ކުރިއަށް އޮތް ފަސް އަހަރު ދުވަހުގެ ތެރޭގައި ދުނިޔޭގެ އެވްރެޖް ހޫނުމިން ރެކޯޑް މިންވަރަކަށް މަތިވާނެ ކަމަށް އދ. ގެ މޫސުމާ ބެހޭ އިދާރާ އާއި އިނގިރޭސިވިލާތުގެ މެޓް އޮފީހުން ބުރާސްފަތި ދުވަހު ނެރުނު ރިޕޯޓެއްގައި ލަފާކޮށްފި އެވެ.
ދުނިޔޭގެ އެކި ސަރަހައްދުތަކުގެ ހޫނުމިނާއި ވާރޭވެހޭނެ މިންވަރު އަންދާޒާކޮށް ކޮންމެ އަހަރަކު ނެރޭ މި ރިޕޯޓުގައި ބުނެފައިވާ ގޮތުގައި، ދުނިޔޭގެ އެވްރެޖް ހޫނުމިން ހުންނާނީ ސިނާއީ އިންގިލާބުގެ ކުރިން (1850 އާއި 1900 އާ ދެމެދު) ހުރި މިންވަރަށްވުރެ 1.3 ޑިގްރީ ސެލްސިއަސް އާއި 1.9 ޑިގްރީ ސެލްސިއަސް މަތީގަ އެވެ.
އިނގިރޭސިވިލާތުގެ މެޓް އޮފީހުގެ ރިސާޗް ސައިންޓިސްޓެއް ކަމަށްވާ މެލީސާ ސީބްރޫކް ރޮއިޓާސްއަށް މައުލޫމާތު ދެމުން ވިދާޅުވީ، ދުނިޔޭގެ މޫސުމަށް ބަދަލު އަންނަމުންދާ ކަމާއި، ދުނިޔޭގެ އެވްރެޖް ހޫނުމިން މެދުނުކެނޑި އުފުލެމުންދާކަން ވަރަށް ސާފުކޮށް ހެކިތަކުން ފެންނަން އެބަހުރި ކަމަށެވެ.
ދުނިޔޭގެ ގައުމުތަކުން 2015 ވަނަ އަހަރު ސޮއިކުރި ޕެރިސް އެގްރީމަންޓުގައި އެއްބަސްވެފައިވަނީ، ދުނިޔޭގެ އެވްރެޖް ހޫނުމިން ސިނާއީ އިންގިލާބުގެ ކުރިން ހުރި މިންވަރަށްވުރެ 1.5 ޑިގްރީ ސެލްސިއަސްއަށްވުރެ މަތިވިޔަ ނުދީ ހިފެހެއްޓުމަށެވެ. އެއީ ހޫނުމިން އެ މިންވަރަށްވުރެ މަތިވެއްޖެ ނަމަ، މޫސުމީ ނުރައްކާތެރި ހާދިސާތައް ކުރިމަތިވާ މިންވަރު އިތުރުވެ، އޭގެ ނުރައްކާ ބޮޑުވާނެތީ އެވެ.
"ސައިންސްގެ އަލީގައި ވަރަށް ސާފުކޮށް އެނގެން އޮތީ، ދުނިޔޭގެ ހޫނުމިން 1.5 ޑިގްރީގައި ހިފެހެއްޓުމަށް ލިބިފައިވާ ފުރުސަތު ވަރަށް ހަނިވަމުންދާކަން،" ސީބްރޫކް ވިދާޅުވި އެވެ.
މި ރިޕޯޓުގައި ލަފާކޮށްފައިވާ ގޮތުގައި، ކުރިއަށް އޮތް ފަސް އަހަރު ދުވަހުގެ ތެރޭގައި ދުނިޔޭގެ އުތުރު ބިތުގެ އާކްޓިކް ސަރަހައްދުގެ ފިނި މޫސުމުގެ ހޫނުމިން، ދުނިޔޭގެ އެވްރެޖް ހޫނުމިން އުފުލޭ މިންވަރަށްވުރެ ތިން ގުނަ ބާރަށް އުފުލޭނެ އެވެ.
ކުރިއަށް އޮތް ފަސް އަހަރު ދުވަހުގެ ތެރޭގައި، މާޗް މަހުގެ ތެރޭގައި ބޭރެންޓްސް ސީ، ބެރިންގް ސީ އަދި ސީ އޮފް އޮކޮޓްސްކްގެ އާކްޓިކް ކަނޑުގެ އައިސް ވިރޭނެ ކަމަށް ލަފާކުރެވެ އެވެ.
އާކްޓިކް ސަރަހައްދު ހޫނުވުމުގެ ސަބަބުން މޫސުމީ ނިޒާމުތަކަށް ބުރޫއަރައި، ދުނިޔޭގެ އުތުރުގެ ގައުމުތަކަށް މޫސުމީ ނުރައްކާތެރި ހާދިސާތައް ކުރިމަތިވުމުގެ ފުރުސަތު ބޮޑުވާނެ ކަމަށް ވެސް ސީބްރޫކް ވިދާޅުވި އެވެ.
އެގޮތުން އެ ގައުމުތަކަށް ވާރޭވެހޭ މިންވަރު އިތުރުވާނެ ކަމަށް ލަފާކުރެވެ އެވެ. އަދި މެއި މަހުން ސެޕްޓެމްބަރު މަހުގެ ނިޔަލަށް ޔޫރަޕްގެ އުތުރު ސަރަހައްދުތަކާއި، އެލަސްކާ، ސައިބީރިއާ އަދި ސަހޭލް ސަރަހައްދަށް ވާރޭވެހުން އިތުރުވާނެ ކަމަށް ބެލެވޭއިރު، އެމެޒޯން ސަރަހައްދަށް މި ދުވަސްވަރު އާދަޔާ ހިލާފަށް ހޫނުގަދަވެ، ހަނަފަސްކަން ކުރިމަތިވާނެ ކަމަށް ވަނީ ލަފާކޮށްފަ އެވެ.
