ކޮޕް26 ސަމިޓުގައި ބައިވެރިވެވަޑައިތުމަށް ރައީސުލްޖުމްހޫރިއްޔާ އިބްރާހިމް މުހައްމަަދު ސޯލިހު ސްކޮޓްލޭންޑަށް ކުރެއްވި ދަތުރުފުޅު ނިންމަވާލެއްވުމަށްފަހު މިއަދު އެނބުރި ރާއްޖެ ވަޑައިގެންފި އެވެ.
މި ދަތުރުގައި ރައީސް ވަނީ ކޮޕް26ގައި ކުރިޔަށް ދިޔަ މަތީ ފަންތީގެ އެކިއެކި މަޝްވަރާތަކާ ބައްދަލުވުންތަކުގައި ބައިވެރިވެވަޑައިގެންފަ އެވެ.
އަދި ޖައްވަށް ވިހަ ގޭސް ބޭރުކުރާ ބޮޑެތި ގައުމުތަކުން، ޒިންމާ އަދާކޮށް، މޫސުމަށް އަންނަ ބަދަލުތަކުގެ ސަބަބުން ތިމާވެށްޓަށް ކުރާ ނޭދެވޭ އަސަރުތަކަށް މާލީ އެހީތެރިކަން ފޯރުކޮށްދިނުން އިތުރުކުރުމަށް ރައީސް ވަނީ އެ ސަމިޓުގައި ވަކާލާތުކުރައްވައި ވާހަކަ ދައްކަވާފަ އެވެ.
ރައީސް ސޯލިހު ވަނީ ކޮޕް26ގެ ވޯލްޑް ލީޑާސް ސަމިޓްގައި ދެއްވި ބަޔާނުގައި މޫސުމަށް އަންނަ ބަދަލުތަކުގެ ސަބަބުން ރާއްޖެ ހުށަހެޅިފައިވާ ނުރައްކާތެރި ހާލަތާ ބެހޭގޮތުން ވާހަކަފުޅުދައްކައި، ރާއްޖެއިން ދައްކަމުންގެންދާ ވާހަކަތައް ދުނިޔޭގެ ލީޑަރުން އަޑުއަހާނީ ކޮންއިރަކުންތޯ ވެސް ސުވާލުކުރައްވާފަ އެވެ.
ވާހަކަގައި ރައީސް ވަނީ މޫސުމަށް އަންނަ ބަދަލުތަކުގެ ސަބަބުން ދިވެހިންގެ ދިރިއުޅުމަށް ކޮށްފައިވާ ނޭދެވޭ އަސަރުތައް ސަމިޓުގައި ބައިވެރިވެވަޑައިގެންނެވި ލީޑަރުންނާއި ހިއްސާކުރައްވާފަ އެވެ.
އަދި ފާއިތުވި އެއްމަސްތެރޭ އެމަނިކުފާނު ރާއްޖޭގެ ބައެއް ރަށްރަށަށް ކުރެއްވި ދަތުރުފުޅުތަކުގެ ތަޖުރިބާ ވެސް ހިއްސާކުރައްވައި ރަށަކަށްފަހު ރަށެއް ކަނޑު އަޑިޔަށް ދިއުމުގެ ބިރު ރާއްޖެއަށް މިހާރު ކުރެވެމުންދާ ކަމަށް ވެސް ރައީސް ވިދާޅުވި އެވެ.
ރައީސް ވަނީ އެމަނިކުފާނު ވަޑައިގެންނެވި ކޮންމެ ރަށަކުންހެން އާދަޔާ ހިލާފަށް ރަށްގިރުމުގެ މައްސަލަ ފާހަގަވާކަމަށް ވިދާޅުވެ، އެއީ ދިވެހިންނާ މިއަދު ކުރިމަތިލާންޖެހިފައިވާ މޫސުމަށް އަންނަ ބަދަލުތަކުގެ ނޭދެވޭ އަސަރުތަކުގެ ކުޑަ މިސާލެއްކަމަށް ވެސް ވިދާޅުވެފަ އެވެ.
ދަތުރުގައި ރައީސް ވަނީ ދުނިޔޭގެ ލީޑަރުންނާއި މަތީ ފަންތީގެ އެކިއެކި މަންދޫބުންނާ ވެސް ބައްދަލުކުރައްވާފަ އެވެ. އަދި ކްލައިމެޓް ވަލްނަރަބަލް ފޯރަމް (ސީވީއެފް)، ކޮމަންވެލްތު ހައި-ލެވެލް ޕެނަލް ޑިސްކަޝަން އާއި އިންޓާނޭޝަނަލް ރިނިއުބަލް އެނާޖީ އޭޖެންސީ (އައިރީނާ)ގެ އެނާޖީ ޓްރާންސިޝަން އެކްސެލެރޭޓާ ފައިނޭންސިން ޕްލެޓްފޯމް (އީ.ޓީ.އޭ.އެފް) އިފްތިތާހުކުރުމުގެ ރަސްމިއްޔާތުގައި ވެސް ރައީސް ވަނީ ބައިވެރިވެވަޑައިގެންފަ އެވެ.
އަދި ޖަޒީރާ ރަށްރަށުގެ މޫސުން ދެނެގަތުމާއި ގުޅޭގޮތުން މަޝްވަރާކުރުމަށް ބޭއްވި ވަށްމޭޒު ބައްދަލުވުމުގައި ވެސް އެމަނިކުފާނު ވަނީ ބައިވެރިވެވަޑައިގެންފަ އެވެ.
ދަތުރުގައި ރައީސް ވަނީ ރާއްޖޭގެ ވަފުދުގެ އެޑްވައިޒަރެއްގެ ގޮތުގައި ހަމަޖެއްސި އދ.ގެ އިންސާނީ ހައްގުތަކާބެހޭ ކުރީގެ ހައި ކޮމިޝަނަރު، ޕްރިންސް ޒެއިދު އަލް ހުސައިންއާ ވެސް ބައްދަލުކުރައްވައި މަޝްވަރާކުރައްވާފަ އެވެ.
ރައީސްގެ މި ދަތުރަކީ މިދިޔަ 12 އަހަރު ތެރޭ ރާއްޖޭގެ ވެރިޔަކު އެ ސަމިޓުގައި ބައިވެރިވެވަޑައިގަތް ފުރަތަމަ ފަހަރެވެ. ކޮޕް26 އަށްފަހު ރައީސް ވަނީ ލަންޑަނުގައި އޮތް ވޯލްޑް ޓްރެވެލް މާކެޓް (ޑަބްލިއުޓީއެމް) އަށް ވެސް ޒިޔާރަތްކުރައްވާފަ އެވެ.
ކޮޕް26 އަށް ކުރެއްވި ދަތުރުގައި ރައީސްގެ އަރިހުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުރުން ރާއްޖޭގެ މަތީ ފަންތީގެ ވަފްދެއް ވެސް ބައިވެރިވެވަޑައިގަތެވެ.
