ވެރިކަން ހިންގުމުގެ ނިޒާމާ ގުޅޭ ގޮތުން އިއްޔެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއެކު މަޝްވަރާ ކުރެއްވުމަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމްއާއެކު މިއަދު ސަން އައިލެންޑް ރިސޯޓުގައި ބައްދަލު ކުރައްވައިފި އެވެ.
ސަން އައިލެންޑަށް ވަޑައިގެންނެވުމަށް ކުރީގެ ރައީސް ނަޝީދު ވައިގެ މަގުން އދ. މާމިގިއްޔަށް ވަޑައިގެންނެވުމުން ގާސިމް ވަނީ އެމަނިކުފާނަށް އެއާޕޯޓުގައި މަރުހަބާ ދަންނަވައިފަ އެވެ. އަދި ގާސިމް މިހާރު ދިރިއުޅުއްވަމުން ގެންދަވާ އޭނާގެ ރިސޯޓަށް ދެ ބޭފުޅުން ވަޑައިގެންނެވީ އެކީގަ އެވެ.
ނަޝީދާއެކު ގާސިމް އަރިހަށް ވެރިކަން ހިންގާ އެމްޑީޕީގެ ޗެއާޕާސަން ހަސަން ލަތީފާއި ޕާލަމެންޓަރީ ގްރޫޕުގެ ލީޑަރު އަލީ އާޒިމް އާއި ޕާޓީގެ ނައިބު ރައީސް މުހައްމަދު ޝިފާޒް ވަޑައިގެންނެވި އެވެ. ޖޭޕީގެ ފަރާތުން އިތުރު މީހަކު ބައިވެރިކަން އެނގިފައެއް ނެތެވެ.
މިއަދު ކުރިއަށްދިޔަ ބައްދަލުވުމުގެ ތެރެއިން: ވެރިކަމުގެ ނިޒާމް ބަދަލު ކުރުމަށް ތާއީދު ނެތް ކަމަށް ގާސިމް ވަނީ ކުރިން ވިދާޅުވެފައި -- ފޮޓޯ:
މި ހަބަރު ޝާއިއު ކުރި ވަގުތު ވެސް ސަން އައިލެންޑް ރިސޯޓުގައި ކުރިއަށްދާ އެ ބައްދަލުވުމުގެ ތަފްސީލު އެމްޑީޕީ އަދި ޖޭޕީއަކުން ވެސް މިހާތަނަށް ނުބުނެ އެވެ.
ރައީސް ސޯލިހާއެކު ނިޒާމުގެ ވާހަކަ ރައީސް ނަޝީދު ދެއްކެވިއިރު މިދިޔަ އޯގަސްޓު މަހުގެ ތެރޭގައި ވާހަކަ ދައްކަވަމުން ގާސިމް ވިދާޅުވެފައި ވަނީ ބަރުލަމާނީ ނިޒާމަނަށް ތާއީދު ނުކުރައްވާ ކަމަށާއި ރާއްޖޭގައި ބޮޑުވަޒީރަކު ހުރުމަށް ބޭނުންވެވަޑައިނުގަންނަވާ ކަމަށެވެ.
ވެރިކަން ހިންގުމުގެ ނިޒާމު ބަރުލަމާނީ ނިޒާމަކަށް ބަދަލުކޮށް ބޮޑުވަޒީރަކަށް ވަޑައިގެންނެވުމުގެ ޝައުގުވެރިކަން ހުންނެވި ކަމަށް ނަޝީދު އަންނަނީ ތަކުރާރުކޮށް ވިދާޅުވަމުންނެވެ. ނިޒާމު ބަދަލު ކުރުމާމެދު ރައީސް ސޯލިހު ވިދާޅުވެފައި ވަނީ ރައްޔިތުންގެ ވޯޓަކާއެކު ނިޒާމު ބަދަލު ކުރުމަކީ މައްސަލައެއް ނޫން ކަމަށެވެ. ނަމަވެސް ހިންގުމުގެ ނިޒާމު ބަދަލު ކުރުމާމެދު ކޯލިޝަން ޕާޓީގެ ހިމެނޭ އަދާލަތު ޕާޓީ އާއި ކުރީގެ ރައީސް މައުމޫން އަބްދުލްގައްޔޫމްގެ އެމްއާރްއެމް ދެކޮޅެވެ.
