އަނިޔާވެރިކޮށް މަރާލާފައި އޮއްވާ އދ. ދަނގެތިން ފެނުނު އެ ރަށު މޮނަލާޒް މަހުމޫދު އަބޫބަކުރުގެ މަރާލުމުގެ ތުހުމަތުކުރެވޭ ބަންގްލަދޭޝްގެ ޝާ އަލޮމް މިއާ (ސާލިމް) ޝަރީއަތް ނިމެންދެން ބަންދުކޮށްފި ކަމަށް ފުލުހުން މިއަދު ބުނެފި އެވެ.
މިދިޔަ އޮކްޓޫބަރު މަހުގެ ތެރޭގައި ހިނގި މި ހާދިސާގައި، 57 އަހަރުގެ ވިޔަފާރިވެރިޔާ މަހުމޫދު ގެއްލިގެން ހޯދަނިކޮށް އޭނާ ފެނުނީ އަތް ފައި ބަނދެ، ބޮލާއި ފައި ގޯންޏަކަށްލައި، ވަޅަލަކަށް އެއްލާލާފައި އޮއްވަ އެވެ. މަހުމޫދު ފެނުނުއިރު އޭނާގެ ހަށިގަނޑުގެ އެކި ތަންތަނަށް ތޫނު އެއްޗަކުން ހަމަލާދީފައިވާ ކަމުގެ ނިޝާނުތައް ފެންނަން ހުއްޓެވެ.
މި މައްސަލައިގައި ފުރަތަމަ އެ ރަށުގައި ދިރިއުޅުނު ތޮއްޑޫ ދެ ޒުވާނަކަށް ތުހުމަތު ކުރި ނަމަވެސް، ފުލުހުން މި މައްސަލައިގެ ތުހުމަތު ކުރަނީ ސާލިމަށް އެކަންޏެވެ. މީގެ ކުރިން ފުލުހުން ބުނި ގޮތުގައި ސާލިމްގެ އިތުރުން މި މައްސަލައިގައި އިތުރު މީހެއްގެ މައްޗަށް ތުހުމަތު ނުކުރެ އެވެ.
ސާލިމްއަކީ އެ ރަށުގައި އުމުރުން ދުވަސްވީ މީހަކު ބަލަން ހުންނަ ބަންގްލަދޭޝްގެ 29 އަހަރުގެ މީހެކެވެ. އޭނާ މި އަމަލު ހިންގީ ފައިސާގެ ދަހިވެތިކަމުގައި ކަމަށް ފުލުހުން ބުނެ އެވެ.
ސާލިމް ޝަރީއަތް ނިމެންދެން ބަންދުކުރަން އަމުރު ކުރި ނަމަވެސް، ދައުވާ އުފުލަން ޕްރޮސިކިއުޓާ ޖެނެރަލް (ޕީީޖީ) އޮފީހަށް ނުފޮނުވާ ކަމަށް ފުލުހުން ބުންޏެވެ. އަދި ބުނީ، މިހާރު ކުރިޔަށް ދަނީ މައްސަލައިގެ ތަހުގީގު ފުރިހަމަ ކުރަން ފަހުގެ މަސައްކަތްތައް ކަމަށެވެ.
ފުލުހުން ބުނީ މި މައްސަލައިގައި ދައުވާކޮށްދިނުމާ މެދު ގޮތެއް ނިންމުމަށް އެދި އަންނަ ހަފުތާގެ ތެރޭގައި ޕީޖީ އޮފީހަށް ފޮނުވަން މަސައްކަތް ކުރަމުން އަންނަ ކަމަށެވެ. އަދި އެއަށް ފަހު މައްސަލައާ ގުޅޭ އިތުރު މައުލޫމާތު ދޭން ނޫސްވެރިންނާ ބައްދަލުކުރާނެ ކަމަށް ބުންޏެވެ.
އާންމުކޮށް މިފަދަ އަނިޔާވެރި މަރުތަކުގެ މައްސަލައިގައި ތަހުގީގަށް ލިބޭ ކުރިއެރުންތައް ފުލުހުން ހިއްސާކުރި ނަމަވެސް، މިހާތަނަށް މި މައްސަލައިގެ ތަހުގީގާ ގުޅިގެން ފުލުހުން މައުލޫމާތު އާންމުކުރީ އެންމެ ފަހަރަކު އެވެ. އެކަމަކު ޕޮލިސް ކޮމިޝަނުން މުހައްމަދު ހަމީދު ހިމެނޭ ގޮތަށް ފުލުހުންގެ އިސްވެރިންގެ ވަފުދެއް މަހުމޫދުގެ އާއިލާއާ ބައްދަލުކޮށް މަރާ ގުޅޭ މައުލޫމާތު ހިއްސާކުރި އެވެ.
