"ވެށި ހިމާޔަތް ކުރެވޭނީ އަހަރެމެންނަށް" ކަމަށް ވިދާޅުވެ، ވެށީގެ ހިމާޔަތުގައި ރާއްޖޭން ކުރަމުންދާ މަސައްކަތުގައި ބައިވެރިވެވަޑައިގަތުމަށް ދުނިޔޭގެ ގާނޫނު ހަދާ މަޖްލިސްތަކުގެ މެމްބަރުންނަށް ރާއްޖޭގެ ރައްޔިތުން މަޖިލީހުގެ ރައީސް މުހައްމަދު ނަޝީދު ދައުވަތު ދެއްވައިފި އެވެ.
ސްކޮޓްލެންޑުގެ ވެރިރަށް ގްލާސްގޯގައި މިހާރު ކުރިއަށްދާ ކޮޕް26 ސަމިޓުގެ ހަވާސާގައި މެމްބަރުންނަށް ހާއްސަކޮށްގެން އެ ގައުމުގެ ގާނޫނު ހަދާ މަޖިލީހުގައި ކުރިއަށް ގެންދިޔަ ދަންފަޅީގައި ވާހަކަދައްކަވަމުން ނަޝީދު ވިދާޅުވީ ތިމާވެށީގެ ހިމާޔަތުގައި އެންމެ ބޮޑު ދައުރެއް އަދާކުރުވޭނީ ގާނޫނު ހަދާ މަޖިލީސްތަކުގެ މެމްބަރުންނަށް ކަމަށެވެ.
ތިމާވެށި ހިމާޔަތްކުރުމަށް ވެވޭ ވައުދުތައް، ގާނޫނީ އިމުގެ ތެރެއިން ފުއްދޭނެ ގޮތް، އެމަނިކުފާނަށް އެނގިވަޑައިގަންނަވާ ކަމަށް ވިދާޅުވަމުން ނަޝީދު ވަނީ ޕްލާސްޓިކް ކޮތަޅު ރާއްޖޭން މަދުކުރުމަށް ކުރި މަސައްކަތް ފާހަގަކުރައްވާފަ އެވެ. މަޖިލީހުން ފާސްކުރި ގާނޫނަކާ އެކު، މިހާރު ރާއްޖެ އަށް އެތެރެކުރާ ކޮންމެ ޕްލާސްޓިކް ކޮތަޅަކުން ދެ ރުފިޔާގެ ޓެކްސްއެއް ނަގާނެ އެވެ.
"އަޅުގަނޑުމެންނަކީ އިންޑިއާ ކަނޑުގެ މެދުތެރޭގައި އުޅޭ ބައެއް. ތިޔަބޭފުޅުންނަށް އަޅުގަނޑުމެންނަށް ޗާޓުގައި ނުފެނިދާނެ. އެހެން ނަމަވެސް، އަޅުގަނޑުމެންނަށް އެނގޭ މިކަން ކުރަން. އަޅުގަނޑުމެންނަށް އެކަން ކުރެވޭނެ. އަޅުގަނޑުމެންނަށް އެނގޭ، ގާނޫނެއްގެ ތެރެއިން ވައުދެއް ފުއްދޭނެގޮތް،" ނަޝީދު ވިދާޅުވި އެވެ.
ނަޝީދު ވިދާޅުވީ ތިމާވެށި ހިމާޔަތް ކުރުމަށް މަޖިލީހުން ގިނަ މަަސައްކަތްތަކެއް ކުރެވިދާނެ ކަމަށެވެ. އަދި އެ މަސައްކަތްތައް ކުރުމުގައި ރާއްޖޭގެ ގާނޫނު ހަދާ މަޖިލީހުގެ އެހީތެރިކަން ދުނިޔޭގެ ކޮންމެ ގައުމަކަށް ވެސް ލިބޭނެ ކަމަށް ވިދާޅުވި އެވެ.
ނަޝީދު މިއަދު އެންމެ ބޮޑަށް ކަންބޮޑުވުން ފާޅުކުރެއްވި އެއްކަމަކީ މޫސުމީ ބަދަލުތަކުން ރާއްޖެ އަށް ލިބޭ ގެއްލުންތަކާ މެދު އެވެ. އެމަނިކުފާނު ވިދާޅުވީ "މިހާރު ވެސް އަޅުގަނޑުމެންނަށް ފެންނަމުން މިދަނީ، އަޅުގަނޑުމެންގެ ގޮނޑުދޮށްތައް ގިރަމުން ދާތަން" ކަމަށެވެ.
"އަޅުގަނޑުމެންނަށް އެނގޭ، ވައި ގަދަކަން، ރާޅުތައް މާ ގަދަކަން، ހޫނު މޫސުންތައް ގިނަކަން. އަޅުގަނޑުމެންގެ މުރަކަ ފަރުތައް ބްލީޗްވެފައި، އަޅުގަނޑުމެންގެ ބަޔޯޑައިވާސިޓީ ގެއްލި، އެން ނުލިބޭތީ ކަނޑުމަސް އިންޑަސްޓްރީތައްވެސް ގެއްލެނީ. އަޅުގަނޑުމެންގެ ފެން ތަގައްޔަރުވެ، އަޅުގަނޑުމެންގެ ފެން އަޅުގަނޑުމެން ނަށް ޖެހޭނީ ޑީސެލިނޭޓް ކުރަން،" މޫސުމީ ބަދަލުތަކުން ރާއްޖެއަށް ލިބޭ ގެއްލުންތައް ފާހަގަކުރައްވަމުން ނަޝީދު ވިދާޅުވިއެވެ.
ނަޝީދު ވިދާޅުވީ ރާއްޖެ އަޑިއަށްދާތަން ބަލަން ހުންނަން އެމަނިކުފާނު ބޭނުން ނުވާ ކަމަށެވެ. އަދި ގައުމު އަޑިއަށް ދިއުމުގެ ކުރިން ސަލާމަތްވުމަށް ކުރެވެން ހުރި ހުރިހާ މަސައްކަތެއް ކުރަމުން އަންނައިިރު، އެކަމުގައި އެހެން ގައުމުތަކުގެ އެއްބާރުލުމަށް ވެސް އެމަނިކުފާނު އެދިވަޑައިގަތެވެ.
ނަޝީދު ވަނީ 2030 ގެ ކުރިން އިންޑިއާ އިން ކަރަންޓުގެ 50 ޕަސެންޓް ދެމެހެއްޓެނިވި ވަސީލަތްތަކުން އުފައްދަން ވައުދުވުމާ ގުޅިގެން އެ ގައުމުގެ ބޮޑުވަޒީރު ނަރެންދްރާ މޯދީ އަށް ތައުރީފުކުރައްވައިފަ އެވެ. ނަޝީދު ވިދާޅުވީ ދެމެހެއްޓެނިވި ވަސީލަތްތަކުގެ އެހީގައި ކަރަންޓު އުފެއްދުމަށް ދުނިޔޭން ކުރާ މަސައްކަތް ލީޑުކުރަން އިންޑިއާއާ ހަވާލުކުރަން ޖެހޭ ކަމަށެވެ.
މޫސުމީ ބަދަލުގެ އަސަރުތައް އެންމެ ބޮޑަށް ކުރާ ގައުމުތައް ހިމެނޭ ކްލައިމެޓް ވަލްނަރަބަލް ފޯރަމް (ސީވީއެފް) ގެ އެމްބިޝަން އެމްބެސެޑަރުގެ ދައުރު ވެސް އަދާ ކުރައްވާ ނަޝީދަކީ، އެމަނިކުފާނުގެ ވެރިކަމުގައި، ޑެންމާކުގެ ވެރިރަށް ކޯޕެންހޭގަންގައި އޮތް ކޮޕް ސަމިޓުގައި ވެސް ވަރަށް ބޮޑަށް އަޑުއުފުލެއްވި ބޭފުޅެކެވެ. އެމަނިކުފާނު ވަނީ ތިމާވެށީގެ މައްސަލަތަކަށް ސަމާލުކަން ހޯއްދެއްވުމަށް ކަނޑުއަޑީގެ ކެބިނެޓް ބައްދަލުވުމެއް ވެސް ބާއްވަވައިފަ އެވެ.
