މިނިމަމް ވޭޖު ބޯޑުގެ ލަފާގައި ބަޔާންކުރާ އަދަދުތައް ކުޑަކުރުމަށް ފަހު އެންމެ ކުޑަކޮށް ދެވޭނެ އުޖޫރަ ކަނޑައަޅަން އުޅޭ ކަމުގެ މައުލޫމާތު ލިބުމާ އެކު، ރާއްޖޭގެ މަސައްކަތްތެރިންގެ ޖަމިއްޔާތަކުން އެ ހަފްލާ ބޮއިކޮޓް ކުރަން ނިންމައިފި އެވެ.
މިނިމަމް ވޭޖް އިއުލާނުކުރަން މިއަދު 9:30 ގައި ބާއްވަން ހަމަޖެހިފައިވާ ރަސްމިއްޔާތު ޓްރޭޑް ޔޫނިއަންތަކުން ބޮއިކޮޓްކުރަން ނިންމިކަން "އަދަދު"އަށް ކަށަވަރުކޮށް ދެއްވީ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ)ގެ ރައީސް ޓޫރިޒަމް މަސައްކަތްތެރިންގެ ޖަމިއްޔާ ޓޫރިޒަމް އެމްޕްލޯޔީސް އެސޯސިއޭޝަން އޮފް މޯލްޑިވްސް (ޓީމް)ގެ ސެކެޓްރީ ޖެނެރަލްގެ ހައިސިއްޔަތުން މިނިމަމް ވޭޖު ބޯޑުގައި އެ ޖަމިއްޔާ ތަމްސީލު ކުރެއްވި މައުރޫފް ޒާކިރެވެ.
މައުރޫފް ވިދާޅުވީ އެ ރަސްމިއްޔާތު ބޮއިކޮޓް ކުރަން ނިންމީ އިއުލާނުކުރަނީ ކޯއްޗެއްކަން ނޭނގޭތީ ކަމަށެވެ. އަދި މިނިމަމް ވޭޖު ބޯޑުން އެރުވި ލަފާގައި ބުނާ އަދަދުތައް ބަދަލުކުރަން ނިންމާފައިވާ ކަމުގެ ވާހަކަތައް ދެކެވެމުންދާއިރު، މިހާތަނަށް މިނިސްޓްރީން އެފަދަ މައުލޫމާތެއް މިނިމަމް ވޭޖް ބޯޑާ ހިއްސާނުކުރާ ކަމަށެވެ.
މިނިމަމް ވޭޖު ބޯޑުގެ ލަފާ
- ކުދި ފަންތީގެ ވިޔަފާރިތަކަށް ވަޒީފާއާ ބެހޭ ގާނޫނުގައި އެންމެ ގިނަވެގެން ހަފްތާއަކަށް މަސައްކަތް ކުރެވޭނެ 48 ގަޑިއިރުގެ ނިސްބަތުން ގަޑި އިރަކަށް 24.04ރ. ގެ މަގުން، މަހަކު 5،000ރ.
- މެދު ފަންތީގެ ވިޔަފާރިތައް: ވަޒީފާއާ ބެހޭ ގާނޫނުގައި އެންމެ ގިނަވެގެން ހަފްތާއަކަށް މަސައްކަތް ކުރެވޭނެ 48 ގަޑިއިރުގެ ނިސްބަތުން ގަޑި އިރަކަށް 33.65ރ. ގެ މަގުން 7،000ރ.
- ބޮޑެތި ވިޔަފާރިތައް: ވަޒީފާއާ ބެހޭ ގާނޫނުގައި އެންމެ ގިނަވެގެން ހަފްތާއަކަށް މަސައްކަތް ކުރެވޭނެ 48 ގަޑިއިރުގެ ނިސްބަތުން ގަޑި އިރަކަށް 42.79ރ. މަގުން 8،900ރ. އެވެ.
- ޕަބްލިކް ސެކްޓާގައި ހަ ގަޑިއިރު މަސައްކަތް ކުރާ މުވައްޒަފުންނަށް މަހަކު 7،000ރ. ނުވަތަ ހަ ގަޑިއިރަށް ވުރެ މަދުން މަސައްކަތް ކުރާ މުވައްޒަފުންނަށް ގަޑިއިރަކަށް 33.65ރ.
ބައެއް މީޑިއާތަކަށް މައުލޫމާތު ދެމުން އިކޮނޮމިކް މިނިސްޓަރު ފައްޔާޒު އިސްމާއިލް ވަނީ މިނިމަމް ވޭޖު ބޯޑުގެ ލަފަޔަށް ކޮންމެވެސް ވަރެއްގެ ބަދަލުތަކެއް އަންނާނެ ކަމަށް ވިދާޅުވެފަ އެވެ. އެކަމަކު މިނިމަމް ވޭޖާއެކު ވަޒީފާ އަދާކުރާ ފަރާތްތަކުގެ މުސާރައަށް ހެޔޮ ބަދަލުތަކެއް އަންނާނެ ކަމަށް ވިދާޅުވި އެވެ.
ގާނޫނުގައި ބުނާ ގޮތުން އެންމެ ކުޑަ އުޖޫރައިގެ ގޮތުގައި ދެވޭނެ އަދަދު ކަނޑައަޅާނީ މިނިމަމް ވޭޖު ބޯޑުގެ ލަފަޔާ އެކު އިކޮނޮމިކް މިނިސްޓަރެވެ. މިނިމަމް ވޭޖު ތަންފީޒުކުރަން ފަށާނީ އަންނަ އަހަރުގެ ޖެނުއަރީ 1 އިން ފެށިގެންނެވެ.
