ޖާސޫސްކުރަން ބޭނުންކުރާ ޕެގަސޫސް ސްޕައިވެއާ އުފައްދާ އިޒްރޭލުގެ ކުންފުނި އެމެރިކާ އިން ބްލެކްލިސްޓުކޮށްފައިވާ ކުންފުނިތަކުގެ ތެރޭގައި ހިމަނައިފި އެވެ.
އެންއެސްއޯ ގްރޫޕާ މެދު ޝަކުވާ ބޮޑުވީ އެތައް ހާސް އެކްޓިވިސްޓުންނާއި ނޫސްވެރިންނާއި ވިޔަފާރިވެރިންނާއި ސިޔާސީ ފަރާތްތަކަށް އަމާޒުކޮށް ޖާސޫސްކުރިކަން ފަޅާއެރުމުންނެވެ.
ޕެގަސޫސް ސްޕައިވެއާގެ އަސަރުކުރާ ސްމާޓްފޯނުތައް ބަދަލުވަނީ އެންއެސްއޯ ގްރޫޕުގެ ކްލަޔަންޓުންނަށް ފަސޭހައިން ޖާސޫސްކުރެވޭނެ ވަސީލަތަކަށެވެ. އެގޮތުން ފީނުގައި ހުންނަ މެސެޖާއި، ފޮޓޯތައް ބަލައި، ލޮކޭޝަން ޓްރެކްކޮށް، ފޯނުގެ ވެރިފަރާތަށް ނޭނގި ކެމެރާ ވެސް ޖެއްސެ އެވެ.
"މި ކަންކަމާ ހެދި ބޭރުގެ ސަރުކާރުތަކުން އިންސާނީ ހައްގުތަކަށް އަރައިގަނެ، ހުދުމުހުތާރު އަމަލުތައް ހިންގަން ނޫސްވެރިންނާއި އެކްޓިވިސްޓުންނަށް އަމާޒުކޮށް އިދިކޮޅު ފިކުރު ކަނޑުވާލި،" އެމެރިކާގެ ކޮމާސް ޑިޕާޓްމަންޓުން ބުންޏެވެ.
އެންއެސްއޯ ގްރޫޕުގެ އިތުރުން އިޒްރޭލުގެ ކަންޑިރޫ ކުންފުންޏާއި، ސިމްގަޕޫރުގެ ކޮމްޕިއުޓާ ސެކިއުރިޓީ އިނީޝިއޭޓިވް ކޮންޒަލްޓެންސީ ޕީޓީއީ (ކޮސެއިންކް) އަދި ރަޝިއާގެ ޕޮޒިޓިވް ޓެކްނޮލޮޖީޒް އަށް ވެސް އެ ތުހުމަތުތައްކޮށް އެމެރިކާ އިން ވަނީ ބްލެކްލިސްޓުކޮށްފަ އެވެ.
"އެންޓިޓީ ލިސްޓު"ގައި އެ ކުންފުނިތައް ހިމެނުމުން އެމެރިކާގެ އެއްވެސް ކުންފުންޏަކުން އެ ކުންފުނިތަކަށް އެއްވެސް މުދަލެއް އަދި ހިދުމަތެއް ދިނުން މަނާވާނެ އެވެ. އެގޮތުން އެމެރިކާގެ ދިރާސާކުރާ ފަރާތްތަކަށް އެ މީހުންނަށް މައުލޫމާތާއި ޓެކްނޮލޮޖީ ވިއްކުން މަނާވާނެ އެވެ.
އެ ނިންމުމަށް ފާޑުކިޔުމަށް ފަހު އެންއެސްއޯ ގްރޫޕުން ބުނީ އެ މީހުންގެ ޓެކްނޮލޮޖީއަކީ "އެމެރިކާގެ ސަލާމަތީ މަސްލަހަތާއި ސިޔާސަތުތައް ރައްކާތެރިކޮށްދޭ" ވަސީލަތެއް ކަމަށެވެ.
"މި ނިންމުން ބަދަލުކުރަން އަޅުގަނޑުމެން މަސައްކަތް ކުރާނަން،" އެންއެސްއޯ ގްރޫޕުގެ ތަރުޖަމާނަކު ބުންޏެވެ.
އެ ކުންފުނިން އިތުރަށް ބުނީ އެ މީހުންގެ ޓެކްނޮލޮޖީ ބޭނުން ކުރާ ގޮތް ހަރުދަނާ ކުރުމަށް އެޅި ފިޔަވަޅުތަކުގެ ތެރެއިން "ޕްރޮޑަކްޓްގެ ބޭނުން ނާޖައިޒު ގޮތުގައި ހިފި ކްލަޔަންޓުންގެ އެއްބަސްވުން އުވާލާފައި" ކަމަށެވެ.
