އިންޑިއާ އިން ދިވެހިރާއްޖެ އަށް ކަނޑައެޅި އާ ސަފީރު މުނޫ މަހާވަރު މިއަދު އެ މަގާމަށް އައްޔަނުކޮށްފި އެވެ.
މަހާވަރް އަށް ސަފީރުކަމަށް އައްޔަންކުރިކަމުގެ ލިޔުން ހަވާލުކުރެއްވީ ރަޝްޓްރަޕަތީ ބަވަންގައި މިއަދު އޮތް ރަސްމިއްޔާތެއްގައި އެ ގައުމުގެ ރައީސް ރާމް ނާތު ކޯވިންދެވެ.
މަހާވަރް ކުރެއްވި ޓްވީޓެއްގައި ވިދާޅުވީ ރައީސްގެ އަރިހަށް ޒިޔާރަތްކޮށް މަގާމުގެ ލިޔުމާ ހަވާލުވުމަކީ ލިބުނު ބޮޑު ޝަރަފަކާއި ފަހުރެއް ކަމަށާއި އެމަނިކުފާނުގެ ލަފަޔާއި އިރުޝާދުތަކަށް ޝުކުރުވެރިވާ ކަމަށެވެ.
އިންޑިއާ އިން ރާއްޖެ އަށް އާ ސަފީރެއް މި ހަމަޖެއްސެވީ ސަންޖޭ ސުދީރުގެ ބަދަލުގަ އެވެ. ސުދީރު ވަނީ ދާދި ފަހުން ޔުނައިޓެޑް އެރެބް އެމިރޭޓްސް (ޔޫއޭއީ) ގައި ހުންނަވާ އިންޑިއާ ސަފީރަކަށް ހަމަޖައްސައިފަ އެވެ. ސުދީރު މަގާމާ ހަވާލުވެވަޑައިގަތީ 2019 ވަނަ އަހަރުގެ މާޗު މަހު އެވެ. އޭނާ ވަނީ މި ސަރުކާރުން 2018 ވަނަ އަހަރު ވެރިކަމަށް އައިސް އިންޑިއާއާ ބަދަހި ކުރި ގުޅުމާ އެކު، ލިބުނު ގިނަ ޕްރޮޖެކްޓްތަކެއް ކުރިއަށް ގެންދިއުމުގައި އިސް ދައުރެއް އަދާކޮށްފަ އެވެ.
އާ ސަފީރު މަހާވަރް އެންމެ ފަހުން ހުންނެވީ އޮމާނުގައި ހުންނަވާ އިންޑިއާގެ ސަފީރުގެ ގޮތުގަ އެވެ. އިންޑިއާގެ ފޮރިން ސާވިސަސްއާ 1996 ވަނަ އަހަރު ގުޅުނު މަހާވަރް ވަނީ 1998-2001 އަށް ރަޝިއާގެ ވެރިރަށް މޮސްކޯ އަދި 2008-2011 އަށް ސްވިޒަލެންޑުގެ ޖެނީވާގެ ޑިޕްލޮމެޓިކް މިޝަންގައި މަސައްކަތްކޮށްފަ އެވެ. މީގެ އިތުރުން ބޮޑުވަޒީރުގެ އޮފީހުގެ ޑިރެކްޓަރުކަމާއި އެކްސްޓާނަލް އެފެއާޒްގެ ޔޫއެން ޕޮލިޓިކަލް ޑިވިޝަނުގައި މަސައްކަތްކޮށްފަ އެވެ.
