މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯގެ މަގާމުގައި ހުންނެެވި ގޯޑަން އެންޑްރޫ ސްޓިވާޓް އެ މަގާމުން ވަކި ކުރީ އެއާޕޯޓުގައި ހިންގާ މަޝްރޫތައް ހަލުވިކޮށް، އެއާޕޯޓުގެ ހިންގުން ހަރުދަނާކުރަން ކަމަށް ސަރުކާރުގެ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނެފި އެވެ.
ގޯޑަން ވަކިކުރަން ޕީސީބީން ލަފާދީފައިވާތީ އޭނާ މަގާމުން ވަކިކޮށްފައިވަނީ ރޭގެ ވަގުތެއްގަ އެވެ. އެގޮތަށް ލަފާ ދިނީ ވެލާނާ އިންޓަނޭޝަނަލް އެއާޕޯޓުގައި ހިންގަމުންދާ ތަރައްގީގެ މަޝްރޫތަކުގެ ދުވެލި އަވަސްކުރުމަށާއި އެއާޕޯޓުގެ ހިންގުން ހަރުދަނާކުރުމަށްޓަކައި ސަރުކާރުން ގެންނަން ބޭނުންވާ ބަދަލުތަކާއި އެއްގޮތަށް ކަމަށް ޕީސީބީން ބުނެ އެވެ.
އިނގިރޭސިވިލާތުގެ ރައްޔިތެއްކަމުގައިވާ ގޯޑަން އެމްއޭސީއެލްގެ ސީއީއޯގެ މަގާމާއި ހަވާލުވީ ޖޫން 28، 2020 ވަނަ ދުވަހު އެވެ. އޭނާ އަކީ ދުނިޔޭގެ އެކި ކަންކޮޅުތަކުގެ އޭވިއޭޝަން އެންޑް ޓްރާންސްޕޯޓުގެ ދާއިރާގައި އިސްކޮށް މަސައްކަތްކުރި، 30 އަހަރަށް ވުރެ ގިނަ ދުވަހުގެ ތަޖުރިބާ ހުރި ފަރާތެކެވެ.
ނަމަވެސް، އެނގިފައިވާ ގޮތުގައި އޭނާ އެމްއޭސީއެލްގެ ސީއީއޯކަމުގައި ހުންނެވިއިރު އޭނާއާއި ދޭތެރޭ އެ ދާއިރާގެ ގިނަ ބަޔަކު ވަނީ ހިތްހަމަނުޖެހިގެން ޝަކުވާކޮށްފަ އެވެ.
އެގޮތުން ރާއްޖެއަށް އޮޕަރޭޓްކުރާ ބައެއް އެއާލައިންތަކުން ގޯޑަންއަށް އެފަދަ މަގާމެއްގެ ޒިންމާ އެންމެ އެެދެވޭ ގޮތުގައި އަދާނުކުރެވޭކަމަށާއި އަދި އެ ފެންވަރެއް އޭނާގެ ކިބައިގައި ނެތްކަމަށް ވެސް ބުނެ ޝަކުވާކޮށްފައިވާކަން މި ނޫހަށް ވަނީ ކަށަވަރު ވެފަ އެވެ.
އޭގެ އިތުރުން ވެސް، އެއާޕޯޓުގެ ފްލައިޓް ޝެޑިއުލްއާ ގުޅިގެން ގޯޑަން ލުއިފަސޭހަތަކެއް ދިނުމަށް ދެކޮޅު ހެދިކަމުގެ ޝަކުވާތަކެއް ވެސް ބައެއް ފަރާތްތަކުން ވަނީ ކޮށްފަ އެވެ.
އަދި އެއާޕޯޓުގެ ތަރައްގީގެ މަޝްރޫތަކުގެ ތެރެއިން އެންމެ ބޮޑު މަޝްރޫއުކަމުގައިވާ އާ ރަންވޭ ނުހުޅުވި ލަސްވުމަކީ ވެސް ގޯޑަންގެ ފަރާތުން އެކަމަށް އެދެވޭ މަސައްކަތްތަކެއް ނުކުރެވޭތީ ލަސްވެފަ އޮތް ކަމެއްކަން ވަނީ އެނގިފަ އެވެ.
ގޯޑަން މަގާމުން ވަކިކުރިއިރު، އެމްއޭސީއެލްއިން ވަނީ އެކުންފުނީގެ ޗީފް އޮޕަރޭޝަންސް އޮފިސަރުގެ މަގާމަަށް އިނގިރޭސިވިލާތަށް ނިސްބަތްވާ ޑެރަން ވިލިއަމްސް އިއްޔެ އައްޔަން ކޮށްފަ އެވެ.
