ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތުގައި ފުލުހެއްގެ މައްޗަށް ދައުވާކޮށް, މައްސަލަ ކޯޓަށް ހުށަހަޅައިފި އެވެ.
އިތުބާރު ކުރެވޭ މަގާމެއްގައި ހުރެ ޖިންސީ ގޯނާކުރި ކަމުގެ ތުހުމަތުގައި ދައުވާކޮށްފައިވަނީ ޏ.ފުވައްމުލައް، މާދަޑު، އޮމާން، އަހުމަދު ނަޒުމީނުގެ މައްޗަށެވެ. އޭނާގެ މައްޗަށް ޕްރޮސިކިއުޓާ ޖެނަރަލްގެ އޮފީހުން އުފުލީ ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ކުށުގެ ދައުވާ އެވެ.
ދައުވާ އުފުލީ އެ އޮފީހުން ބުނި ގޮތުގައި 2020 ވަނަ އަހަރުގެ ކުރީކޮޅުން ފެށިގެން އެކިދުވަސްމަތިން އިތުރުބާރުކުރެވޭ މަގާމެއްގައި ހުރެ އުމުރުން 18 އަހަރު ނުފުރޭ ކުއްޖަކަށް ބިރުދައްކައިގެން އެކުއްޖާގެ އޮރިޔާން މަންޒަރު ދައްކުވައިދޭ ފޮޓޯ ނެގުމަށްފަހު އެ ފޮޓޯ ބޭނުންކޮށްގެން ބްލެކްމެއިލްކޮށް އެ ކުއްޖާއަށް ޖިންސީ ގޯނާ ކޮށްފައިވާތީ އެވެ.
މިކަން ހިނގާފައިވަނީ އައްޑޫ ސިޓީ ހިތަދޫގަ އެވެ. އަހުމަދު ނަޒުމީނުއަކީ އެ ރަށުގެ މީހަކާ ކައިވެނިކޮށް އެ ރަށުގައި ދިރިއުޅެމުން ދިޔަ މީހެކެވެ.
ފުލުހުންގެ ވަޒީފާ އަދާކުރަމުން ދިޔަ އަހުމަދު ނަޒުމީނުގެ މައްސަލަ ފެންމަތިވެ, އާންމުން ނުކުމެ އޭނާއާ ދެކޮޅަށް މުޒާހަރާ ވެސް ކުރި އެވެ. އޭނާ ހައްޔަރުކުރީ އޭގެ ފަހުންނެވެ.
