ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހދ. ކުޅުދުއްފުއްޓަށް ވަޑައިގަތުމުން އެމަނިކުފާނާ ދެކޮޅަށް ޝުއޫރު ފާޅު ކުރި މީހަކު ހައްޔަރުކޮށް އެ ސަރަހައްދުގައި ހުރި ބެނާތައް ފުލުހުން އަތުލާފައި ވަނީ ގާނޫނު އަސާސީއާ ހިލާފަށް ކަމަށް ޓްރާންސްޕޭރަންސީ މޯލްޑިވްސް އިން ބުނެފި އެވެ.
ރައީސް ސޯލިހާ ދެކޮޅަށް އަޑުއުފުލާފައި ވަނީ މިދިޔަ ހޮނިހިރު ދުވަހު ބޭއްވި ޒުވާނުންގެ ދުވަހުގެ ޖަލްސާގައި ބައިވެރިވެވަޑައިގަތުމަށް އެމަނިކުފާނު ކުޅުދުއްފުއްޓަށް ކުރެއްވި ޒިޔާރަތުގެ ތެރެއިންނެވެ. އަޑުއުފުލާފައި ވަނީ އެރަށުން ހޮވާލެވުނު ޓީމަކާއި ގައުމީ ފުޓުބޯޅަ ޓީމާ ދެމެދު ކުޅުނު ފުޓުބޯޅަ މެޗެއް ބެއްލެވުމަށް އެދުވަހު ރައީސް ދަނޑަށް ވަޑައިގެންނެވި ތަނުންނެވެ.
އެކަމާ ގުޅިގެން ޓްރާންސްޕެރެންސީ މޯލްޑިވްސް އިއްޔެ ނެރުނު ކުރު ބަޔާނެއްގައި ބުނީ ކުޅުދުއްފުށިން ސިޔާސީ އެކްޓިވިސްޓެއް ހައްޔަރުކޮށް، ބެނާތަކެއް ނެގި ހާދިސާއަކީ، ހިޔާލުފާޅުކުރުމުގެ މިނިވަންކަމުގެ ހައްގަށް އަރައިގަތުމުގެ އަމަލެއް ކަމަށެވެ. އަދި އެހާލަތުގައި ކޯޓު އަމުރަކާ ނުލާ ފުލުހުން އާއްމު ފަރާތެއްގެ ގެދޮރަށް ވަދެ، މީހަކު ހައްޔަރުކޮށް، މުދާ އަތުލުމަކީ، ގާނޫނާއި ހިލާފު އަމަލެއް ކަމަށް ވެސް އެ ޖަމިއްޔާއިން ބުންޏެވެ.
"ހިޔާލުފާޅު ކުރުމުގެ މިނިވަންކަމަކީ އިންސާނީ ހައްގާއި ޑިމޮކްރަސީ ދިފާއު ކުރުމަށް މުހިންމު ދައުރެއް އަދާ ކުރާ ކަމެއް. ކުށްވެރިނުވެ އަދި ހައްޔަރުކޮށްފާނެ ކަމުގެ ބިރެއް ނެތި ސަރުކާރާއި ދައުލަތުގެ މުއައްސަސާތަކަށް ރައްޔިތުންނަށް ފާޑު ކިޔެންޖެހޭނެ. އެއީ ޑިމޮކްރެޓިކް މުޖްތަމައެއްގެ އަސާސީ ސިފައެއް،" ސޯޝޮަލް މީޑިއާގައި އެ ޖަމިއްޔާއިން ނެރުނު ބަޔާނުގައި ބުނެފައިވެ އެވެ.
ޓްރާންސްޕޭރެންސީން ބުނީ، ހިޔާލުފާޅުކުރުމުގެ މިނިވަންކަމަކީ ޑިމޮކްރެސީއާ އިންސާނީ ހައްގުތައް ނަގަހައްޓައި ރައްކާތެރިކުރުމުގައި އެންމެ މުހިންމު އެއް އަސާސީ ދައުރު އަދާކުރާ އެއް ހައްގުކަމަށާއި އާއްމުންނަށް މިނިވަންކަމާއެކު ބިރެއް ނެތި ސަރުކާރުގެ އިދާރާތަކަށް ފާޑުކިޔުމަށް އޮންނަ އޮތުމަކީ ޑިމޮކްރެޓިކް ނިޒާމަކާއި މުޖުތަމައުއެއްގެ ވަރަށް މުހިންމު ސިފައެއް ކަމަށެވެ.
ސަރުކާރުން އެ މައްސަލައިގައި ޖަވާބުދާރީވެ ސަރުކާރުގެ ވައުދުތަކަށް ހިފަހައްޓައި، ހިޔާލުފާޅުކުރުމުގެ މިނިވަންކަން ޕްރޮމޯޓު ކުރުމަށް ޓްރާންސްޕެރެންސީން ވަނީ އެ ބަޔާނުގައި ސަރުކާރަށްގޮވާލައިފަ އެވެ. އަދި ސަރުކާރުގެ އިދާރާތަކަށް އާއްމުން ކުރާ އިތުބާރު އިތުރުކޮށް، ސިޔާސީ ހަރަކާތްތަކުގައި އާއްމުންނަށް އެއްވެސް ހިފެހެއްޓުމެއް ނެތި ބައިވެރިވެވޭކަން ޔަގީންކޮށްދިނުމަށް ވެސް ޓްރާންސްޕެރެންސީން ގޮވާލި އެވެ.
