އައިޖީއެމްއެޗުގައި މަސައްކަތް ކުރި ބިދޭސީ ނަރުހެއްގެ ކުއްލި އަދި ހަގީގަތް ނޭނގޭ މަރާއެކު ދިވެހި ފުލުހުން އެ މައްސަލަ ސީރިއަސްކޮށް ތަހުގީގު ކުރަން ފަށައިފި އެވެ.
ފިލިޕީންސްގެ ރައްޔިތެއް ކަމަށްވާ މޭރީ ގްރޭސް ޕިނޭޑާ ވާގަސް މަރުވެފައި ހުއްޓާ ފެނުނީ މިދިޔަ އަންގާރަ ދުވަހެވެ. ފުލުހުންނަށް އެންމެ ފުރަތަމަ ރިޕޯޓްކޮށްފައި ވަނީ އޭނާ ދަންޖެހިގެން މަރުވީ ކަމަށެވެ.
ނަމަވެސް "އެ މައްސަލައިގައި ބަލަންޖެހޭ އިތުރު ކަންކަން ހުރި ކަމަށް ފާހަގަ" ކުރެވޭ ކަމަށް ފުލުހުން މިއަދު ބުންޏެވެ. މި ނޫހަށް އެނގިފައިވާ ގޮތުގައި ގްރޭސް އަށް މީހަކު ހަމަލާދީފައިވާ ކަމަށް ޝައްކު ކުރެވޭ ބައެއް ނިޝާންތައް އޭނާގެ ހަށިގަނޑުން ފުލުހުންނަށް ވަނީ ފާހަގަ ކުރެވިފަ އެވެ.
އައިޖީއެމްއެޗުގެ ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރި ގްރޭސްގެ މަރާ ގުޅިގެން "އަދަދު" އިން ވާހަކަ ދެއްކި ބައެއް މީހުން ބުނެފައި ވަނީ އަންގާރަ ދުވަހު ވެސް އޭނާ ޑިއުޓީއަށް ނިކުތް ކަމަށާއި މަސައްކަތުގައި އެއްވެސް ތަފާތެއް އެ ދުވަހު ފާހަގަ ނުކުރެވޭ ކަމަށެވެ.
ގްރޭސް މަރުވީ މަސައްކަތުން ލިބުނު ހުސް ވަގުތުކޮޅެއްގައި ގެއަށް ދިޔަ ފަހުން ކަމަށްވެ އެވެ. އަދި އުމުރުން ހަތަރު އަހަރުގެ އަންހެން ކުއްޖަކު ވެސް ހުންނަ ގްރޭސްގެ މަރާއެކު ޑރ. އަހުމަދު ރާޒީ މެމޯރިއަލް ޑަޔަލެސިސް ސެންޓަރުގައި މަސައްކަތް ކުރާ މުވައްޒަފުންނަށް ސިހުން ލިބިފައިވާ ކަމަށް މައުލޫމާތު ލިބެ އެވެ.
އައިޖީއެމްއެޗުގައި މަސައްކަތް ކުރާ ހަމަ ފިލިޕީންސްގެ އީއާރު ނަރުހަކާ ކައިވެނިކޮށްގެން އެކުގައި ދިރިއުޅޭ ގްރޭސް ދަންޖެހިގެން އަމިއްލަ މަރުވިކަން ގަބޫލު ކުރަން އޭނާގެ ރަހުމަތްތެރިންނަށް ދަތި ކަމަށް މި ނޫހާ ވާހަކަ ދެއްކި މީހުން ބުންޏެވެ.
ގްރޭސް އޭނާގެ ފިރިމީހާއާ ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ. ގްރޭސް ކުރިން މަސައްކަތްކޮށްފައި ވަނީ ފްރެސިނިއަސް މެޑިކަލް ކެއާގަ އެވެ. އެއީ ޑަޔަލަސިސް ހެދުމާއި ކިޑްނީގެ ބަލިތަކަށް ހާއްސަ ފަރުވާދޭ ސެންޓަރެކެވެ.
