ޖެއިޕޫރް (ނޮވެމްބަރު 18) - ރޯހިތު ޝަރްމާގެ ކެޕްޓަންކަމުގެ ދަށުގައި އިންޑިއާ ކުޅުނު ޓީ20ގެ ފުރަތަމަ މެޗުގައި ރޭ ނިއު ޒިލޭންޑް އަތުން ފަސް ވިކެޓުން އިންޑިއާ މޮޅުވެއްޖެ އެވެ.
އިންޑިއާގައި ރޭ ފެށި ސިލްސިލާގެ ފުރަތަމަ މެޗުގައި ކުޅެންއަރައި، 20 އޯވަރުގެ ތެރޭގައި ހަ ވިކެޓަށް 164 ލަނޑު ނިއު ޒިލޭންޑުން ހެދި އެވެ. އައިސީސީ ވޯލްޑް ކަޕްގެ ފައިނަލްގައި މީގެ ތިން ދުވަސް ކުރިން އޮސްޓްރޭލިއާ އަތުން ބަލިވި ނިއު ޒިލޭންޑްގެ ޓީމުން ރޭގެ މެޗުގައި އެންމެ ރަނގަޅަށް ބެޓްކުރީ 70 ލަނޑު ހެދި މާޓިން ގުޕްޓިލާއި 63 ލަނޑު ހެދި މާކް ޗެޕްމަން އެވެ. މި މެޗުގައި ނިއު ޒިލޭންޑްގެ ކެޕްޓަން ކޭން ވިލިއަމްސަން ނުކުޅެ އެވެ.
ޖަވާބުގައި އިންޑިއާ އިން ކުޅެންއަރައި، 19.4 އޯވަރުގެ ތެރޭގައި ފަސް ވިކެޓަށް 166 ލަނޑު ހެދި އެވެ. އެންމެ ރަނގަޅަށް ކުޅުނީ ސުރްޔަކުމާރު ޔާދަވް (62) އަދި ކެޕްޓަން ރޯހިތު (48) އެވެ.
އިންޑިއާގެ ޓީ20 ޓީމުގެ ކެޕްޓަންކަން ރޯހިތަށް ދިނީ ދާދި ފަހުން ނިމުނު ޓީ20 ވޯލްޑް ކަޕްގައި އިންޑިއާ އަށް ކުރިމަތިވި ނާކާމިޔާބަށް ފަހު އެވެ. ފޭވަރިޓެއްގެ ގޮތުގައި މުބާރާތަށް ނިކުތް އިންޑިއާ މުބާރާތުގެ ގުރޫޕް ސްޓޭޖުން ވަނީ ކަޓައިފަ އެވެ. އެކަމަކު ކުރީގެ ކެޕްޓަން ވިރާތު ކޯލީ ވަނީ ކެޕްޓަންކަން ދޫކޮށްލާނެކަން ވޯލްޑް ކަޕް ފެށުމުގެ ކުރިން އިއުލާންކޮށްފަ އެވެ.
މެޗަށް ފަހު، ރޯހިތު ބުނީ މި މެޗުން މޮޅުވުމުން ވަރަށް ހިތްހަމަޖެހޭ ކަމަށެވެ.
"މެޗުގެ ފަހުކޮޅަށް ދިޔައިރު ތަންކޮޅެއް އުނދަގޫވި. އެއީ މިއަދު މި ކުޅުނު ބައެއް ކުޅުންތެރިންނަކީ މި ފަދަ ހާލަތެއްގައި ކުޅުމުގެ ތަޖުރިބާ ނެތް ކުޅުންތެރިން،" ރޯހިތު ބުންޏެވެ.
ރޯހިތު ބުނީ ދިގު ސީޒަނަކަށް ފަހު، އިންޑިއާގެ ކުޅުންތެރިން "ރެސްޓެއް" ލިބެންޖެހޭ ކަމަށެވެ. އަދި ކުޅުންތެރިންނަކީ "މެޝިންތަކެއް ނޫން" ކަމަށާއި ކުޅުންތެރިންގެ އަސްލު ފެންވަރު ދެއްކޭނީ ރެސްޓްކުރާނެ ވަގުތު ދީގެން ކަމަށެވެ.
މިއީ އިންޑިއާ އަށް ނިއު ޒިލޭންޑުން ކުރާ ޓުއާގައި ކުޅެން ހަމަޖެހިފައިވާ ޓީ20ގެ ތިން މެޗުގެ ތެރެއިން ކުޅުނު ފުރަތަަމަ މެޗުގައި މެޗެވެ. -- ބީބީސީ
