ރާއްޖޭގައި އިސްލާމީ ފަތުވާދޭ އެންމެ މަތީ މަޖިލިސް ކަމުގައިވާ ސުޕްރީމް ކައުންސިލް ފޯ ފަތުވާ ގެ ރަސްމީ ވެބްސައިޓް މިއަދު ލޯންޗުކޮށްފި އެވެ.
ފަތުވާ މަޖިލީހުގެ ރަސްމީ ވެބްސައިޓް ލޯންޗުކުރީ މިއަދު އިސްލާމީ މަރުކަޒުގެ ހޯލުގައި މިއަދު ބޭއްވި ރަސްމިއްޔާތެއްގައި މިނިސްޓަރު އޮފް އިސްލާމިކް އެފެއާޒް ޑރ. އަހުމަދު ޒާހިރު އަލީ އެވެ.
އެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވަނީ ދީނީ ކަންކަމުގެ މައުލޫމާތު ރައްޔިތުންނަށް ފޯރުކޮށްދިނުމުގައި ފަތުވާ މަޖިލިސް ފަދަ އިދާރާތަކުގެ ވެބްސައިޓެއް އޮތުމުގެ މުހިންމުކަން ފާހަގަކުރައްވާފަ އެވެ.
މިނިސްޓަރު ވަނީ އާންމު ފަރާތްތަކަށް ފަސޭހައިން ހިދުމަތް ހޯދޭނެ އިންތިޒާމެއް ވެބްސައިޓް މެދުވެރިކޮށް ހަމަޖެއްސުމަށް އިސްލާމީ ފަތުވާދޭ އެންމެ މަތީ މަޖިލީހުގެ މުވައްޒަފުންގެ ކިބައިން ވެސް މިއަދު އެދިވަޑައިގެންފަ އެވެ.
ފަތުވާ މަޖިލީހުން މިއަދު ލޯންޗު ކުރި އާ ވެބްސައިޓަކީ އެ މަޖިލީހުން އާންމުކުރާ ފަތުވާތަކާއި އިސްތިޝާރީ ލަފާތަކާއި، ފޯރުކޮށްދޭ ހިދުމަތްތައް އާންމުނަށް ގެނެސް ދިނުމަށް ލޯންޗު ކުރި ވެބްސައިޓެއްކަމަށް އެ މަޖިލީހުން ބުނެ އެވެ.
އެ މައުލޫމާތުގެ އިތުރުން އެ ވެބްސައިޓު މެދުވެރިކޮށް ފަތުވާ މަޖިލީހުގެ އެންމެ ފަހުގެ މައުލޫމާތާއި ފޮޓޯއާއި، އަދި ޝާއިއުކޮށްފައިވާ ފޮތްތައް ވެސް އާންމުންނަށް ލިބެން ހުންނާނެކަމަށް ފަތުވަ މަޖިލީހުން ބުނެ އެވެ.
ފަތުވާ މަޖިލީހަކީ 2016 ވަނަ އަހަރު ވުޖޫދަށް އައި ރާއްޖޭގައި ދީނީ ގޮތުން ހިޔާލު ތަފާތުވުން އުފެދޭ ކަންކަމުގައި، ސަރުކާރަށާއި އާންމުންނަށް ބޭނުންވާނެ އެކިއެކި ދީނީ ފަތުވާ ފޯރުކޮށްދިނުމަށާއި، ފިގުހީ އާ މައްސަލަތަކުގެ ދިރާސާކޮށް، އެކަންކަމާ ގުޅޭ ދީނީ ލަފާޔާއި އިރުޝާދު ފޯރުކޮށްދިނުމަށްޓަކައި ތައާރަފްކުރެވުނު ދީނީ ކަންކަމުގައި ލަފާ އަރުވާ އެންމެ މަތީ މަޖިލީހެވެ.
ފަތުވަ މަޖިލީހުގައި މިވަގުތު ތިއްބަވަނީ ތިން މެމްބަރުންނެވެ. އެއީ މަޖިލީހުގެ ރައީސް އަދި ކުރީގެ އުއްތަމަފަނޑިޔާރު ޑރ. މުހައްމަދު ރަޝީދު އިބްރާހިމް، ޑރ. މޫސާ އަންވަރު ހަސަން އަދި އަލްއުސްތާޒް އިސްހާގު މުޙައްމަދުފުޅު އެވެ. މަޖިލީހުގައި ކުރިން ތިއްބެވި މެމްބަރުންގެ ތެރެއިން އައްޝެއިހް އިބްރާހިމް އަހުމަދު، އައްޝެއިހް ހަސަން ތައުފީގު، އައްޝެއިހު އާދަމް ޝަމީމް ބިން އިބްރާހިމް ހިމެނިވަޑައިގަންނަވަ އެވެ.
