މޯލްޑިވްސް އިސްލާމިކް ބޭންކުގެ ހިދުމަތްތައް ފުޅާކޮށް، ފަސޭހަ ކުރަމުން އަންނައިރު، އެ ބޭންކުގެ ބާޒާރު ސާވިސް ސެންޓަރު، އީބޭންކުގެ ހިދުމަތަށް ހާއްސަކޮށް، ހިދުމަތް ދޭ ވަގުތަށް ބަދަލު ގެނެސްފި އެވެ.
އިސްލާމިކް ބޭންކިން ހިދުމަތް ރާއްޖެ އަށް ތައާރަފުކޮށް އެ ދާއިރާގައި އެންމެ ވަރުގަދަ ބޭންކު، އެމްއައިބީގެ އޮފިޝަލަކު "އަދަދު" އަށް ވިދާޅުވީ އޯކިޑް މަގު، ފާމުދޭރިގޭގައި ހުންނަ "އެމްއައިބީގެ ބާޒާރު ސާވިސް ސެންޓަރު"ން ކުރިން ހިދުމަތް ދެމުން ދިޔައީ ހެނދުނު 8:00 އިން ހަވީރު 4:00 ކަމަށެވެ.
މިހާރު ހިދުމަތް ދޭ ވަގުތު ހެނދުނު 10:00 އިން ހަވީރު 6:00 އަށް ވަނީ ބަދަލުކޮށްފައި ކަމަށް އޭނާ ވިދާޅުވި އެވެ.
"މިގޮތަށް ވަގުތު ހަމަޖެއްސީ ގިނަ ބަޔަކަށް ފަސޭހަކުރުމަށްޓަކައި. އާންމުކޮށް ރަސްމީ އޮފީސް ނިންމުމަށް ފަހު ވެސް ހިދުމަތްތައް ހޯދުމަށާއި، ހިދުމަތްތައް ފޯރުކޮށް ދިނުމަށް ފަސޭހަކުރުމަށް،" އޮފިޝަލް ވިދާޅުވި އެވެ.
ބާޒާރު ސާވިސް ސެންޓަރުން ލިބޭނެ ހިދުމަތްތައް
- އިންޓަނެޓް ބޭންކިން އަށް އެދި ހުށަހެޅުން
- ވިސާ ކާޑު ނެގުން
- ވިސާ ކާޑަށް އެދި ހުށަހެޅުން
މި ސެންޓަރުގެ ހިދުމަތަށް އޮންލައިންކޮށް ނަންބަރު ނެގޭނެ އެވެ. އަދި ޒިޔާރަތްކޮށްގެން ވެސް ހިދުމަތް ހޯދޭނެ އެވެ.
މި ބަދަލާއެކު، އެމްއައިބީގެ މައި ގޮތްޕަށް މިހާރު އޮތް ބާރު ކުޑަވެ، ކަސްޓަމަރުންނަށް ފަސޭހަ މާހައުލެއް ގާއިމުވާނެ އެވެ. އަދި އަމިއްލަ އޮފީސްތަކުގައި އުޅޭ ފަރާތްތަކަށް ވެސް ހިދުމަތް ހޯދަން ފަސޭހަ ވާނެ ކަމަށް ބޭންކުގެ އޮފިޝަލް ވިދާޅުވި އެވެ.
