އިސްތަންބޫލް، ތުރުކީ (ނޮވެމްބަރު 23) - ތުރުކީ އިން އުޅެނީ "އިގްތިސާދީ މިނިވަންކަމުގެ ހަނގުރާމައެއްގައި" ކަމަށް ރައީސް ތައްޔިބް އުރުދުގާން ވިދާޅުވުމާ އެކު ތުރުކީ ލީރާގެ އަގު ރިކޯޑް މިންވަރަށް ވެއްޓިއްޖެ އެވެ.
އެގޮތުން 15 ޕަސެންޓުގެ ވެއްޓުމަކާ އެކު ޑޮލަރަކަށް 13 ލީރާ ޖެހުމަށް ފަހު މިހާރު ވަނީ ކުޑަ ތަންކޮޅެއް އަގު އުފުލިފަ އެވެ. ތުރުކީ ފައިސާގެ އަގަށް ދިމާވެގެން އުޅެނީ އޯގަސްޓު 2018 ވަނަ އަހަރަށް ފަހު އެންމެ ނުރައްކާތެރި ހާލަތެވެ.
ދެހާސް އަށާރަ ވަނަ އަހަރު ތުރުކީ ލީރާގެ އަގު ވަރަށް ބޮޑު ތަނުން ވެއްޓުނީ އޭރު ހުންނެވި އެމެރިކާގެ ރައީސް ޑޮނަލްޑް ޓްރަމްޕްއާ މެދު އުފެދުނު ދެބަސްވުމެއްގަ އެވެ.
އިންފްލޭޝަން މަތިވެ، ފައިސާގެ އަގު ވެއްޓެމުން ދިޔަ ނަމަވެސް އުރުދުގާންގެ އެންގެވުމުގެ މަތިން ތުރުކީގެ ސެންޓްރަލް ބޭންކުން މިދިޔަ ބުރާސްފަތު ދުވަހު ވަނީ ޕޮލިސީ ރޭޓް 16 ޕަސެންޓުން 15 ޕަސެންޓަށް ކުޑަކޮށްފަ އެވެ.
އުރުދުގާން އަކީ އިންޓްރެސްޓު ނެގުމާ ދެކޮޅަށް އަބަދުވެސް ވަކާލާތު ކުރައްވާ ލީޑަރެކެވެ. އެމަނިކުފާނު މަގްބޫލުކަން ހޯއްދެވީ އިގްތިސާދީ ކުރިއެރުން ގެނެސް، އާއިލާތަކުގެ އާމްދަނީ އިތުރު ކުރައްވާ ލީޑަރެއްގެ ގޮތުގަ އެވެ.
އުރުދުގާން ދެކިވަޑައިގަންނަވާ ގޮތުގައި އިންޓްރެސްޓް ރޭޓު މަތިވުމުން އިންފްލޭޝަން ކުޑަވުމުގެ ބަދަލުގައި ތަކެތީގެ އަގު ދާނީ އުފުލެމުންނެވެ. އެހެންކަމުން މިހާރު ގެނެސްފައިވާ ބަދަލުތައް ދިފާއުކުރައްވާ ހޯމަ ދުވަހު ވެސް ވާހަކަދެއްކެވި އެވެ.
"ފައިސާ އާއި އިންޓްރެޓް އާއި ތަކެތީ އަގު އުފުލުމުގައި ކުޅެމުންދާ ގޭމް އެބަ ފެނޭ. އަޅުގަނޑުމެން ކުރިއަށް ދާނީ އަޅުގަނޑުމެންގެ އަމިއްލަ ގޭމް ޕްލޭނާ އެކު،" ކެބިނެޓް ބައްދަލުވުމެއްގައި އުރުދުގާން ވިދާޅުވި އެވެ.
"މި އިގްތިސާދީ މިނިވަންކަން ހޯދުމުގެ ހަނގުރާމައިން އަޅުގަނޑުމެން ނަސްރު ހޯދާނީ މާތް ﷲ އާއި ރައްޔިތުންގެ އެހީގައި."
