ކަޅުފޮއި ރެއެއްގެ ހިމޭންކަމެވެ. ވަގުތުގެ ޙުކުމްދާރަކީ ގުދުރަތުގެ އަޑުތަކެވެ. ގޮނޑުދޮށަށް ބީއްސާލާ ރާޅުގެ އަޑެވެ. އެޔާ އެކުވެގެން މާކަނޑުން އަރަމުންދިޔަ ނަލަ ރޯޅިތަކުގެ ބޫން އަޑެވެ. ގުދުރަތީ މި ރީތި ތަރައްނުމަށް އިތުރު ފުރިހަމަކަމެއް ގެނެސްދެމުން ދިޔައީ ޖެހޭ ރޯޅީގެ ހަމަޔަށް ނަށަމުންދިޔަ ގަސްގަހެވެ. ޝައްކެއްވެސްނެތެވެ! އިންސާނާ އެދޭ އަމާންކަމަކީ މިއީ އެވެ. ދެކޭ ސަރާޙަތުގެ ހުވަފެނަކީވެސް މިއީ އެވެ.
މިފަދަ ހިމޭން މާހައުލެއްގެ ތެރޭގައި ވަނިކޮށް ކުއްލިއަކަށް އަހުރެންގެ ނަޒަރު ހުއްޓުނީ، ގޮނޑުދޮށުގައި އޮތް ގަސްބުޑެއްގެ މަތީ އިން ގަބުކައިފާވާ ޝަޚުސެއްގެ މައްޗަށެވެ. އެއީ ހެޔޮވަރުގެ މުސްކުޅިއެކެވެ. އޭނާގެ މުޅި ނަޒަރު ހުއްޓިފައިވަނީ ދިމާއަށް ފެންނާން އޮތް ކަޅު ކަނޑަށެވެ. މޫނުމަތީން ޝުޢޫރެއްގެ އެއްވެސް އަސަރެއްނުފެނެ އެވެ. އެ މުސްކުޅިޔާގެ ވިސްނުން ކުރިމަތީގައިވާ ކަނޑަށް ޣަރަގުވެފައިވާ ކަހަލަ އެވެ.
މަޑުމަޑުން އަހުރެން އެތަނަށް ލެފިލާ އޭނާގެ ގާތުގައި އިށީނނީމެވެ. އަހުރެން ހީކުރީ ކުއްލި ސިހުމަކާއި އެކު އޭނާ ބަލާލާނެކަމަށެވެ. ނޫނީ އެންމެ ކުޑަމިނުން އޭނާ ހޯދައިގެން އިން ހިމޭންކަމުގެ ހިޔާވަހި ތަޣައްޔަރުކޮށްލިކަމަށްޓަކައި ނުރުހުމުގެ ކަޅިއެއް އެއްލާލާނެކަމަށެވެ. އެހެނަސް......ލޯއަޅާނުލިތާ ބަލާވެސް ނުލީ އެވެ.
ދެން އަހުރެން ބުނީމެވެ. ފަހެ ބޭބޭއަކީ ކާކު ހެއްޔެވެ؟
އޭނާގެ މޫނު އަހުރެނާ ދިމާއަށް އަނބުރާލުމަށްފަހު އިސާހިތަކު ކުރު ޖަވާބެއް ދިނެވެ.
މޮޔައަކީމެވެ.
ދެން ކުޑަހިނިތުންވުމަކާއި އެކު އަހުރެން ވާހަކަ ފެށީމެވެ.
ނުނިދި ހޭލަމޭއްޔަށް އަހުރެންވެސް މި އެނބުރެނީ ޙަޔާތުގެ ފިކުރުތައް ގިނަވެގެންނެވެ. ހައްމުތަކާއި ހުމޫމުތަކުގެ މައްޗަށް ނަޞްރު ހޯދޭތޯ އެވެ. ބޭބޭ ތިޔަފަދަ ގަބެއްކައި މިފަދަ ދަންގަޑިއެއްގައި މިތަނުގައި ތިއިނީ ކީއްވެފައިކަން ނިކަން ބުނެބަލާށެވެ. ބޭބޭގެ ވާހަކައިން ފަހަރުގައި އަހުރެނަށް ފާއިދާއެއްކޮށް އޭގެން ބޭބޭއަށްވެސް ދަރުމައެއް ލިބިދާނެތީ އެވެ.
އޭނާ އަނެއްކާވެސް ކުރު ޖަވާބެއް ދިނެވެ.
ވިސްނުމެއް ނެތް ކޮހަކީމެވެ.
އަހުރެން ހިތާހިތާ ކިޔައިލީމެވެ. މިއީ އަނެއްކާ ހޭޖެހޭ މީހެއްބާވަ އެވެ. ނޫނީ އެބުނާ ފަދައިން އަސްލުގައިވެސް މޮޔައަކީބާވަ އެވެ! އެހެންނާ މިއޮއް ދަންވަރު..... މިހެން ހަމަ ހިތައް އެރުމަށްފަހު ކުޑައިކޮށް ބޯހޫރާލީމެވެ. އަދި އަނެއްކާވެސް ހިތުގައި ބުނީމެވެ. ނޫނެކެވެ. ރޭގަނޑުގެ ހިމޭންކަމުގައި ފިކުރު ހިންގާން އަހުރެންވެސް ނިކުތީތާ އެވެ. ޖެހިގެން އުޅޭ ގިލަންތައް ހިތުން ފިލުވޭތޯ އެވެ. ވީމާ އަދިވެސް އެއްފަހަރު ވާނީ ބޭބޭގެ ފުށުން އެއްޗެއް ސާފުވޭތޯ އުޅޭށެވެ. ފަހަރުގައިހިތުގެ އުދާސްތައް ބޭރުކޮށްލެވިއްޖެނަމަ އެ ބޭބެއަށް ޖެހިގެން އުޅޭ ގިލަނެއް ލުއިވެސް ވެދާނެތީ އެވެ. މިހެން ހިތާ އަނެއްކާވެސް އަހުރެން ސުވާލުކޮށްފީމެވެ.
ބޭބޭއެވެ. ކުޑައިކޮށް ޖެހިގެން ތި އުޅޭ ގިލަނެއް އަހުރެނަށްވެސް ކިޔާލަދީ ބަލާށެވެ. ހިތުގެ އުދާސްތަކަށް ލުޔެއްވެސް ލިބޭނީ އެއިރުންނެވެ.
ޖަވާބުގައި އޭނާ ބުންޏެވެ.
ގިލަނެއްނެތެވެ. ޝުޢޫރެއްނެތެވެ. ސިކުނޑި ހުހެވެ. ހަމަ އެއްކޮށް ހުހެވެ. ހިތާމައެއް އުފަލެއް ލޯތްބެއް ކުލުނެއް ރުޅިއެއް ހަސަދައެއް ހަމްދަރުދީއެއް ނެތެވެ. ޝުޢޫރެއް ނެތެވެ. މޮޔައަކީމެވެ. ކޮހަކީމެވެ. ކަލޭ ބަސްގިނަކުޅައުމަކުން ވާ އުނދަގުލެއްވެސް ނެތެވެ. އަދި ކަލޭގެ ފުށުން ލިބޭނެ އަރާމެއް ތަސައްލީއެއްވެސް ނުވެ އެވެ. އާއެކެވެ. ސިކުނޑި ހުސްވީ އެވެ. ޝުޢޫރުތައް ފިލާ ރައްކާވީއެވެ. ރޫޙުނެތިވާ ޖިސްމަކީމެވެ. މަރުވެފައިވާ ނަފުސެކެވެ. މުޅަނުވެ އަދި ހުރީތާ އެވެ.
މިހެން ބުނުމަށްފަހު އެތަނުން ތެދުވެގެން އޭނާ ހިނގައިގަތެވެ. އަދި ހިނގަމުން ގޮސް ރޭގަނޑުގެ އަނދިރީގެ ތެރޭގައި އޭނާ ޣާއިބުވެއްޖެ އެވެ.
