ލަންޑަން (އޮކްޓޫބަރު 26) - ވަކި ހާއްސަ ގޮތަކަށް ސްޕެއިންގެ މިޑްފީލްޑަރު ސައުލް ނިގޭޒަށް ޗެލްސީ ޓީމުން ޖާގަ ނުދެވޭނެ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
އުމުރުން 26 އަހަރުގެ ސައުލް މި ސީޒަނުގައި ޗެލްސީއާ ގުޅުނީ ލޯން އެއްބަސްވުމެއްގެ ދަށުންނެވެ. މި ޑީލް އެއްބަސްވި ގޮތުން ލޯން ފީއެއްގެ ގޮތުގައި ޗެލްސީން އެތުލެޓިކޯ އަށް ހަތަރު މިލިއަން ޔޫރޯ ދައްކާނެ އެވެ. އަދި އެއް އަހަރުގެ ލޯން ކޮންޓްރެކްޓް ނިމުމުން ސައުލްގެ އެއްބަސްވުން ދާއިމީ ކުރަން ޗެލްސީން 35 މިލިއަން ޔޫރޯ އެތުލެޓިކޯ އަށް ދައްކަން ޖެހޭނެ އެވެ.
ޗެލްސީއާ ގުޅުމަށް ފަހު ސައުލް އަށް އެ ޓީމުން އެކަށީގެންވާ ވަރަށް ކުޅުމުގެ ފުރުސަތު ނުލިބެ އެވެ. އެންމެ ފަހުން އިނގިރޭސި ޕްރިމިއާ ލީގުގައި ޗެލްސީ 7-0 އިން ނޯވިޗް ސިޓީ އަތުން ޗެލްސީ މޮޅުވި މެޗުގައި ސައުލް އަށް ފުރުސަތެއް ނުދެ އެވެ.
އިނގިރޭސި ލީގު ކަޕްގައި މިރޭ ސައުތެމްޓަނާ ދެކޮޅަށް ކުޅޭ މެޗުގައި ސައުލް އަށް ފުރުސަތު ދޭނެތޯ ސުވާލުކުރުމުން ޓުޗެލް ބުނީ ވަކި ކުޅުންތެރިއަކަށް ވެގެން ވަކި އުސޫލެއް ނެތް ކަމަށެވެ.
"ވަކި ކުޅުންތެރިއަކަށް ވަކި ގޮތެއް ނޫން މި އޮންނަނީ. އަހަރެން އަދި ނުނިންމަން މި މެޗުގައި އޭނަ (ސައުލް) ކުޅޭނެތޯ. އެކަމަކު މި ފަދަ މުބާރާތްތަކުގައި ކުޅޭ މެޗުތަކުގައި ކުޅެލަން ފުރުސަތު ނުލިބި ތިބި ކުޅުންތެރިންނަށް ފުރުސަތު ދިނުމަކީ އާންމު އުސޫލުން ކުރާ ކަމެއް،" ޓުޗެލް ބުންޏެވެ.
މި ފަހަރު ޗެލްސީން ވިއްކާލަން މަސައްކަތްކުރި ރުބެން ލޮފްޓަސް ޗީކާއި ރޮސް ބާކްލޭ އަންނަނީ މިހާރު ޗެލްސީގެ މެޗުތަކުގައި ގަވާއިދުން ކުޅެމުންނެވެ. ފުރަތަމަ އެގާރައިން ފުރުސަތު ނުލިބުނު ކަމުގައި ވިޔަސް ބަދަލެއްގެ ގޮތުގައި ކުޅެން އަރަ އެވެ.
ޓުޗެލް ބުނީ އޭނާ ބަލަނީ ވަކި ކުޅުންތެރިއަކަށް ފުރުސަތު ދޭން ނޫން ކަމަށާއި ޕްރެކްޓިހުގައި އޭނާ ބޭނުންވާ ލެވަލަށް މަސައްކަތް ކުރާ ކުޅުންތެރިން ލައިގެން މެޗުތަކުގައި ރަނގަޅު ނަތީޖާ ނެރުމަށް ކަމަށެވެ.
ލީގު ކަޕްގެ ގަދަ 16 ޓީމުގެ ބުުރުގައި މިރޭ ޗެލްސީ އަމިއްލަ ދަނޑުގައި ސައުތެމްޓަނާ ކުޅޭ މެޗާއި އާސެނަލުން އަމިއްލަ ދަނޑުގައި ލީޑްސް ޔުނައިޓެޑާ ބައްދަލުކުރާ މެޗު ފަށާނީ ރާއްޖެ ގަޑިން 23:45 ގަ އެވެ.
