މެންޗެސްޓާ (އޮކްޓޫބަރު 27) - ފްރާންސްގެ މިޑްފީލްޑަރު ޕައުލް ޕޮގްބާ ލައްވައި އާ ކޮންޓްރެކްޓެއްގައި ސޮއިކުރުމުގެ ކަންކަމުގައި އޭނާގެ ކްލަބް މެންޗެސްޓާ ޔުނައިޓެޑުން އެހާ ބޮޑަށް ނުޅޭ ކަމަށް ޕޮގްބާގެ އޭޖެންޓް މިނޯ ރައިއޯލާ ބުނެފި އެވެ.
ޕޮގްބާ، 28، ޔުނައިޓެޑްގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އަންނަ އަހަރުގެ ޖޫން މަހު ޕޮގްބާގެ އެއްބަސްވުން ހަމަވާއިރު، މިހާތަނަށް ޔުނައިޓެޑުން ހުށަހެޅި އާ ކޮންޓްރެކްޓަށް ޕޮގްބާގެ ފަރާތުން އެކަށީގެންވާ އެއްބާރުލުމެއް ނުލިބި އޮތް އެންމެ ބޮޑު ސަބަބަކީ ޕޮގްބާ ބޭނުންވާ ވަރުގެ މުސާރައެއް ދޭން ޔުނައިޓެޑުން ދެކޮޅު ހެދުމެވެ.
ބައެއް މީޑިއާ ރިޕޯޓްތައް ބުނާގޮތުގައި ޕޮގްބާ ހުރީ މި ސީޒަން ނިންމުމަށް ފަހު ހިލޭ ޓްރާންސްފާއެއްގައި ކްލަބް ބަދަލުކުރާށެވެ.
އަންނަ ޖެނުއަރީ މަހު ޕޮގްބާ ބޭނުންނަމަ އޭނާ އިހުތިޔާރުކުރާ ކްލަބަކާ އެކީ ޕްރީ އެގްރީމެންޓެއް ހެދިދާނެ އެވެ. އެއީ ޖުލައި މަހު އެ ޓީމަކާ ރަސްމީކޮށް ގުޅޭގޮތަށެވެ. ޕޮގްބާ ޔުނައިޓެޑްގައި މަޑުކޮށްފާނެ ކަމަށް އިނގިރޭސި މީޑިއާގައި މިދިޔަ ހަފްތާތަކުގައި ވާހަކަ ދެކެވުނު ކަމުގައި ވިޔަސް ރައިއޯލާ ބުނީ އެއީ މުޅިން އެއްކޮށް ހަގީގަތެއް ނޫން ކަމަށެވެ.
"ތި މީހުން (މީޑިއާ) ޖެހޭނީ ޔުނައިޓެޑާ ސުވާލުކޮށްލަން. އެ މީހުން އެހާ ވަރަކަށް މިކަމާ (ޕޮގްބާގެ އާ ކޮންޓްރެކްޓްގެ ކަންތައްތަކާ) އުޅޭހެނެއް އަހަންނަށް ހިއެއްނުވޭ. މި ވަގުތަށް ޔަގީނުން ވެސް އަހަރެން ދޭނެ އަޕްޑޭޓެއް ނެތް،" ރައިއޯލާ ބުންޏެވެ.
އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ ލިވަޕޫލް އަތުން 5-0 އިން ޔުނައިޓެޑް ބަލިވި މެޗުގައި ބަދަލު ކުޅުންތެރިއެއްގެ ގޮތުގައި އަރައި ޕޮގްބާ ކުރި ނުރައްކާތެރި ފައުލަކަށް އޭނާ އަށް ވަނީ ރަތް ކާޑެއް ދައްކައިފަ އެވެ.
ޔުނައިޓެޑް އެންމެ ފަހުން ކުޅުނު ދެ މެޗުގައި ވެސް ޕޮގްބާ އެރީ ބަދަލު ކުޅުންތެރިއެއްގެ ގޮތުގަ އެވެ. އެއީ އޭގެ ކުރިން އިނގިރޭސި ޕްރިމިއާ ލީގުގައި ލެސްޓާ ސިޓީ އަތުން ޔުނައިޓެޑް ބަލިވި މެޗަށް ފަހު އެ ޓީމުގެ ކޯޗު އޮލެ ގުނަ ސޯލްޝެއާގެ ބައެއް ކަންކަމަށް ޕޮގްބާ ނުސީދާކޮށް ފާޑުކީ ފަހުންނެވެ.
ފްރާންސާއި އިނގިރޭސި ބައެއް މީޑިއާ ރިޕޯޓްތައް ބުނާގޮތުން ސޯލްޝެއާ މި ސީޒަނަށް ފަހު ޔުނައިޓެޑް ދޫކޮށްލާނެކަން އޮތީ އެ ކްލަބްގެ ބައެއް ކުޅުންތެރިން ގާތުގައި ބުނެފަ އެވެ.
