ގަލޮޅު މަދަރުސާގައި ކިޔަވަމުންދިޔަ ޕްރީ ސްކޫލްގެ ދަރިވަރަކަށް އެތަނުގައި މަސައްކަތް ކުރާ މަސައްކަތު މީހަކު ޖިންސީ އަނިޔާ ކުރި މައްސަލައިގައި އެ ސްކޫލުގެ ހުރިހާ މަސައްކަތު މުވައްޒަފުން ސަސްޕެންޑުކޮށްފި އެވެ.
ސްކޫލު ސާފު ކުރުމާއި ދަރިވަރުން ފާހާނައަށް ދިޔުމަށް އެހީވުމުގެ ޒިންމާ އޮންނަ މަސައްކަތު މީހަކު ކުއްޖަކަށް ޖިންސީ އަނިޔާ ކުރި މައްސަލަ ފެންމަތިވުމާއެކު އެޑިއުކޭޝަން މިނިސްޓްރީން އަންނަނީ އެ މައްސަލަ ވަރަށް ސީރިއަސްކޮށް ތަހުގީގު ކުރަމުންނެވެ.
އެ މައްސަލައިގައި އާންމުންގެ ނުރުހުން ސްކޫލާއި އެޑިއުކޭޝަން މިނިސްޓްރީއަށް އަމާޒުވެފައި އޮއްވާ ގަލޮޅު މަދަރުސާއިން މިއަދު ނެރުނު ބަޔާނެއްގައި ބުނީ މީގެ ފަހުން "ފާހާނާ ކުރުމަށްދާ ދަރިވަރުން ފާހާނާއަށް ދާނީ ކްލާސް ޓީޗަރުގެ ބެލުމުގެ ދަށުން" ކަމަށެވެ.
"ހުކުރު ދުވަހުން ފެށިގެން މި ސްކޫލުގައި މަސައްކަތް ކުރާ ހުރިހާ މަސައްކަތު މީހުން [ދައްތަމެން] ވާނީ ވަޒީފާގެ މަސްއޫލިއްޔަތުތަކުން އެކަހެރިކުރެވިފަ،" ގަލޮޅު މަދަރުސާއިން ނެރުނު ބަޔާނެއްގައި ބުނެފައިވެ އެވެ.
އެ މައްސަލައިގައި ސްކޫލުގައި މަސައްކަތް ކުރާ ހުރިހާ މަސައްކަތު މީހުން ސަސްޕެންޑު ކުރި ސަބަބު ގަލޮޅު މަދަރުސާއިން ބުނެދީފައެއް ނުވެ އެވެ.
އޭގެ އިތުރުން، ދަރިވަރުންގެ ސަލާމަތަށްޓަކައި ސްކޫލުގެ 18 ދިމާލެއްގައި ސީސީޓީވީ ކެމެރާ މިހާރު ހަރުކޮށް ނިންމާފައިވާ ކަމަށް ވެސް ގަލޮޅު މަދަރުސާއިން ބުނެ އެވެ.
ދަރިވަރަކަށް ޖިންސީ އަނިޔާ ކުރި މައްސަލައިގައި ގަލޮޅު މަދަރުސާއިން ފިޔަވަޅު އަޅާފައި މި ވަނީ އެ މައްސަލަ ހޫނުވެ، އެކަމާ ދެކޮޮޅު ހަދައި، ސަރުކާރު ޒިންމާދާރު ކުރުވުމުގެ ބޭނުމުގައި މިއަދު ހަވީރު އުސްފަސްގަނޑު ސަރަހައްދުގައި އެއްވުމެއް ބޭއްވުމަށް އޮތީ ހަމަޖެހިފަ އެވެ.
