ތެހްރާން، އިރާން (އޮކްޓޯބަރު 24) - މިދިޔަ އަހަރު އިޒްރޭލާ އެކު ގުޅުން ގާއިމްކުރި އަރަބި ގައުމުތަކުން އެ ވަނީ "ބޮޑު ކުށެއް" ކޮށްފައި ކަމަށާއި އެފަދަ ނިންމުންތައް އަނބުރާ ގެންދަން ޖެހޭ ކަމަށް އިރާނުގެ ރޫހާނީ ލީޑަރު އަލީ ހާމަނާއީ ވިދާޅުވެއްޖެ އެވެ.
ޔުނައިޓެޑް އަރަބް އެމިރޭޓްސް (ޔޫއޭއީ)، ބަހްރެއިން، ސޫދާން އަދި މޮރޮކޯ އިން ވަނީ 2020 ވަނަ އަހަރު އިޒްރޭލާ އެކު ގުޅުން ގާއިމްކޮށްފަ އެވެ. އަރަބި-އިޒްރޭލް ގުޅުން ގާއިމްކުރުމަކީ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ހާރިޖީ ސިޔާސަތުގެ މުހިއްމު ބަޔެކެވެ.
"ބައެއް ސަރުކާރުތަކަށް ވަނީ ގޯސް ހެދިފައި، ބޮޑެތި ގޯސްތަކެއް. ޒަޔޮނިސްޓުންގެ ހަރުކަށި ސަރުކާރާ އެކު ގުޅުން ގާއިމްކުރުމަކީ ބޮޑު ކުށެއް،" ހާމަނާއީ ވިދާޅުވި އެވެ.
"އެއީ އިސްލާމީ އެއްބައިވަންތަކަމާ ދެކޮޅު އަމަލެއް. އެ މަގު ދޫކޮށް، ކުރެވުނު ކުށަށް މައާފަށް އެދެން ޖެހޭނެ،" ކީރިތި ރަސޫލާގެ އީދު މީލާދާ ދިމާކޮށް ދެއްވި ހިތާބުގައި ހާމަނާއީ ވިދާޅުވި އެވެ.
އިރާނަށް 1979 ގައި އިސްލާމީ އިންގިލާބެއް ގެނައި ފަހުން ބައިނަލްއަގްވާމީ މުޖުތަމައުގައި ހަރަކާތްތެރި ވަނީ ފަލަސްތީނުގެ ދިފާއުގައި މަސައްކަތް ކުރާ ގައުމެއްގެ ގޮތުގަ އެވެ.
މިދިޔަ އަހަރާ ހަމައަށް އިޒްރޭލާ އެކު ގުޅުން ގާއިމްކޮށްގެން ތިބި ހަމައެކަނި އަރަބި ގައުމުތަކަކީ މިސްރާއި އުރުދުން އެވެ.
"މުސްލިމުންގެ އެއްބައިވަންތަކަން ހާސިލްކުރެވިއްޖެ ނަމަ ފަލަސްތީނާ މެދު ކުރެވޭ ސުވާލަށް އެންމެ ރަނގަޅު ހައްލު ލިބޭނެ،" ހާމަނާއީ ވިދާޅުވި އެވެ.
މިދިޔެ މޭ މަހު ހާމަނާއީ އިޒްރޭލާ ގުޅޭ ގޮތުން ވިދާޅުވީ "އެއީ ގައުމެއް ނޫން" ކަމަށާއި އެއީ "ޓެރަރިސްޓު މަރުކަޒެއް" ކަމަށެވެ.
