އިރާނާ ގުޅުން ހުރި ކަމަށް ބެލެވޭ ހެކަރުންތަކެއް އިޒްރޭލުގެ އިންޓަނެޓް ކުންފުންޏަކަށް ހަމަލާދީ ގިނަ ސައިޓުތަކަށް ނުވަދެވޭ ގޮތް ހަދައިފި އެވެ.
ސައިބަހަމަލާގެ އަސަރު ކުރި ވެބްސައިޓުތަކުގެ ތެރޭގައި އިޒްރޭލުގެ އާއްމު ދަތުރުފަތުރަޢް ހާއްސަ ކުންފުނިތައް ކަމަށްވާ ޑޭން އަދި ކަވިމްގެ ވެބްސައިޓް ހިމެނެ އެވެ. އޭގެ އިތުރުން ކުޑަކުދިންގެ މިއުޒަމަކާއި ޕަބްލިކް ރޭޑިއޯގެ އޮންލައިން ބްލޮގް ވެސް ވަނީ ބްލޮކްކޮށްފަ އެވެ.
ބްލެކްޝެޑޯގެ ނަމުން ހަރަކާތްތެރިވާ ހެކަރުންގެ ގްރޫޕުން ހަމަލާގެ ޒިންމާ އުފުލުމަށް ފަހު ވަނީ އިންޓަނެޓް ކުންފުނީގެ ހިދުމަތް ހޯދާ ކްލަޔަންޓުންގެ މައުލޫމާތުތައް ލީކުކޮށްފަ އެވެ.
ޓެލެގްރާމް މެދުވެރިކޮށް ލީކުކުރި މައުލޫމާތުގައި ހިމެނެނީ ކަވިމް އިންޓަނެޓް ކުންފުނީގެ ކްލަޔަންޓުންގެ ނަންތަކާއި، އީމެއިލް އެޑްރެހާއި ފޯނު ނަންބަރުތަކެވެ.
އިޒްރޭލުގެ މީޑިއާ އިން ބުނީ ބްލެކްޝެޑޯ އަކީ އިރާނުގެ ހެކަރުންގެ ގްރޫޕެއް ކަމަށާއި އެއީ އެކި ސައިބަ ކުށްތައް ކުރުމުގައި ހަރަކާތްތެރިވާ ބަޔެއް ކަމަށެވެ.
މިދިޔަ ޑިސެމްބަރު މަހު އެ ގްރޫޕުން ވަނީ އިޒްރޭލުގެ ޝިރްބިތް އިންޝުއަރެންސް ކުންފުންޏަށް ހަމަލާދީ ގިނަ މައުލޫމާތުތަކެއް ވަގަށް ނަގާފަ އެވެ.
އެ ކުންފުނިން އެއް މިލިއަން ޑޮލަރު ދޭން ޑިމާންޑު ކުރުމަށް ފަހު، ފައިސާ ނުދިނުމުން ހެކަރުން ވަނީ މައުލޫމާތު ލީކުކޮށްފަ އެވެ.
އިޒްރޭލަށް އަމާޒުކޮށް ސައިބަހަމަލާ ދީފައި ވާއިރު، މިދިޔަ ހަފުތާގައި އިރާނުގެ ޕެޓްރޯލް ޑިސްޓްރިބިއުޓް ކުރާ ނިޒާމަށް ވެސް ސައިބަ ހަމަލާއެއް ދިނެވެ. އެ ހަމަލާ ދިނީ ކޮން ބަޔެއް ކަމެއް އަދި ނޭނގެ އެވެ.
