އަފްގާނިސްތާނުގައި ތިބި އެމެރިކާ ރައްޔިތުންގެ ކަންކަން ބަލަހައްޓައި، ތާލިބާނުންނާ އެކު މަސައްކަތް ކުރުމަށް ގަތަރުގެ ދަށުން އެމެރިކާގެ މަސްލަހަތަށް ހާއްސަ ސެކްޝަނެއް ގާއިމްކުރަން ނިންމައިފި އެވެ.
މިދިޔަ އޯގަސްޓު މަހު އަފްގާނިސްތާނުގެ ގާނޫނީ ވެރިކަން ވައްޓާލައި، ތާލިބާނުން ވެރިކަމަށް އައުމާއެކު އެމެރިކާ އިން ވަނީ ކާބުލްގައި ހުންނަ އެމްބަސީ ބަންދުކޮށްފަ އެވެ.
އެހެންކަމުން ގަތަރު މެދުވެރިވެގެން އަފްގާނިސްތާނުގައި އެމެރިކާއާ ގުޅޭ ކަންކަން ކުރިއަށް ގެންދަން ވަނީ ނިންމާފަ އެވެ. ފަހަކަށް އައިސް އެމެރިކާ އާއި ގަތަރުގެ ގުޅުން ވަނީ ވަރަށް ބޮޑަށް ރަނގަޅުވެފަ އެވެ.
އަފްގާނިސްތާނުގައި އެމެރިކާގެ މަސްލަހަތު ރައްކާތެރި ކުރުމުގެ ދައުރު ގަތަރާ ހަވާލުކުރުމުގެ އެއްބަސްވުމުގައި ސޮއިކުރެއްވީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އެވެ.
ތާލިބާނުންނާ އެކު މަސައްކަތް ކުރުމުގެ ފުރުސަތު އެބަ އޮތް ކަމަށް އެމެރިކާ އިން ބުނި ނަމަވެސް، އަފްގާނިސްތާނުގައި ހުންނަ އެމްބަސީ ނުހުޅުވާނެ ކަމަށް ވަނީ ބުނެފަ އެވެ. އެމްބަސީ ހުޅުވާ ނަމަ ތާލިބާން ސަރުކާރު ރަސްމީކޮށް ބަލައިގަތްކަން ދޭހަވާނެ އެވެ.
އެމެރިކާގެ ބޮޑު އަސްކަރީ މަރުކަޒެއް ހުންނަ ގަތަރުން ވަނީ އަފްގާނިސްތާނުގައި އެމެރިކާ ސިފައިން 20 އަހަރު ހޭދަކުރުމަށް ފަހު އެނބުރި ގައުމަށް ދިޔުމަށް މި އަހަރު ހިންގި ބޮޑު އޮޕަރޭޝަނުގައި ވެސް މުހިއްމު ދައުރެއް އަދާކޮށްފަ އެވެ.
އަފްގާނިސްތާނު ދޫކޮށް ފުރި 124،000 މީހުންގެ ތެރެއިން ދެބައިކޮށްފައި އެއްބައި މީހުން ގައުމުތަކަށް ދިޔުމުގެ ކުރިން މަޑުކުރީ ގަތަރުގަ އެވެ. އޭގެ އިތުރުން ތާލިބާނުންނާއި ގަތަރާ ދެމެދު އޮންނަ ގުޅުމުގެ ސަބަބުން ވެސް މަޝްވަރާތަކަށް ފަސޭހަވި އެވެ.
