ތެހްރާން، އިރާން (ނޮވެމްބަރު 10) - ކޮންމެ ދުވަހަކު ވެސް އަފްގާނިސްތާނުް 5،000 ރެފިއުޖީން ބޯޑަރު ހުރަސްކޮށް އިރާނަށް އެތެރެވަމުންދާ ކަމަށް ނޯވީޖިއަން ރެފިއުޖީ ކައުންސިލް ޖަމިއްޔާ އިން ބުނެފި އެވެ.
އިރާނުގައި މިހާރު ވެސް އަފްގާނިސްތާނުގެ 3.6 މިލިއަން ރެފިއުޖީން އެބަ ތިއްބެވެ. އެހެންވެ ނޯވީޖިއަން ރެފިއުޖީ ކައުންސިލުން ބައިނަލްއަގްވާމީ މުޖުތަމައަށް ގޮވާލީ ރެފިއުޖީންނަށް އެހީވުމުގައި އިރާނަށް ބޭނުންވާ އެއްބާރުލުން ދިނުމަށެވެ.
އެމެރިކާ އިން އިރާނާ ދެކޮޅަށް ގިނަ ދަތިކުރުމުގެ ފިޔަވަޅުތަކެއް އަޅާފައި ހުރި ނަމަވެސް ނޯވީޖިއަން ރެފިއުޖީ ކައުންސިލުން ބުނީ އިރާނަކީ މުޅި ދުނިޔެއިން ވެސް ފާހަގަކުރެވޭ ރެފިއުޖީންނާ މެދު ހަމްދަރުދީ ބަހައްޓާ ފުރިހަމަ ސިޔާސަތެއް ގެންގުޅޭ ގައުމެއް ކަމަށެވެ.
"އަފްގާނިސްތާނުގެ އެހާ ގިނަ ރައްޔިތުންނަށް އިރާނުގެ އެހީ ދާއިމީ ގޮތެއްގައި ފޯރުކޮށްދެވޭނީ ބައިނަލްއަގްވާމީ މުޖުތަމައުގެ އެއްބާރުލުން ލިބިގެން،" އެ ޖަމިއްޔާގެ ސެކެޓްރީ ޖެނެރަލް ޖާން އެގެލޭން މި ހަފުތާގައި އިރާނަށް ކުރެއްވި ދަތުރަށް ފަހު ވިދާޅުވި އެވެ.
"ކުރިއަށް އޮތް ފިނި މޫސުން ފެށުމުގެ ކުރިން، އަފްގާނިސްތާނުގެ އެތެރޭގައި އަދި ވަށައިގެންވާ އިރާނު ފަދަ ގައުމުތަކުގައި ފޯރުކޮށްދޭ އެހީ ވަރަށް ބޮޑު ތަނުން އިތުރު ކުރަން ޖެހޭ."
އެ ޖަމިއްޔާ އިން ލަފާކުރާ ގޮތުގައި މިދިޔަ އޯގަސްޓު މަހު ތާލިބާނުން ވެރިކަމަށް އައުމުގެ ފަހުން 300،000 އެއްހާ އަފްގާން ރައްޔިތުން ބޯޑަރު ހުރަސްކޮށް އިރާނަށް އެތެރެވި އެވެ. އޭގެ ތެރެއިން ބައެއް މީހުންނަކީ ޝިއައީ މުސްލިމުންނަށް ވާތީ ފުރާނަ އަށް އޮތް ނުރައްކަލާ ހެދި ހިޖުރަ ކުރި މީހުންނެވެ.
މި އަހަރު ނިމުމުގެ ކުރިން ހިޖުރަ ކުރާނެ ކަމަށް ބެލެވޭ އިތުރު 515،000 މީހުންނަށް އެހީވުމަށް އދ. ގެ ރެފިއުޖީ އޭޖެންސީން ހޯދަމުންދާ 300 މިލިއަން ޑޮލަރުގެ ތެރެއިން 136 މިލިއަން ޑޮލަރު ހާއްސަކޮށްފައި ވަނީ އިރާނަށް ދާ ރެފިއުޖީންނަށެވެ. ނަމަވެސް މިހާތަނަށް ލިބިފައި ވަނީ ފައިސާގެ 32 ޕަސެންޓެވެ.
