ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ އިރާނަށް ކުރެއްވި ދަތުރަކާއެކު ދެ ގައުމުގެ ގުޅުން ބަދަހި ކުރުމުގެ މަސައްކަތް ފަށައިފި އެވެ.
ތުރުކީ އާއި އިރާނަކީ އަބަދުވެސް އިގްތިސާދީ ގާތް ގުޅުމެއް އޮންނަ ދެ ގައުމެވެ. ނަމަވެސް މެދުއިރުމަތީގެ ގިނަ މައްސަލަތަކުގައި ދެބަސްވެ އެވެ.
ތުރުކީގެ ފޮރިން މިނިސްޓަރު އިރާނަށް ވަޑައިގެން ވަނީ ރައީސް އިބްރާހިމް ރައިސީއާ ބައްދަލުކުރައްވައި އަދި ފޮރިން މިނިސްޓަރު ހުސެން އާމިރްއާ އެކު މަޝްވަރާ ކުރައްވާފަ އެވެ.
"ދެ ފަރާތުން ވެސް ތިބީ މިހާރު އޮތް ގުޅުން އިތުރު ހަރުފަތްތަކަށް ގެންދިޔުމަށް ތައްޔާރަށް އެ ވިސްނުމުގައި،" އިރާނުގެ ރައީސް އޮފީހުން ބުންޏެވެ.
ޓްވިޓާ މެދުވެރިކޮށް ކަވުސޮގްލޫ ވިދާޅުވީ ދެ ގައުމުން މަޝްވަރާ ކުރީ ގުޅުން ބަދަހި ކުރުމުގެ އިތުރުން ވިޔަފާރި އާއި އިންވެސްޓްމަންޓު އަދި ޓެރަރިޒަމާއި ސަރަހައްދީ ހަމަނުޖެހުމާ ގުޅޭ ގޮތުން ކަމަށެވެ.
އިރާނުގެ ފޮރިން މިނިސްޓަރު ބޭއްވި ޕްރެސް ކޮންފެރެންސެއްގައު ވިދާޅުވީ މެދުއިރުމަތީގެ އިތުރުން އަފްގާނިސްތާނާއި ހުޅަނގު އޭޝިއާގެ ސަލާމަތާ ބެހޭ މަޝްވަރާތައް ވެސް ކުރެއްވި ކަމަށެވެ.
ތުރުކީ އިން ދަނީ އެ ގައުމާއި އިރާނާ ގުޅޭ އިރުމަތީ ބޯޑަރު ސަރަހައްދުގައި އުސް ފާރެއް ރާނަމުންނެވެ. އޭގެ ބޭނުމަކީ ގަވާއިދާ ހިލާފަށް ތުރުކީ މެދުވެރިކޮށް ޔޫރަޕަށް ވަންނަން އުޅޭ އަފްގާން ރައްޔިތުން ހުއްޓުވުމެވެ.
އިރާނަށް ވަޑައިގެންނެވުމަށް ފަހު ކަވުސޮގްލޫ ވަނީ ލުބްނާނަށް ވެސް ވަޑައިގެންފަ އެވެ. އިރާނަކީ ޝިއައީ މެޖޯރިޓީ ގައުމަކަށް ވާއިރު، ލުބްނާންގައި ވެސް ޝިއައީންގެ ބާރު ދަނީ ގަދަވަމުންނެވެ.
