ބީލަމަށް ހުޅުވާލުމާއި، ދިރާސާކުރުމާ، ޕްރީ-ކޮލިފައިކުރުމާ، ރަޖިސްޓަރީ ކުރުމުގެ އިތުރުން ނެގޯޝިއޭޓްކުރުން އަދި ބީލަން ހޮވާނެ ގޮތުގެ އުސޫލުތައް ބަޔާންކުރާ ގަވާއިދު އާންމުކޮށްފި އެވެ.
މިއީ ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ގާނޫނުގެ ދަށުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކުލަވައިލައިފައިވާ ގަވާއިދެކެވެ.
މި ގަވައިދުގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އާންމުކޮށް އިއުލާނުކޮށްގެން ހުށަހަޅާ ބިޑުތައް ދިރާސާކުރާނެ ނުވަތަ އިވެލުއޭޓް ކުރާނެ މައިގަނޑު އުސޫލުތައް ވަނީ ހިމަނާފަ އެވެ. އަދި ބީލަން ކާމިޔާބު ކުރާނެ ފަރާތެއް ކަނޑައެޅުމުގައި ކޮންމެހެން އަމަލުކުރަންޖެހޭ އުސޫލުތައް ބަޔާންކޮށްފައިވެ އެވެ.
ގެޒެޓުކޮށްފައިވާ ގަވައިދުގައި ވާގޮތުން ބީލަން ހުށަހެޅުމަށް ޝައުގުވެރިވާ ފަރާތްތަކަށް އެ ދައުވަތު ދޭން ޖެހެނީ ލިޔުމުންނެވެ. ދައުވަތުގައި، ބީލަން ހުޅުވައިލި ދާއިރާ ތަފުސީލުކޮށް ބަޔާންކުރަންޖެހެ އެވެ.
ބީލަން ހުށަހެޅުމުގެ ދައުވަތު ސަރުކާރުގެ ގެޒެޓުގައި ޝާއިއުކުރުމުން، އިއުލާނު ކުރެވުނީ ކަމުގައި ބެލޭނެކަމަށް ގަވައިދުގައިވެ އެވެ.
ބީލަން ހުށަހެޅުމަށް ކަނޑައެޅިފައިވާ ސުންގަޑި ހަމަވުމުން، ބީލަން ހުށަހެޅި ހުރިހާ އެންމެން ނުވަތަ އެމީހުން ކަނޑައަޅައިފައިވާ މީހުންގެ ހާޒިރުގައި ބީލަން ހުޅުވާއިރު އެތަނުގައި ތިބި އެންމެންގެ ނަމާއި، ހާޒިރުވެތިބި ހައިސިއްޔަތު އެނގޭ ގޮތަށް ރަޖިސްޓަރީއެއްގައި ސޮއިކުރަންޖެހެ އެވެ.
ހުށަހަޅާ ބީލާންތައް ހުޅުވަންޖެހޭނީ ގަވާއިދުގައި ބަޔާންކޮށްފައިވާގޮތަށް ގުރޫޕު ކުރުމަށްފަހު އެ ތަރުތީބުންނެވެ. ގަވާއިދުގައި ކަނޑައަޅާފައިވަނީ ހަތަރު ގުރޫޕެކެވެ. އެއީ، އިއުލާނުގައި ކަނޑައަޅައިފައިވާ ސުންގަޑިއަށްވުރެ ފަހުން ހުށަހަޅައިފައިވާ ބީލަންތަކާއި، ސުންގަޑިއަށްވުރެ ކުރިން ހުށަހެޅުމަށްފަހު އަނބުރާ ގެންދިޔަ ބީލަންތަކާއި، ސުންގަޑި ހަމަވުމުގެ ކުރިން ބީލަން ހުށަހެޅުމަށްފަހު، ބަދަލުތައް ގެނެސް، ސުންގަޑި ހަމަވުމުގެ ކުރިން ހުށަހަޅައިފައިވާ ބީލަންތަކުގެ އިތުރުން ކަނޑައަޅައިފައިވާ ސުންގަޑިއަށްވުރެ ކުރިން ހުށަހަޅައިފައިވާ ބީލަންތަކެވެ.
ހުށަހަޅާފައިވާ ބީލަމެއް އިވެލުއޭޓްކުރާއިރު ރިއާޔަތްކުރަންވާނީ މީލަމަށް ހުޅުވާލިއިރު މާކްސް ދެވޭނޭކަމަށް އާންމުކޮށް އިއުލާނުކުރި ކަންކަމުގެ މައްޗަށް އެކަންޏެވެ. ބީލަމުގެ އަގާއި ޑިސްކައުންޓް ފަދަ މާލީ މުއާމަލާތެއް ބީލަމަށް ހުޅުވާލިއިރު ހާމަކޮށްފައި ނުވާނަމަ، ބީލަން އިވެލުއޭޓްކުރާއިރު، އެ މުއާމަލާތަކަށް ރިއާޔަތް ނުކުރެވޭނެކަމަށް ގަވައިދުގައި ވަނީ ހިމަނާފަ އެެވެ. ބީލަން ހުށަހެޅުމުގެ ސުންގަޑި ހަމަވުމުން ހުށަހަޅައިފައިވާ ބީލަން އަނބުރާ ނުގެންދެވޭނެ އެވެ.
ބީލަން ހުށަހަޅައިފައިވަނީ ދިވެހި ފައިސާއިން ނޫންނަމަ، އިވެލުއޭޓް ކުރާއިރު، ދިވެހި ފައިސާއަށް ބަދަލު ކުރުމަށްފަހު، ރަސްމީ ރޭޓުގައި ދިވެހި ފައިސާއިން އަގުކުރަންޖެހެ އެވެ. އަދި ބީލަމަށް ހުޅުވާލި އިއުލާނުގައި ބުނެފައިވާ މައުލޫމާތުތަކާއި ޝަރުތުތައް ފުރިހަމަނުވާ ބީލަންތައް އެއީ ބާތިލު ބީލަމެއްގެ ގޮތުގައި ކަނޑައެޅުމުގެ ބާރު އިވެލުއޭޝަން ކޮމެޓީއަށް ވަނީ ދީފަ އެވެ.
އެންމެ ދަށް އަގެއް ހުށަހަޅާފައިވާ ބީލަން ދެނެގަތުމަށް ބީލަންތައް އިވެލުއޭޓްކޮށް އަގުތައް އަޅައިކިއުމަށްފަހު، އަގުތައް ތަރުތީބުކުރަން ބުނެފައި ވަނީ ބޮޑު އަދަދުން ކުޑަ އަދަދަށް ވާ ގޮތަށެވެ.
ބީލަން އިވެލުއޭޓް ކުރާ ކަންކަމާ ގުޅޭގޮތުން، އެއްވެސް ފަރާތަކަށް ލުޔެއްދިނުމަށް ނުވަތަ ބީލަން ހުށަހަޅާ ފަރާތަށް މަންފާއެއް ދިނުމަށް ނުވަތަ އެނޫން ގޮތަކުންވެސް އެއްވެސް މަރުހަލާއެއްގައި ނެގޯޝިއޭޓް ކުރުމަކީ މި ގަވާއިދު މަނާކުރާ ކަމެކެވެ. ބީލަން ކާމިޔާބުކުރި ފަރާތަށް އެކަން އެންގުމަށްފަހު، ހާއްސަ ހާލަތެއް މެދުވެރިވެގެން ނުވަތަ ދައުލަތަށް ފައިދާއެއް ނުވަތަ މަންފާއެއް އޮތް ހާލަތެއްގައި މެނުވީ ބީލަމުގެ އަގާ ގުޅޭގޮތުން ނުވަތަ ބީލަމާ ގުޅޭ އެނޫންވެސް ކަމަކާ ގުޅޭގޮތުން، ނެގޯޝިއޭޓްކުރުންވެސް އެ ގަވާއިދު މަނާކުރެ އެވެ.
ބީލަން ހުށަހަޅާ ފަރާތްތަކުގެ މެދުގައި ހަމަހަމަކަން ގާއިމުކުރުމަށް އެކުލަވާލާފައިވާ މި ގަވައިދުގެ މަގުސަދަކީ އެންމެ ހާމަކަން ބޮޑުކޮށް ބީލަމުގެ މަރުހަލާތައް ފުރިހަމަކޮށް އެންމެ އެކަށޭނަ ފަރާތަށް ބިޑު އެވޯޑުކުރުން ކަމުގައި އެ ގަވާއިދުގައި ބުނެފައި ވެއެވެ.
