު ނިމެންވާއިރަށް ނުނިމިދާނެ ކަމަށް ވިދާޅުވެފަ އެވެ.
އެ މަޝްރޫއުގެ މަސައްކަތް ކުރިޔަށްދާނީ ދެ ބަޔަކަށް ބަހާލައިގެންނެވެ. މިގޮތުން ފުރަތަމަ ބައިގައި ހިމެނެނީ މާލެއިން ގުޅީފަޅަށް ގުޅާލުމެވެ. މި މަސައްކަތް 27 މަސް ދުވަހުގެ ތެރޭގައި ނިންމާލެވޭނެ ކަމަށް ލަފާކުރެވެ އެވެ. ދެވަނަ ބައިގައި ހިމެނެނީ ތިލަފުށިން ގުޅިފަޅަށް ގުޅާލުމެވެ. މި މަސައްކަތް ނިންމަން 32 މަސް ހޭދަވާނެ އެވެ. އެކަމަކު މި ދެބައިގެ މަސައްކަތް ފަށާނީ އެއް ފަހަރާ އެވެ.
މާލެ-ތިލަފުށި ލިންކް ދަށުން މާލެ އާއި، ވިލިމާލެ އާއި، ގުޅިފަޅާއި، ތިލަފުށި ގުޅާލާނެ އެވެ. އަދި މި ލިންކު ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމު ކުރެވޭނެ އެވެ.
އެ މަސައްކަތް ހަވާލުކުރި އިންޑިއާގެ އެފްކޮންސް ކުންފުންޏަކީ މިފަދަ މަސައްކަތް ކުރުމުގެ ގާބިލުކަން ލިބިފައިވާ ތަޖުރިބާކާރު ކުންފުންޏެކެވެ. އެގޮތުން އިންޑިއާ އަދި އެފްރިކާ ބައްރުގައި ބޮޑެތި މަޝްރޫއުތަކެއް މި ކުންފުނިން ވަނީ ކާމިޔާބުކޮށްފަ އެވެ.
