ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ސްރީ ލަންކާގެ ރައީސް ގޮޓްބާޔާ ރާޖަޕަކްސައާ މިއަދު ބައްދަލުކުރައްވައިފި އެވެ.
އެ ބައްދަލުވުން ކުރިއަށްގެންދިޔައީ ސްރީ ލަންކާގެ ވެރިރަށް ކޮޅުނބުގައި ހުންނަ އެ ގައުމުގެ ރައީސްގެ ރަސްމީ އޮފީހުގަ އެވެ. އެ ބައްދަލުވުމުގައި ދެ ގައުމުގެ ޝައުގުވެރިކަން ހުރި ދާއިރާތަކާމެދު ދެ ރައީސުން ފުޅާކޮށް މަޝްވަރާ ކުރެއްވި ކަމަށް ރައީސް އޮފީހުން ބުނެ އެވެ.
އޭގެ އިތުރުން، ރާއްޖެ އާއި ސިލޯނާދެމެދު އޮތް އެކުވެރިކަމުގެ ގުޅުން އިތުރަށް ހަރުދަނާކޮށް ދެމެހެއްޓޭނެ ގޮތަކާމެދު ވެސް ރައީސް ސޯލިހު، ސިލޯނުގެ ރައީސްއާ މަޝްވަރާ ކުރެއްވި ކަމަށް ރައީސް އޮފީހުން ބުނެ އެވެ.
ރައީސް އެމަނިކުފާނުގެ އަނބިކަނބަލުން ފަޒްނާ އަހުމަދާއެކު ސްރީ ލަންކާއަށް ވަޑައިގެންނެވީ އިއްޔެގެ ވަގުތެއްގަ އެވެ. މި ދަތުރުފުޅަކީ "ޕްރައިމް މިނިސްޓަރ މަހިންދަ ރާޖަޕަކްސަ ޓްރޮފީ 2021" ގެ ނަމުގައި ކޮޅުނބުގައި ކުރިއަށްދާ އެކުވެރި ފުޓުބޯޅަ މުބާރާތެއް ޝަރުފުވެރިކޮށްދެއްވުމަށް ކުރައްވާ ދަތުރުފުޅެކެވެ.
އެ ފުޓްބޯޅަ މުބާރާތުގައި ސްރީ ލަންކާ އާއި ދިވެހިރާއްޖެ އާއި ބަންގްލަދޭޝް އަދި ސީޝެލްސް އިން ބައިވެރިވެ އެވެ. އެ މުބާރާތް ފެށުމަށް ހަމަޖެހިފައި ވަނީ މިއަދެވެ. ރާއްޖެ ބައްދަލު ކުރާ ފުރަތަމަ މެޗުގައި މިއަދު ކުޅޭނީ ލަންކާއާ ދެކޮޅަށެވެ.
