ވެލިންގްޓަން، ނިއުޒީލެންޑް (ނޮވެމްބަރު 11) - ޓައިވާނުގެ މައްސަލަ ބޮޑުވެފައިވާ މި ދަނޑިވަޅުގައި އޭޝިއާ ޕެސިފިކް ސަރަހައްދުގައި ފިނި ހަނގުރާމައެއް ފެށުމާ ދެކޮޅަށް ޗައިނާގެ ރައީސް ޝީ ޖިންޕިން އިންޒާރު ދެއްވައިފި އެވެ.
ޝީ އާއި އެމެރިކާގެ ރައީސް ޖޯ ބައިޑެންއާ ދެމެދު ވާޗުއަލް ބައްދަލުވުމެއް އަންނަ ހަފުތާގައި ބޭއްވުމަށް ވަނީ ހަމަޖެހިފަ އެވެ. މިހާރު ނިއުޒީލެންޑުގައި ކުރިއަށްދާ އޭޝިއާ ޕެސިފިކް އިކޮނޮމިކް ކޯޕޮރޭޝަން ސަމިޓުގެ ހަވާސާގައި އޮތް ވިޔަފާރި ކޮންފެރެންސެއްގައި ޝީ ވަނީ އެ ސަރަހައްދުގެ ގައުމުތައް އެކުގައި ގޮންޖެހުންތަކާ ކުރިމަތިލުމަށް ގޮވާލައްވާފަ އެވެ.
"ފިކުރީ ރޮނގުތައް ނުވަތަ ސަރަހައްދީ ސިޔާސީ ވިސްނުންތަކުގެ މައްޗަށް ބިނާކޮށް ވަކި ގްރޫޕުތައް ހަދަން ކުރާ މަސައްކަތް ފެއިލްވާނެ،" ޝީ ވިދާޅުވި އެވެ.
"ކުރިން ފެނިފައިވާ ފިނި ހަނގުރާމައިގެ ނުތަނަވަސްކަމާއި ބައިބައިވުމުގެ ތެރެއަށް އޭޝިއާ ޕެސިފިކް ސަރަހައްދު އެނބުރި ގޮސްގެން ނުވާނެ."
ޝީ އެހެން ވިދާޅުވެފައި ވާއިރު، ޓައިވާނުގެ މައްސަލައިގައި އެމެރިކާ އާއި ޗައިނާގެ ގުޅުން ވަނީ ވަރަށް ބޮޑަށް ގޯސްވެފަ އެވެ. ޓައިވާން ކައިރީގައި ޗައިނާގެ އަސްކަރީ ހަރަކާތްތައް ވަނީ އިތުރުކޮށްފަ އެވެ. ޗައިނާ އިން ދެކޭ ގޮތުގައި ޓައިވާނަކީ އެ ގައުމުގެ ބަޔެކެވެ.
ނަމަވެސް ޓައިވާނުން ބުނަނީ އެއީ މިނިވަން ދައުލަތެއް ކަމަށެވެ. އެމެރިކާ އިން ޓައިވާނަށް ސިއްރުން އަސްކަރީ އެހީ ފޯރުކޮށްދޭކަން ފަޅާ އަރާފައި ވަނިކޮށް، ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވީ އަސްކަރީ އެހީ ދިނުން މުހިއްމު ކަމަށެވެ.
"ޓައިވާނަށް އަމިއްލަ ދިފާއުގައި މަސައްކަތް ކުރެވޭނެކަން އަޅުގަނޑުމެން ކަށަވަރު ކުރަން ޖެހޭ. މަގުސަދަކީ އެއްވެސް ބަޔަކު ގަދަކަމުން އެ ސަރަހައްދުގެ ހާލަތު ބަދަލު ކުރަން ފުރުސަތު ނުދިނުން،" ނިއު ޔޯކް ޓައިމްސް އިން ބޭއްވި އިވެންޓެއްގައި ބްލިންކެން ވިދާޅުވި އެވެ.
ޓައިވާނުން ޗައިނާއާ ވަކިވީ 1949 ވަނަ އަހަރުގެ ދާހިލީ ހަނގުރާމައިގައި މާއޯ ޒެޑޯންގްގެ ކޮމިއުނިސްޓް ފައުޖަށް ކުރި ލިބުމުން، ފިލަން ދިޔަ މީހުން ޓައިވާނުގައި ވަޒަންވެރިވި ހިސާބުންނެވެ. އެހެން ނަމަވެސް ޓައިވާނުން ރަސްމީކޮށް މިނިވަންކަން އިއުލާނުކޮށްފައެއް ނުވެ އެވެ. އެހެންވެ، ކޮންމެ ވަގުތަކު ވެސް ޗައިނާގެ އަޅުވެތިކަމަށް ދާން ޖެހިދާނެ ކަމަށް ޓައިވާން ސަރުކާރުން ދެކެ އެވެ.
