ޔޫތު މިިނިސްޓަރު އަހުމަދު މަހުލޫފް މިހާރު ބަހްރޭނަށް ކުރައްވަމުން ގެންދަވާ ދަތުރުފުޅުގައި ރާއްޖޭގެ ކުޅިވަރަށް ފަހި ފުރުސަތުތަކެއް ހޯދައިދެއްވުމަށް ބަހްރޭނުގެ ކުޅިވަރުގެ އިސް ފަރާތްތަކާ މަޝްވަރާ ކުރައްވައިފި އެވެ.
ރައީސް އޮފީހުން މިނިސްޓަރު މަހުލޫފްގެ ސަސްޕެންޝަން މިދިޔަ މަހުގެ ކުރީކޮޅުގައި އުވާލުމާ އެކު މިނިސްޓަރު އަންނަނީ ވަރަށް އެކްޓިވްކޮށް ކުޅިވަރުގެ އެކި މަސައްކަތްތަކުގައި އުޅުއްވަމުންނެވެ. އެމްއެމްޕީއާރްސީގެ ކޮރަޕްޝަންގެ މައްސަލާގައި މިނިސްޓަރު މަހުލޫފްގެ މައްޗަށް ދައުވާ ކުރުމަށް އޭސީސީން ފޮނުވުމާ ގުޅިގެން އޭނާ މަގާމުގެ މަސްއޫލިއްޔަތުން އެކަހެރި ކުރުމަށް ފަހު އަލުން ޒިންމާއާ ހަވާލުވީ ހަަތަރު މަސް ފަހުންނެވެ.
މިނިސްޓަރު މި ވަގުތު ބަހުރޭނުގައި ހުންނެވިއިރު، މިހާތަނަށް ވަނީ ބަހްރޭނުގެ ޔޫތު އެންޑް ސްޕޯޓްސް އެފެއާޒް މިނިސްޓަރު އައިމަން ތައުފީގް އަބްދުއްރަހްމާން އާއި ބަހްރޭނުގެ ވޮލީބޯލް އެސޯސިއޭޝަންގެ ރައީސާއި ބަހްރޭން ފުޓްބޯލް އެސޯސިއޭޝަންގެ ރައީސް އަދި ބަހްރޭންގެ ހޭންޑްބޯލް އެސޯސިއޭޝަނާ ބައްދަލުކުރައްވައިފަ އެވެ.
ބަހްރޭން ޔޫތު މިނިސްޓްރީއާ އެކު ބޭއްވި ބައްދަލުކުރެއްވުމުގައި ވަނީ ޒުވާނުންނާއި ކުޅިވަރުގެ ދާއިރާއިން ދެ ގައުމުގެ ގުޅުން ބަދަހިކުރެވޭނެ ގޮތްތަކާއި ގުޅޭގޮތުން ވަނީ މަޝްވަރާތައް ކުރިއަށް ގެންގޮސްފަ އެވެ. މީގެ އިތުރުން ބަހްރޭނާއި ރާއްޖެއާ ދެމެދު ޔޫތު އެކްސްޗޭންޖް ޕްރޮގްރާމްތަކާއި ކުޅިވަރުގެ ދާއިރާ ތަރައްގީ ކުރެވޭނެ ގޮތްތަކާ ބެހޭގޮތުން ވާހަކަ ދެކެވުނެވެ.
މި ދަތުރުފުޅުގައި މިހާތަނަށް ކުރެވުނު މަޝްވަރާތަކުގެ އަލީގައި ރާއްޖޭގެ ގައުމީ ހޭންޑްބޯޅަ ޓީމަށް ބަހްރޭނުގައި ޓްރެއިނިން ކޭމްޕް ގެންދިއުމުގެ ފުރުސަތު ހޯދައިދިނުމަށް ވާހަކަ ދެކެވުނެވެ. އަދި ރާއްޖޭގެ ގައުމީ ވޮލީ ޓީމަށް ބަހްރޭނާ އެކު އެކުވެރިކަމުގެ މެޗުތަކެއް ކުޅުމުގެ ފުރުސަތު ހޯދައިދޭން މަޝްވަރާ ކުރެވިފައިވާ ކަމަށް މިނިސްޓަރު ވަނީ ވިދާޅުވެފަ އެވެ.
ރާއްޖޭގެ ފުޓްބޯޅަ އެސޯސިއޭޝަން، އެފްއޭއެމާއި ބަހްރޭންގެ ފުޓްބޯޅަ އެފްއޭއާ ދެމެދު ބަދަހި ގުޅުމެއް އޮތްއިރު، ދެ ގައުމުގެ ފުޓްބޯޅައިގެ ރަސްމީ އިދާރާ ގުޅިގެން މުސްތަގުބަލަށް މުހިއްމު މަސައްކަތްތަކެއް ކުރެވޭނެ ކަމުގެ އުއްމީދު އެބައޮތް ކަމަށް މިނިސްޓަރު ވަނީ ފާހަގަކުރައްވައިފަ އެވެ.
