2022ގެ ބަޖެޓުގެ އަމާޒަކީ ކޮވިޑުން އަރައިގަނެވޭ ދުވެލި އިތުރަށް ހަލުއިކުރުން

އަންނަ އަހަރުގެ ދައުލަތުގެ ބަޖެޓު ބަޔާން ފިނޭންސް މިނިސްޓަރު އިބްރާހިމް އަމީރު މިއަދު މަޖިލީހަށް ދެއްވަނީ. -- ފޮޓޯ: މަޖިލިސް

އަންނަ އަހަރުގެ ދައުލަތުގެ ބަޖެޓު ބަޔާން ފިނޭންސް މިނިސްޓަރު އިބްރާހިމް އަމީރު މިއަދު މަޖިލީހަށް ދެއްވަނީ. -- ފޮޓޯ: މަޖިލިސް

އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ދައުލަތުގެ ބަޖެޓުގެ މައިގަނޑު އަމާޒަކީ ކޮވިޑުގެ އަޑިގަނޑުން އަރައިގަނެ، ރައްޔިތުންނަށް އެންމެ ބޭނުންވެފައިވާ ކަންކަން ހާސިލުކޮށްދިނުން ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.

އަންނަ އަހަރަށް ލަފާކުރާ ބަޖެޓު ރައްޔިތުންގެ މަޖިލީހަށް ހުށަހަޅައި ދެއްވަމުން އަމީރު ވިދާޅުވީ ކޮވިޑުގެ ބަލިމަޑުކަމުގެ ސަބަބުން ރާއްޖޭގެ އިގުތިސާދުގެ ސައިޒު ކުޑަވެ، ދައުލަތަށް ލިބޭނެ ކަމަށް ލަފާކުރާ އާމްދަނީގެ ތެރެއިން ގާތްގަނޑަކަށް 36 ބިލިއަން ރުފިޔާ ގެއްލިގެންދިޔަ ކަމަށެވެ.

ކޮވިޑްގެ ބަލިމަޑުކަމުގައި ޓޫރިޒަމް ހުއްޓިގެން ދިޔުމާއެކު އިތުރަށް ދަރަނި ނަގައިގެން، ރައްޔިތުންނަށާއި ވިޔަފާރިތަކަށް ސަރުކާރުން އެހީތެރިކަން ފޯރުކޮށްދިނުން ފަދަ އުނދަގޫ ނިންމުންތަކުގެ ހެޔޮ ނަތީޖާ މިހާރު ފެންނަމުންދާ ކަމަށް މިނިސްޓަރު ވިދާޅުވި އެވެ.

Advertisement

"މި އަހަރު ދުނިޔޭގެ އެންމެ ބާރަށް ކުރިއަރަމުންދާ ފަސް އިގުތިސޯދުގެ ތެރޭގައި ރާއްޖެ ހިމެނޭ،" މިއަހަރު އެއް މިލިއަން ޓޫރިސްޓުންގެ ޓާގެޓު ހުރަސްކުރިކަން ފާހަގަކުރައްވައި އަމީރު ވިދާޅުވި އެވެ.

އަންނަ އަހަރަށް ލަފާކުރާ 36.9 ބިލިއަން ރުފިޔާގެ ބަޖެޓު އަމާޒަކީ މިނިސްޓަރު ވިދާޅުވި ގޮތުގައި ކޮވިޑުގެ ގެއްލުންތަކުން އަރައިގަނެ، އިގުތިސާދީ ކުރިއެރުން މަތިކޮށް، ފުޅާކޮށްދޭނެ ބަޖެޓެކެވެ.

2022 ވަނަ އަހަރުގެ ބަޖެޓަކީ ކޮވިޑުގެ ހާލަތުގައި ރައްޔިތުންނާއި ވިޔަފާރިތަކުން ދެއްކި ނަމޫނާއިން ހިތްވަރު ލިބިގަނެ، ރައްޔިތުންގެ އުންމީދުތައް ހާސިލުކުރުމަށް ސަރުކާރުންވީ ވައުދުތައް ފުއްދައި ރައްޔިތުންނަށް ފާގަތި ދިރިއުޅުމެއް ހޯދައިދޭނެ ބަޖެޓެއް - ފިނޭންސް މިނިސްޓަރު

ސިއްހީ ދާއިރާއަށް ބޮޑު އިސްކަމެއް

އަންނަ އަހަރަށް ހުށަހަޅާ ބަޖެޓުގެ ތެރެއިން ހަރަދުގެ ގޮތުގައި 34 ބިލިއަން ރުފިޔާ ހިނގާނެ ކަމަށް ބެލެވޭއިރު، ބަޖެޓާއި ހަރަދާ ދެމެދު ހުރި ތަފާތުގެ ބޮޑު ބައެއް ހިއްސާކުރަނީ، ދައުލަތުގެ ދަރަނި އަދާކުރުމަށް ދައްކާ 2.9 ބިލިއަން ރުފިޔާ ކަމަށް އަމީރު ފާހަގަކުރެއްވި އެވެ.

ބަޖެޓުގައި ހިމެނޭ މުހިންމު ބައެއް ބައިތައް ތަފްސީލުކޮށް ދެއްވަމުން، މިނިސްޓަރު ވިދާޅުވީ އަންނަ އަހަރުގެ ބަޖެޓުގައި ސިއްހީ ދާއިރާގެ ތެރެއިން ކޮވިޑާ ދެކޮޅަށް ކުރާ މަސައްކަތްތައް މެދުކެނޑުމެއް ނެތި ކުރިއަށް ގެންދަން ރޭވިފައިވާ ކަމަށެވެ.

މިގޮތުން ހަގު އުމުރުފުރާތަކުގެ ކުދިންނަށް ވެކްސިން ދެވޭނެ މަގު ފަހިވެގެންދިޔަހާ އަވަހަކަށް އެ ކުދިންނަށް ވެސް ބޭނުންވާނެ ވެކްސިން ހޯދުމަށާއި، ކޮވިޑް ފެސިލިޓީތަކުގެ ހިދުމަތް މެދުކެނޑުމެއް ނެތި، މިހާރަށްވުރެ ރަނގަޅު ފެންވަރުގައި ކުރިއަށް ގެންދަން ރާވާފައިވާނެ ކަމަށް އޭނާ ވިދާޅުވި އެވެ.

ސިއްހީ ދާއިރާއަށް ތަރައްގީ ކުރުމަށް ރާއްޖޭގެ ފަސް ސަރަހައްދެއްގައި ގާއިމުކޮށްފައިވާ ޓާޝަރީ ހޮސްޕިޓަލުތަކުގެ ވަސީލަތްތައް އިތުރުކޮށް، އެ ތަންތަނަކީ އަމިއްލައަށް ހިންގާ ހޮސްޕިޓަލްތަކަކަށް ބަދަލުކުރުމުގެ މަސައްކަތް ފެށިފައިވާ ކަމަށް ވެސް ވިދާޅުވި އެވެ.

"މީގެ ސަބަބުން ސިއްހީ ހިދުމަތް ލާމަރުކަޒުވެ، ހިދުމަތްތައް އަވަސްވެ، ކުރިއަރާ ދިއުމަށް މަގުފަހިވާނެ،" ސިއްހީ ހިދުމަތް ރާއްޖޭގެ އެކި ސަރަހައްދުތަކަށް ފުޅާކޮށް، ލާމަރުކަޒުކުރުމުގެ މުހިންމުކަން ފާހަގަ ކުރައްވަމުން، އަމީރު ވިދާޅުވި އެވެ.

ފަސްދޮޅަސް ރަށެއްގެ ހޮސްޕިޓަލުތަކާއި ސިއްހީ މަރުކަޒުތައް އަޕްގްރޭޑް ކުރުމަށް ބަޖެޓުގައި ހިމެނިފައިވާކަން ފާހަގަކުރައްވަމުން އަމީރު އިތުރަށް ވިދާޅުވީ ސިއްހީ ހިދުމަތްތެރިން މަދުވުމުގެ މައްސަލަ ހައްލުކުރަން ވެސް ބަޖެޓުގައި ޖާގަ ދީފައިވާނެ ކަމަށެވެ.

ސިއްހީ ދާއިރާއަށް ކަނޑައެޅިފައިވާ ޖުމްލަ 4.6 ބިލިއަން ރުފިޔާގެ ތެރޭގައި 160 ޑޮކްޓަރުންނާއި 200 އަށްވުރެ ގިނަ ނަރުހުން ހޯދުން ހިމެނެ އެވެ.

އަންނަ އަހަރު އާސަންދަ ސްކީމަށް 731 މިލިއަން ރުފިޔާ ބަޖެޓު ކޮށްފައިވާއިރު، މި ސްކީމުން ވަމުންދާ އިސްރާފު ކުޑަކުރަން ފިޔަވަޅުތަކެއް އަޅަން ނިންމާފައިވާ ކަމަށް އަމީރު ހާމަކުރެއްވެވި އެވެ. އާސަންދައިގެ ބޮޑު ހަރަދެއް ބޭހަށް ހޭދަވެގެން ދާއިރު، ޑޮކްޓަރީ ބޭސް ވިއްކޭނެ އެންމެ މަތީ އަގު އަންނަ އަހަރު ކަނޑައަޅައި، ބޭހުގެ ވިޔަފާރިން އެކަށީގެންނުވާ މަތީ މިންވަރުތަކުން ފައިދާ ނެގުމަށް ހުޅުވިފައި ހުރި ދޮރުތައް ބަންދުކުރެވޭނެ ކަމަށް އަމީރު ވިދާޅުވި އެވެ.

titledesc

އާމްދަނީގެ އަންދާޒާ އަދި ޑެފިސިޓް

މި އަހަރުގެ ތެރޭގައި އިގުތިސޯދު ކުރިއަރަން ފަށައި، އަންނަމުންދާ ހެޔޮ ބަދަލުތަކުގެ އަސަރު ދައުލަތުގެ އާމްދަނީއަށް ކުރާނެ ކަމަށް އަމީރު ވިދާޅުވި އެވެ.

އަންނަ އަހަރު ޖުމުލަ އާމްދަނީ އާއި ހިލޭ އެހީގެ ގޮތުގައި ދައުލަތަށް 24.3 ބިލިއަން ރުފިޔާ ލިބޭނެ ކަމަށް އަންދާޒާކުރެވޭއިރު، މިއީ މި އަހަރުގެ ނިޔަލަށް ދައުލަތަށް ލިބޭނެ ކަމަށް މިހާރު ލަފާކުރެވޭ އާމްދަނީއަށް ވުރެ 23 ޕަސަންޓުގެ އިތުރު ވުމެއް ކަމަށް އަމީރު ފާހަކުރެއްވި އެވެ.

ޓެކުހުގެ ގޮތުގައި 15.4 ބިލިއަން ރުފިޔާ ލިބޭނެ ކަމަށް އަންދާޒާކުރެވޭއިރު، ޓެކްސް ނޫން އެހެން ގޮތްގޮތުން 6 ބިލިއަން ރުފިޔާ އަދި ހިލޭ އެހީގެ ގޮތުގައި 2.9 ބިލިއަން ރުފިޔާ ލިބޭނެކަމަށް އަންދާޒާކުރެވޭ ކަމަށެވެ. .

މިނިސްޓަރު އިތުރަށް ވިދާޅުވީ އަންނަ އަހަރަށް ހުށަހަޅާފައިވަނީ 9.7 ބިލިއަން ރުފިޔާގެ ޑެފިސިޓް ބަޖެޓެއް ނަމަވެސް، ބަޖެޓު ފައިނޭންސް ކުރުމަށް ޖުމްލަ 13.4 ބިލިއަން ރުފިޔާ ހޯދަންޖެހޭ ކަމަށެވެ.

އޭގެ ތެރޭގައި ހިމެނެނީ ބަޖެޓު ޑެފިސިޓްގެ އަދަދުގެ އިތުރުން، ލޯނު އަނބުރާ ދެއްކުމަށް ބޭނުންވާ 2.9 ބިލިއަން ރުފިޔާ އާއި، ސޮވްރިން ޑިވެލޮޕްމަންޓް ފަންޑަށް ޖަމާކުރާ 769.2 މިލިއަން ރުފިޔާ، އަދި އެހެނިހެން ގޮތްގޮތުން ފައިނޭންސްކުރަންޖެހޭ 35.7 މިލިއަން ރުފިޔާ އެވެ.

ބަޖެޓު ފައިނޭންސިންގެ ތެރެއިން 7.5 ބިލިއަން ރުފިޔާ ބޭރުގެ ފަރާތްތަކުން ހޯދުމަށް ރާވައިފައި ވާއިރު، އެތެރޭގެ ފަރާތްތަކުން 5.9 ބިލިއަން ރުފިޔާ ހޯދުމަށް ރޭވިފައިވާކަމަށް އަމީރު ހާމަކުރެއްވި އެވެ.

"...ރާއްޖެއިން ބޭރުގެ ފަރާތްތަކުން ލިބޭނެ ކަމަށް އަންދާޒާކުރާ ފައިނޭންސިންގ އަށް ބަލާއިރު، 200 މިލިއަން ޑޮލަރުގެ ޓްރެރަރީ ސެކިއުރިޓީއެއް ބޭރުގެ މާލީ ބާޒާރުގައި ވިއްކުމަށްވަނީ ރާވާފައި،" އޭނާ ވިދާޅުވި އެވެ.

އަންނަ އަހަރަށް ތައްޔާރުކޮށްފައި ވާނީ ޕްރޮގްރާމް ބަޖެޓެއް ކަން ފާހަގަ ކުރައްވައި އަމީރު ވިދާޅުވީ، މި މަސައްކަތުގެ ދެވަނަ ފިޔަވަހީގައި ޕްރޮގްރާމްތަކުގެ ކީ ޕާފޯމަންސް އިންޑިކޭޓާޒް ކަނޑައެޅިގެންދާނެ ކަމަށެވެ.

މި ބަދަލުގެ ސަބަބުން ބަޖެޓުން ކުރާ ހޭދައިގެ ނަތީޖާ އެނގި، ދައުލަތުގެ ހިދުމަތްތަކުގެ ފެންވަރު ރަނގަޅުކުރެވި، ހިންގުން ހަރުދަނާ ވެގެންދާނެ ކަމަށް އަމީރު ވިދާޅުވި އެވެ.

އޭނާ ވިދާޅުވި ގޮތުގައި މި ފަހަރުގެ ބަޖެޓަކީ ސަރުކާރުގެ އެންމެ މުހިންމު އަމާޒުތަކާއި، ސަރުކާރުގެ ވައުދުތައް ފުރިހަމަކުރުމަށާއި، ރައްޔިތުންނަށް ދޭ ހިދުމަތްތައް އެފިޝަންޓްކޮށް ފެންވަރު ރަނގަޅުކުރުމަށް ސިޔާސަތު ރޭވިފައިވާ ބަޖެޓެކެވެ.

އަދި މާލީ ހާލަތު ތަންދިން އެންމެ ބޮޑަކަށް އިގުތިސޯދީ އަމާޒުތަކާއި ރައްޔިތުން ބޭނުންވާ ކަންކަމުގެ އިތުރުން ސަރުކާރުން ރައްޔިތުންނަށް ވީ ވައުދުތައް ފުއްދުމަށް މި ބަޖެޓުގައި އިސްކަން ދީފައިވާނެ ކަމަށް އަމީރު ވިދާޅުވި އެވެ.

"ރާއްޖޭގެ އިގުތިސޯދީ އަދި މާލީ ހާލަތު، ކޮވިޑުގެ އަޑިގަނޑުން އަރައިގަނެ، އަލުން ހަލުވިކަމާއެކު ކުރިއަށް ދިއުމަށް މަގުފަހިކުރުމަށް ސިޔާސަތު ތަރުތީބު ކުރެވިފައިވާނެ،" ހުށަހަޅާފައިވާ ބަޖެޓު ފާސްކޮށް ދިނުމަށް މަޖިލިސް މެމްބަރުންގެ ކިބައިން އެދިވަޑައިގަންނަވަމުން އަމީރު ވިދާޅުވި އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox