ބްރިޒްބަން، އޮސްޓްރޭލިއާ (އޮކްޓޯބަރު 26) - އަމާޒަކީ 2050 ވަނަ އަހަރާ ހަމައަށް ދާއިރު ޖައްވަށް ގޭސް ބޭރު ކުރުމުގައި ނެޓް ޒީރޯ އަށް ދިޔުން ކަމަށް އޮސްޓްރޭލިއާ އިން ބުނެފި އެވެ.
މޫސުމީ ބަދަލު އައުން ކޮންޓްރޯލް ކުރުމަށް ގައުމުތަކުން އަޅާނެ ފިޔަވަޅުތައް ކަނޑައަޅަމުން ދަނީ މި މަހު ފަހުކޮޅު ފަށާ ކޮޕް26 އަށް އެ ކަންކަން ހުށަހަޅަން ޖެހޭތީ އެވެ.
ދުނިޔޭގެ އެންމެ ބޮޑު ކޯލް އަދި ގޭސް އެކްސްޕޯޓް ކުރާ ގައުމުތަކުގެ ތެރޭގައި ހިމެނޭ އޮސްޓްރޭލިއާގެ ސަރުކާރުން ފާއިތުވި އަށް އަހަރު ވެސް މޫސުމީ ބަދަލާ ގުޅޭ ފިޔަވަޅު އަޅަން ދެކޮޅު ހެދި އެވެ.
އޮކްޓޯބަރު 31 އިން ނޮވެމްބަރު 12 އަށް ސްކޮޓްލަންޑުގެ ގްލާސްގޯގައި ކުރިއަށްދާ ކޮޕް26 އާ ގުޅިގެން ވެސް އޮސްޓްރޭލިއާ އިން ބުނެފައި ވަނީ ކޯލް ބޭނުން ކުރުން ނުހުއްޓޭނެ ކަމަށެވެ.
ނަމަވެސް ނެޓް ޒީރޯ ހާސިލް ކުރަން ލަނޑުދަނޑިއެއް ކަނޑައެޅުމަކީ ކުރިއެރުމެއް ކަމަށް އެނެލިސްޓުން ދެކެ އެވެ. ނެޓް ޒީރޯގެ މާނައަކީ ޖައްވަށް ދޫކުރާ ގޭހާއި ޖައްވުން ނައްތާލާ ގޭސް ބެލެންސް ކުރުމެވެ.
ބޮޑު ވަޒީރު ސްކޮޓް މޮރިސަން ވިދާޅުވީ އޮސްޓްރޭލިއާގެ ރައްޔިތުން ބޭނުން ވަނީ މޫސުމީ ބަދަލާ ގުޅިގެން ރަނގަޅު ސްޓްރެޓެޖީއެއްގެ އެހީގައި ދުނިޔޭގެ ކުރިމަގު ރައްކާތެރިކުރަން ކަމަށެވެ.
"މޫސުމީ ބަދަލާ ގުޅޭ ފިޔަވަޅު އަޅަން ރައްޔިތުން ބޭނުންވޭ. މިހާރު ވެސް އެ ދަނީ ފިޔަވަޅު އަޅަމުން. އެކަމަކު ވަޒީފާތަކާއި އާމްދަނީ ރައްކާތެރި ކުރަން ވެސް ބޭނުންވޭ. އަދި ދިރިއުޅުމުގެ ހަރަދުތައް ކުޑަކުރަން ވެސް ބޭނުންވޭ،" މޮރިސަން ނޫސްވެރިންނަށް ވިދާޅުވި އެވެ.
އެހެން ނަމަވެސް 2030 ވަނަ އަހަރަށް ކަނޑައަޅާ ލަނޑުދަނޑި ވަރުގަދަ ކުރަން އޮސްޓްރޭލިއާ އިން ވަނީ ދެކޮޅު ހަދާފަ އެވެ.
އޮސްޓްރޭލިއާ އިން ކުރިން އެއްބަސްވެފައި ވަނީ 2030 ގެ ކުރިން ޖައްވަށް ބޭރު ކުރާ ގޭސް 26-28 ޕަސެންޓު މަދު ކުރުމަށެވެ. މޮރިސަން ވަނީ އެ ލަނޑުދަނޑި އަށް ވާސިލްވެވޭނެކަމުގެ ޔަގީންކަން ދެއްވާފަ އެވެ.
މޫސުމީ ބަދަލާ ގުޅޭ ކަންކަމުގައި އޮސްޓްރޭލިއާގެ ވިސްނުން ހުންނަ ގޮތުގެ ސަބަބުން އެމެރިކާ، އިނގިރޭސިވިލާތް ޕެސިފިކް ކަނޑުގައިވާ ޖަޒީރާ ގައުމުތަކުގެ ފާޑުކިޔުން އަމާޒުވެފައި ވެ އެވެ.
