ވޮޝިންޓަން، އެމެރިކާ (އޮކްޓޯބަރު 27) - ހުޅަނގު އައްސޭރީގައި ޔަހޫދީން އާބާދު ކުރާ މައްސަލާގައި އަހަރުތަކަކަށް ފަހު އެމެރިކާ އިން އިޒްރޭލަށް ފާޑުކިޔައިފި އެވެ.
ފަލަސްތީނުގެ ބިމުގައި ޔަހޫދީންނަށް އިތުރު 1،355 ގެ އެޅުމުގެ ހުއްދަ ދޭން އިޒްރޭލް ސަރުކާރުން ދަނީ މަސައްކަތް ކުރަމުންނެވެ. އޭގެ ކުރިން ވެސް 2،000 ގެޔަށް ހުއްދަ ދީފައި ވެ އެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރުން ޔަހޫދީން އާބާދު ކުރުމާ ދެކޮޅަށް އެއްވެސް އެއްޗެއް ނުބުނެ އެވެ. އެހެންވެ، އެމެރިކާ އިން އިޒްރޭލަށް ފާޑުކިޔާފައި މި ވަނީ ހަތަރު އަހަރަށް ފަހު އެވެ.
ނަމަވެސް އާ ރައީސް ޖޯ ބައިޑެންގެ ސަރުކާރުން ތަކުރާރުކޮށް ބުނެފައި ވަނީ ޔަހޫދީން އާބާދު ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަނެއްކާވެސް ވަނީ އެ ވާހަކަ ތަކުރާރުކޮށްފަ އެވެ.
"ޔަހޫދީން ވަޒަންވެރިވުމަށް އެތައް ހާސް ޔުނިޓެއް އަޅަން އުޅޭތީ އަޅުގަނޑުމެން ވަރަށް ކަންބޮޑުވޭ،" ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވި އެވެ.
"ގެތައް އެޅުމާ އަޅުގަނޑުމެން ދެކޮޅު. އެއީ ހަމަނުޖެހުން ހުއްޓުވައި، ސުލްހަ ގެންނަން ކުރާ މަސައްކަތާ ނުބައްދަލު އަމަލެއް. އަދި އެއީ ދެ ދައުލަތުގެ ހައްލަށް އޮތް ހުރަހެއް."
ޕްރައިސް ވިދާޅުވީ އެމެރިކާ އިން މި މައްސަލާގައި އިޒްރޭލުގެ އިސް އޮފިޝަލުންނާ އެކު ބާއްވާ ބައްދަލުވުންތަކުގައި މަޝްވަރާ ކުރާނެ ކަމަށެވެ.
އިޒްރޭލުގެ ބޮޑު ވަޒީރު ނަފްތާލީ ބެނެޓް އަކީ ޔަހޫދީން އާބާދު ކުރުމަށް ތާއީދު ކުރައްވާ ބޭފުޅެކެވެ. ނަމަވެސް އެމަނިކުފާނުގެ ކޯލިޝަން ސަރުކާރުގައި އެކަމާ ދެކޮޅު ބޭފުޅުން ވެސް ހިމެނެ އެވެ.
ފަލަސްތީނުގެ ބޮޑު ވަޒީރު މުހައްމަދު އިޝްތަޔާ އެމެރިކާ އަށް ގޮވާލެއްވީ އިޒްރޭލާ "ކުރިމަތިލައިގެން" ފަލަސްތީނުގެ ރައްޔިތުންނާ ދެކޮޅަށް ހިންގާ "އުދުވާން" ހުއްޓުވުމަށެވެ.
ހުޅަނގު އައްސޭރީގައި އަޅާފައިވާ ގެތަކުގައި މިހާރު ވެސް 475،000 އެއްހާ ޔަހޫދީން ދިރިއުޅެ އެވެ. އިޒްރޭލުން ގެތައް އަޅަމުން ދަނީ ބައިނަލްއަގްވާމީ ގާނޫނާ ހިލާފަށް، ކުރިމަގުގައި ފަލަސްތީނުގެ ދައުލަތް ގާއިމްކުރަން މަސައްކަތް ކުރާ ބިމުގަ އެވެ.
