ކޮވިޑް އުފެދުނު ގޮތުގެ ހަގީގަތް ދުވަހަކު ވެސް ނޭނގުން އެކަށީގެންވާ ކަމަށާއި ނަމަވެސް އެއީ ބަޔޮލޮޖިކަލް ހަތިޔާރެއްގެ ގޮތުގައި އުފެއްދި އެއްޗެއް ނޫން ކަމަށް އެމެރިކާގެ ޖާސޫސީ އިދާރާތަކުން ކަނޑައަޅައިފި އެވެ.
ވައިރަސް ފެތުރެން ފެށި ގޮތުގެ އެސެސްމަންޓް އަޕްޑޭޓު ކުރުމަށް ފަހު އޮފީސް އޮފް ދަ ޔޫއެސް ޑިރެކްޓާ އޮފް ނޭޝަނަލް އިންޓެލިޖެންސް (އޯޑީއެންއައި) އިން ބުނީ ވައިރަސް ފެތުރެން ފެށީ ޖަނަވާރުންގެ ގައިން އިންސާނުން ގަޔަށް އަރައިގެން ނުވަތަ ލެބޯޓަރީއަކުން ލީކުވެގެން ކަމަށް ވެސް ވުން އެކަށީގެންވާ ކަމަށެވެ.
ނަމަވެސް ޔަގީންކަމާއެކު ގޮތެއް ނިންމޭ ވަރަށް މައުލޫމާތު ނެތް ކަމަށް ބުންޏެވެ. ޗައިނާ އިން ވަނީ އެ ރިޕޯޓަށް ފާޑުކިޔާފަ އެވެ.
އެ ހޯދުންތައް އާއްމުކޮށްފައި ވަނީ މިދިޔަ އޯގަސްޓު މަހު ނެރުނު ރިޕޯޓެއްގަ އެވެ. އެއީ ކޮވިޑްގެ ހަގީގަތް ހޯދަން 90 ދުވަހުގެ ތަހުގީގެއް ހިންގަން ރައީސް ޖޯ ބައިޑެން އަމުރު ކުރެއްވުމުން ކުރި މަސައްކަތަށް ފަހު ތައްޔާރު ކުރި ރިޕޯޓެކެވެ.
ރިޕޯޓުގައި ބުނީ ވައިރަސް އުފެދުނު ގޮތާ މެދު ޖާސޫސީ އޮފިޝަލުންގެ މެދުގައި ހިޔާލު ތަފާތުވުން އެބަހުރި ކަމަށެވެ. އޭގެ އިތުރުން 2019 ވަނަ އަހަރު ވޫހާން ސިޓީގައި ބަލި ފެތުރެން ފެށުމުގެ ކުރިން މި ވައިރަހާ ގުޅޭ މައުލޫމާތު ޗައިނާ އަށް ލިބިފައި ނުވާ ކަމަށް ވެސް ރިޕޯޓުގައި ވެ އެވެ.
އެހެން ނަމަވެސް، ވައިރަހާ ގުޅޭ ތަހުގީގު ކުރުމަށް ޗައިނާ އިން ހުރަސް އަޅަމުންދާ ކަމަށާއި މައުލޫމާތު ނުދީ ހިފަހައްޓަމުންދާ ކަމަށް ތުހުމަތު ކުރި އެވެ.
ޗައިނާ އިން ބުނެފައި ވަނީ އެންމެ ފުރަތަމަ ފެނުނު ކޮވިޑު ކޭސްތައް ގުޅިފައި ވަނީ ވޫހާނުގައި ހުންނަ ސީފުޑް މާރުކޭޓަކާ ކަމަށެވެ. އެހެންކަމުން މިއީ ޖަނަވާރުންގެ ގައިން އިންސާނުންގެ ގަޔަށް އެރި ވައިރަހެއް ކަމަށް ސައިންސްވެރިން ބުނަން ފެށި އެވެ.
ނަމަވެސް މި އަހަރުގެ ކުރީކޮޅު އެމެރިކާގެ ނޫސްތަކުން ރިޕޯޓު ކުރި ގޮތުގައި މިއީ ވޫހާންގެ ލެބޯޓަރީއަކުން ލީކުވި ވައިރަހެއް ކަމަށް ބެލެވޭ ހެކިތައް ދަނީ ފެންނަމުންނެވެ. ނަމަވެސް ޗައިނާ އިން އެ ވާހަކަތައް ދޮގުކުރެ އެވެ.
އެންމެ ފަހުން އާއްމު ކުރި ރިޕޯޓާ ގުޅިގެން ޗައިނާ އިން ބުނީ އެމެރިކާ އިން އުޅެނީ ސައިންސްވެރިންގެ ވާހަކަތަކަށް ނުބަލައި، ޖާސޫސީ ނަޒަރަކުން ކޮވިޑްގެ މައުލޫމާތު ހޯދަން ކަމަށާއި އެއީ ސިޔާސީ ކުޅިވަރެއް ކަމަށެވެ.
ކޮވިޑްގެ 240 މިލިއަން ކޭސް މިހާތަނަށް ފެނިފައި ވާއިރު، އެ ބަލީގައި 4.9 މިލިއަން މީހުން ވަނީ މަރުވެފަ އެވެ.
