ދިވެހިރާއްޖެއަށް ގޭސް އެތެރެކުރުމުގައި ދަތިތަކެއް ކުރިމަތިވެ، މޯލްޑިވްސް ގޭސްއިން، ފުޅިތަކަށް ގޭސް އަޅައިދޭ ިމިންވަރު މަދުކުރަން އެ ކުންފުނިން ނިންމައިފި އެވެ.
މޯލްޑިވްސް ގޭސްއިން މިއަދު ކުރި އިއުލާނެއްގައި ބުނީ އެ ބަދަލު ގެނައީ ދުނިޔޭގެ ބާޒާރުގައި ގޭހުގެ އަގު އުފުލި ރާއްޖެއަށް ގޭސް އެތެރެކުރުމުގައި ދަތިތަކެއް ދިމާވުމުން ކަމަށެވެ. އެ ބަދަލު ގެނައުމަށް އެ ކުންފުނިން ނިންމައިފައި ވަނީ އަންނަ ހޮނިހިރު ދުވަހުން ފެށިގެންނެވެ.
މޯލްޑިވްސް ގޭސްއިން ބުނީ އެ ބަދަލާއެކު 10 ކިލޯގެ ފުޅިއަށް ދެން އަޅައިދެމުން ދާނީ ހަތް ކިލޯގެ ގޭސް ކަމަށާއި 22 ކިލޯގެ ފުޅިއަށް އަޅައިދެމުން ދާނީ 14 ކިލޯގެ ގޭސް ކަމަށެވެ. އަދި، 45 ކިލޯގެ ފުޅިއަށް ހޮނިހިރު ދުވަހުން ފެށިގެން އަޅައިދޭނީ 31 ކިލޯގެ ގޭސްކަމަށް އެ ކުންފުނިން ބުންޏެވެ.
މި ބަދަލު ގެނައި ނަމަވެސް، ގޭހުގެ އަގަށް ބަދަލެއް ނާންނާނެކަމަށާއި އަގު ނަގާނީ ފުޅިއަށް އެޅޭ ގޭހުގެ ބަރުދަނަށް، މިހާރު ވެސް ކަނޑައަޅައިފައިވާ ކިލޯ ރޭޓުން ކަމަށް މޯލްޑިވްސް ގޭހުން ބުންޏެވެ.
މޯލްޑިވްސް ގޭސްގެ އިއުލާނުގައި ބުނީ އެ ބަދަލަކީ ވަގުތީ ބަދަލެއް ކަމަށެވެ. އަދި، ތިން މަސްދުވަހަށް ބޭނުންވާ މިންވަރަށް އެއްފަހަރާ ގޭސް ގެނެސް ރައްކާ ކުރެވޭނެ އިންތިޒާމު ހަމަޖެއްސުމުގެ މަސައްކަތް ސަރުކާރުން ކުރަމުންދާ ކަމަށް އެ އިއުލާނުގައި ބުންޏެވެ.
އެ މަޝްރޫއު ނިމުމުން، ގޭސް އެތެރެކުރަން ދިމާވާ ދަތިތަކަށް ދާއިމީ ހައްލެއް ލިބިގެންދާނެ ކަމަށް އެ ކުންފުނިން ބުންޏެވެ.
މެދުއިރުމަތީގައި ހިނގަމުންދާ ހަނގުރާމައާ ގުޅިގެން މީގެ ކުރިން މާޗު 15، ގައި ވެސް މޯލްޑިވްސް ގޭސް އިން ވަނީ ގޭސް ވިއްކުން ލިމިޓުކޮށް، ސިލިންޑަރުތަކަށް ގޭސް އަޅާ މިންވަރު މަދުކޮށްފަ އެވެ.
އޭގެ ފަހުން، ޖޫން 17، ގައި އެ ކުންފުނިން ވަނީ 45 ކިލޯ އާއި 22 ކިލޯގެ ގޭސް ފުޅީގެ އަގުތައް ބޮޑުކޮށްފަ އެވެ.
