ގުދުސް (ނޮވެމްބަރު 18) - އިޒްރޭލުގެ ޑިފެންސް މިނިސްޓަރު ބެނީ ގާންޓްޒްގެ ގެކޮޅުގައި ވަޒީފާ އަދާ ކުރާ މަސައްކަތު މީހަކު އިރާނާ ގުޅުން އޮންނަ "ބްލެކް ޝެޑޯ" ހެކަރުންނަށް ޖާސޫސްކޮށް ދިން ކަމުގެ ތުހުމަތުކޮށްފި އެވެ.
އިޒްރޭލުގެ ޖަސްޓިސް މިނިސްޓްރީން އާއްމުކުރި ލިޔުންތަކުގައިވާ ގޮތުން އުމުރުން 37 އަހަރުގެ އޮމްރީ ގޮރެން ގޮރޮޗޮވްސްކީ ހައްޔަރު ކުރީ ނޮވެމްބަރު ހަތަރު ވަނަ ދުވަހު އެވެ. އޭނާ އަކީ އިޒްރޭލުގެ ލޯދް ސިޓީގައި ދިރިއުޅޭ މީހެކެވެ.
ގޮރޮޗޮވްސްކީ އާއި އޭނާގެ އަންހެނުންނަކީ ތެލް އަވީވް ކައިރީގައި ހުންނަ ގާންޓްޒްގެ ގެކޮޅުގައި މަސައްކަތު މީހުންގެ ވަޒީފާ އަދާކުރަމުން ދިޔަ ދެ މީހުންނެވެ. ގާންޓްޒްގެ ގެއިން ސިއްރު މައުލޫމާތު ފޯރުކޮށްދޭނެ ކަމަށް ބުނެ ގޮރޮޗޮވްސްކީ ޓެލެގްރާމް މެދުވެރިކޮށް ބްލެކް ޝެޑޯއާ މުއާމަލާތު ކުރީ އޮކްޓޯބަރު 31 ވަނަ ދުވަހު އެވެ.
މިދިޔަ މަހު އިޒްރޭލުގެ އިންޓަނެޓް ހިދުމަތްދޭ ކުންފުންޏަކަށް ދިން ސައިބާ ހަމަލާގެ ފަހަތުގައި ވަނީ ބްލެކް ޝެޑޯ ގްރޫޕެވެ.
ފައިސާ ފޯރުކޮށްދޭ ނަމަ މިނިސްޓަރުގެ ގެކޮޅާ ގުޅޭ މައުލޫމާތު ދޭނެ ކަމަށް ބުނެ ގޮރޮޗޮވްސްކީ ވަނީ އޭނާއަކީ އެ ގޭގައި މަސައްކަތް ކުރާ މީހެއް ކަން ސާބިތުކޮށްދިނުމަށް ބްލެކް ޝެޑޯ ގްރޫޕަށް ޓެލެގްރާމް މެދުވެރިކޮށް ގޭގެ ބައެއް ފޮޓޯ ފޮނުވާފައި ކަމަށް އިޒްރޭލުން ބުންޏެވެ.
އިޒްރޭލުގެ ސަލާމަތާ ބެހޭ ޝިން ބޭތް އެޖެންސީން ބުނީ "ސިއްރު މައުލޫމާތު ހިމެނޭ އެއްވެސް އެއްޗަކާ ގުޅޭ ވާހަކަަތައް" އެ ގޭގެ ތެރެއިން ގޮރޮޗޮވްސްކީ އަށް ލިބިފައި ނުވާ ކަމަށެވެ.
