ޓޫރިސްޓުންގެ މެދުގައި މަގުބޫލު މާފުށީގައި ދީނާ ހިލާފު ކަންކަން ކުރުމާއި އެހެން ދީންތަކުގެ ދުވަސްތައް ފާހަގަކުރާ މައްސަލައިގައި އާންމުން ޝަކުވާކުރާތީ އެފަދަ ކަންކަން ކުރާ ވިޔަފާރިތަކާ ދެކޮޅަށް ފިޔަވަޅުއަޅާނެ ކަމުގެ އިންޒާރު މާފުށި ކައުންސިލުން މިއަދު ދީފި އެވެ.
މި މައްސަލައިގައި މާފުށި ކައުންސިލުން ނެރުނު އިއުލާނުގައި ބުނީ ކައުންސިލުން ވިޔަފާރީގެ ބޭނުންތަކަށް ދޫކޮށްފައި ހުންނަ ބިންތަކުގައި މިފަދަ ކަންކަން ކުރާ ކަމުގެ ޝަކުވާތައް އާންމުންގެ ފަރާތުން ލިބެމުން އަންނަ ކަމަށެވެ. އަދި ބައެއް ފަހަރު އެ ބިންތަކާ ކައިރީގައި އޮންނަ މަގުތައް ހުއްދަ ނެތި ބަންދުކޮށްގެން މިފަދަ ކަންކަން ކުރާ ކަމަށް ވެސް ބުންޏެވެ.
މާފުށި ކައުންސިލުގެ ބަޔާނުގައި ފާހަގަކުރި މައްސަލަތައް
އިސްލާމީ އަހުލާގުން ބޭރުން ވިޔަފާރި ބިންތަކުގައި އަމަލުކުރުން
- ނަމާދު ގަޑިތަކާއި މެންދަމު 12 ގެ ފަހުން އަޑުގަދަކޮށް ބާރަށް ލަވަ ޖެހުން
- ކައުންސިލުގެ ހުއްދަ ނެތި މަގުތައް ބަންދުކޮށްގެން ގާނޫނުތަކާއި ގަވާއިދުތަކާ ހިލާފަށް ޣައިރު މުސްލިމުން ފާހަގަކުރާ ދުވަސްތައް ފާހަގަކުރުން
ކައުންސިލުގެ އިއުލާނާ ގުޅިގެން މާފުށީ ކައުންސިލުގެ ރައީސް ހަސެން ސޮލާހު "އަދަދު"އަށް ވިދާޅުވީ، މިކަން އާންމުކޮށް އަންގާ އިއުލާނުކުރީ އާންމުންގެ ފަރާތުން މިކަންކަމުގެ ޝަކުވާތައް ތަކުރާރުކޮށް ލިބެމުން އަންނާތީ ކަމަށެވެ. އަދި ވިދާޅުވީ ބަޔާން ނެރުނީ މިކަންކަން ތަކުރާރު ނުކުރަން ނަސޭހަތްތެރިވުމުގެ ގޮތުން ކަމަށެވެ.
"އާންމުންގެ ފަރާތުން އެބަހުރި އާންމުންނަށް ފެންނަ ތަންތަނުގައި ކުރު ހެދުން ލައިގެން ނެށުމާއި، ދީނީ މިންގަނޑުން ބޭރު ކަންކަން ކުރާ ކަމަށް," ސޮލާހު ވިދާޅުވި އެވެ.
ސޮލާހު އިތުރަށް ވިދާޅުވީ، ކައުންސިލުން ކުއްޔަށް ނަގާފައިވާ ބިމެއްގައި މިފަދަ އެއްވެސް ކަމެއް ކުރާނަމަ ފިޔަވަޅު އަޅަން ފަސްނުޖެހޭނެ ކަމަށެވެ. އަދި އެއްބަސްވުންތައް ބާތިލުކުރަން ކައުންސިލަށް ލިބޭ އިހްތިޔާރުގެ ބޭނުން ހިފަން ތައްޔާރަށް އޮތް ކަމަށް އޭނާ ވިދާޅުވި އެވެ.
"އެއްބަސްވުން ބާތިލުކުރަން ތައްޔާރަށް މިތިބީ. އެކަމަކު މިހާތަނަށް ވެސް ގިނަ ގެސްޓުހައުސްތަކުގެ އެއްބާރުލުން ލިބުނު. މިފަހަރު ވެސް ލިބޭނެ ކަމަށް އުއްމީދުކުރަނީ" ސޮލާހު ވިދާޅުވި އެވެ.
ކައުންސިލުން ނެރުނު ބަޔާނުގައި ވެސް ވަނީ އެއްބަސްވި ގޮތާ ހިލާފަށް ބިންތަކުގައި ކުރިއަށްގެންދާ ހަރަކާތްތައް ހުއްޓާލުމަށާއި، ބިން ދޫކޮށްފައިވާ ބޭނުމެއްގައި ބިން ބޭނުންކުރުމުގެ ކުރިން ލިޔުމުން ކައުންސިލުގެ ހުއްދަ ހޯދަން އަންގާފަ އެވެ. އަދި އެ ނޫން ގޮތަކަށް އެއްވެސް ބިމެއް ބޭނުން ކުރާނަމަ އެއްބަސްވުން ބާތިލުކުރާނެ ކަމަށް ބުންޏެވެ.
މާފުށި ގެސްޓްހައުސްއެއްގައި ހެލޮވީން ފާހަގަކުރަން ބަހައްޓާފައި ހުރި ޑެކަރޭޝަނެއް. -- ފޮޓޯ: ޔޫޓިއުބް
މާފުށިން މައުލޫމާތު ދިން މީހަކު ނަން ނުޖަހަން ޝަރުތުކޮށް މި ނޫހަށް ބުނީ އެ ރަށު ބައެއް ގެސްޓްހައުސްތަކުން މިކަންކަން ތަކުރާރުކުރަމުން އަންނަ ކަމަށެވެ. އަދި މިފަހުން ވެސް ނަސާރާ ދީނުގައި ފާހަގަކުރާ ދުވަހެއް ކަމުގައިވާ "ހެލޮވީން" އެ ރަށު ބައެއް ގެސްޓްހައުސްތަކުގައި ފާހަގަކުރި ކަމަށެވެ.
"އިހަށް ދުވަހު މިކޮޅުގެ ބައެއް ގެސްޓްހައުސްތަކުން ހެލޮވީން ބެނާ ދަމައިގެން ބޮޑެތި ޑިނާ ބޭއްވި." އޭނާ ބުންޏެވެ.
މާފުއްޓަކީ ލޯކަލް ޓޫރިޒަމް ރަށްތަކުގެ ތެރެއިން ޓޫރިސްޓުންގެ މެދުގައި އެންމެ މަގުބޫލު އެއް ރަށެވެ. މާލެ ނަގާފައި މި އަތޮޅުގެ އެންމެ ގިނަ އަދަދެއްގެ ގެސްޓުހައުސްތަކާއި ހޮޓާތައް ވެސް ހުންނަނީ މާފުށީ ގަ އެވެ.
