ތިން މެމްބަރުންނާއެކު އެމްއެންޕީ މަޖިލީހުގެ ދަފްތަރުގައި ހިމަނައިފި

މޯލްޑިވްސް ނެޝަނަލް ޕާޓީ (އެމްއެންޕީ) ރަޖިސްޓްރީކޮށް ސިޔާސީ ޕާޓީތަކުގެ ދަފްތަރުގައި އިލެކްޝަންސް ކޮމިޝަނުން ހިމެނުމާއެކު، އެ ޕާޓީއާ ގުޅިވަޑައިގެންފައިވާ ތިން މެމްބަރުންނާއެކު އެމްއެންޕީއަކީ ރައްޔިތުންގެ މަޖިލީހުގެ ދަފްތަރުގައި ހިމެނޭ ޕާޓީއެއްކަމަށް މިއަދު އިއުލާނުކޮށްފި އެވެ.

މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ މަޖިލީހުގެ ގަވައިދުގައިވާ ގޮތުގެ މަތިން، ސިޔާސީ ޕާޓީތަކުގެ ދަފްތަރުގައި އެމްއެންޕީ ހިމެނުމާއެކު މަޖިލީހުގައި މިހާރު ތިބި ތިން މެމްބަރަކު އެ ޕާޓީއާ ގުޅިވަޑައިގެންފައިވާތީ، އެމްއެންޕީ މަޖިލީހުގެ ދަފްތަރުގައި ހިމެނިފައިވާ ކަމަށެވެ.

އެމްއެންޕީއަކީ ޖުމްހޫރީ ޕާޓީ (ޖޭޕީ) ގެ މެމްބަރުންގެ ގޮތުގައި މަޖިލިސް ތަމްސީލު ކުރައްވަމުން ގެންދެވި ދަނގެތި ދާއިރާގެ މެމްބަރު މުހައްމަދު ނާޒިމާއި ތިމަރަފުށި ދާއިރާގެ މެމްބަރު އަބްދުﷲ ރިޔާޒް އިސްވެ އުފައްދަވާފައިވާ ޕާޓީއެކެވެ.

ނާޒިމާއި ރިޔާޒްގެ އިތުރުން، ވިލިމާލެ ދާއިރާގެ މިނިވަން މެމްބަރު އަހްމަދު އުޝާމް ވެސް އެ ޕާޓީއާ ވަނީ ގުޅިވަޑައިގެންފަ އެވެ.

އެއާއެކު ނަޝީދު މިއަދު ވަނީ އެ ތިން މެމްބަރުންނަކީ މަޖިލީހުގައި އެމްއެންޕީ ތަމްސީލު ކުރައްވާ ތިން މެމްބަރުން ކަމަށް އިއުލާނުކުރައްވައި، މަޖިލީހުގައި ސިޔާސީ ޕާޓީތައް ތަމްސީލުކުރާ ތަރުތީބަށް އައި ބަދަލުތައް ވެސް ހާމަކޮށްދެއްވައިފަ އެވެ.

އަދި މި ބަދަލާ ގުޅިގެން، މަޖިލީހުގެ ކޮމިޓީތަކުގައި ޕާޓީތައް ތަމްސީލުކުރުމަށް އަންނަ ބަދަލު ފާސްކުރަން ހުށަހަޅުއްވާނެކަމަށް ވެސް އެމަނިކުފާނު ވިދާޅުވި އެވެ.

މަޖިލީހުގެ ދަފްތަރަށް އައި ބަދަލު

• އެމްޑީޕީ - 65 މެމްބަރުން
• ޕީޕީއެމް - 6 މެމްބަރުން
• ޖޭޕީ - 3 މެމްބަރުން
• ޕީއެންސީ - 3 މެމްބަރުން
• އެމްއެންޕީ - 3 މެމްބަރުން
• އެމްޑީއޭ - 2 މެމްބަރުން
• ވަކި ޕާޓީއަކަށް ނިސްބަތް ނުވާ - 5 މެމްބަރުން

މިނިވަން މެމްބަރުންގެ ގޮތުގައި ތިއްބަވާ ނިލަންދޫ ދާއިރާގެ މެމްބަރު އަބްދުލްމުހްސިން ހަމީދާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އެމްއެންޕީއާ އުފެއްދިއިރު އެ ޕާޓީއާ ގުޅިވަޑައިގަންނަވާނެ ކަމަށް ވިދާޅުވި އެވެ.

ނަމަވެސް، ފަހުން އެ ދެ މެމްބަރުން ވެސް ވަނީ އެ ހިޔާލު ބަދަލުވެއްޖެކަމަށް ވިދާޅުވެ، އެމްއެންޕީއާ ގުޅިވަޑައިގަތުމަށް ނިންމި ނިންމުން އަނބުރާ ގެންގޮސްފަ އެވެ.

އެމްއެންޕީގެ އަމާޒަކީ މަޖިލީހުގެ މައިނޯރިޓީ ޕާޓީއަށް ވުން ކަމުގައި ނާޒިމް މީގެ ކުރިން ވަނީ ވިދާޅުވެފަ އެވެ.