އަންކާރާ، ތުރުކީ (ނޮވެމްބަރު 13) - އިސްތަންބޫލުގައި ހުންނަ ތުރުކީގެ ރައީސްގެ ގެކޮޅުގެ ފޮޓޯ ނެގި އިޒްރޭލުގެ ދެމަފިރިއެއްގެ މައްޗަށް ޖާސޫސްކުރިކަމުގެ ދައުވާ އުފުލައިފި އެވެ.
އެ ދެމަފިރިން ހައްޔަރުކުރީ މިދިޔަ ބުރާސްފަތި ދުވަހު އެވެ. އެ މީހުންނަށް ތުހުމަތު ކުރެވެނީ މިދިޔަ އަހަރު އިސްތަންބޫލުގައި ހުޅުވި ކަމްލީކާ ޓަވަރަށް ޒިޔާރަތްކޮށް، އެ ތަނުގެ މަތިން ރައީސްގެ ގެކޮޅުގެ ފޮޓޯ ނެގި ކަމަށެވެ.
ކަމްލީކާ ޓަވަރުގައި ގިނަ ރެސްޓޯރެންޓުތަކާއި ވަށައިގެންވާ ސަރަހައްދު ބެލުމަށް އޮބްޒަވޭޝަން ޑެކުތައް ހުރެ އެވެ. ޓަވަރު ހުންނަ އުސްކުދާރް ޑިސްޓްރިކްޓުގައި ރައީސް ތައްޔިބް އުރުދުގާންގެ ގެކޮޅެއް ވެސް ހުރެ އެވެ.
އިޒްރޭލުގެ މީޑިއާ އިން ރިޕޯޓު ކުރި ގޮތުގައި ފޮޓޯ ނެގިކަމުގެ ތުހުމަތުގައި ހައްޔަރު ކުރީ މޯޑީ އަދި ނަޓަލި އޮކްނިން އެވެ. ހުކުރު ދުވަހު އެ ދެ މީހުން ކޯޓަށް ހާޒިރުކޮށް ޖާސޫސް ކުރުމުގެ ދައުވާ ވަނީ އުފުލާފަ އެވެ.
ތުރުކީގެ އަނަދޮލޫ ނިއުސް އެޖެންސީން ޓަވަރުގެ މުވައްޒަފަކާ ހަވާލަދީ ބުނީ އިޒްރޭލު ދެމަފިރިންނާއި ތުރުކީގެ ރައްޔިތަކު ޓަވަރުގައި ހުންނަ ރެސްޓޯރެންޓަކަށް ވަދެ، އުރުދުގާންގެ ގެކޮޅު ފޮޓޯ ނެގުމަށް ފަހު އެކަކު އަނެކަކަށް ދެއްކި ކަމަށެވެ.
އިޒްރޭލުގެ ފޮރިން މިނިސްޓަރު ޔެއާ ލެޕިދް ހުކުރު ދުވަހު ނެރުނު ބަޔާނެއްގައި ވިދާޅުވީ އެ ދެމަފިރިންނަކީ އިޒްރޭލުގެ އެއްވެސް ޖާސޫސީ އެޖެންސީއަކަށް މަސައްކަތް ކުރާ ބަޔެއް ނޫން ކަމަށެވެ.
އެ ދެމަފިރިންގެ އާއިލާއާ ފޮރިން މިނިސްޓްރީގެ އޮފިޝަލުން ބައްދަލުކޮށް، އެ މީހުން މިނިވަން ކުރެވޭނެ ގޮތްތައް ހޯދަން މަސައްކަތް ކުރަމުންދާ ކަމަށް ވެސް ބަޔާނުގައި ވެ އެވެ.
ތުރުކީ އާއި އިޒްރޭލުގެ ގުޅުން ވަރަށް ބޮޑަށް ގޯސްވެ، 2018 ވަނަ އަހަރު ސަފީރުން އަނބުރާ ގެންދިޔައީ ގާޒާގައި މުޒާހަރާ ކުރަމުންދިޔަ ފަލަސްތީނު ރައްޔިތުންތަކެއް މަރުވި ހާދިސާއަށް ފަހު އެވެ.
