މިއަހަރުގެ ތިން ވަނަ ކުއާޓާ ނިމުނު އިރު ހިންގުމުގެ ފައިދާގެ ގޮތުގައި 1.03 ބިލިއަން ރުފިޔާ ބޭންކަށް ލިބިފައިވާ ކަމަށް ބޭންކް އޮފް މޯލްޑިވްސްގެ ސީއީއޯ ޓިމް ސޯޔާ ވިދާޅުވެއްޖެ އެވެ.
ޓިމް ވިދާޅުވީ ތިން ވަނަ ކުއާޓާގައި ބޭންކަށް ފައިދާގެ ގޮތުގައި ލިބުނު 1.03 ބިލިއަން ރުފިޔާ އަކީ ދެ ވަނަ ކުއާޓާގައި ލިބުނު އަދަދާ އަޅާބަލާއިރު 108 އިންސައްތަ އިތުރު އަދަދެއް ކަމަށެވެ. އަދި މިއީ މިއީ އެވަރެޖްކޮށް ބޭންކަށް ލިބޭ ވަރަށް ވުރެ ބޮޑު ފައިދާއެއް ކަމަށް އޭނާ ފާހަގަކުރެއްވި އެވެ.
ބީއެމްއެލްގެ އެކްސްޓްރާ އޯޑިނަރީ ޖެނެރަލް މީޓިން (އީޖީއެމް)ގައި ވާހަކަދައްކަވަމުން ޓިމް ވިދާޅުވީ ތިން ވަނަ ކުއާޓާގައި އެކުންފުނީގެ ހިންގުމުގެ ފައިދާ އެހާ ބޮޑުވެފައި ވަނީ ދައްކަންޖެހި ނުދައްކާ އޮތް ލޯނަކަށް އެއްފަހަރާ ފައިސާ ލިބުމުން ކަމަށެވެ. އެހެންނަމަވެސް މިއީ ކޮން ފަރާތަކުން ދެއްކި ލޯނެއް ކަމާއި، ލޯނަށް ދައްކާފައި ވަނީ ކިހާ ފައިސާއެއް ކަމެއްވެސް ޓިމްގެ ވާހަކަފުޅުގައި ވިދާޅުވެފައެއް ނުވެ އެވެ.
އީޖީއެމް ގައި ވާހަކަފުޅު ދައްކަވަމުން ޓިމް ވިދާޅުވީ ބޭންކަށް ލިބެމުންދާ ހަރުދަނާ ނަތީޖާގެ ސަބަބުން ކަސްޓަމަރުންނާއި މުޖުތަމައު އަށް އިންވެސްޓް ކުރުމަށް ބޮޑަށް އެހީތެރިވެދެވޭނޭ ކަމަށެވެ.
މީގެ އިތުރުން ޑިޖިޓަލައިޒް ކުރުމަކީ އަދިވެސް ބޭންކުން އެންމެ މުހިންމު އިސްކަމެއްދޭ އެއްކަންތައް ކަމަށް ޓިމް ވަނީ ވިދާޅުވެފަ އެވެ. ބޭންކުގެ ކަސްޓަމަރުންނަކީ އެންމެ މުހިންމު ބަހާކަމަށާއި ކުންފުނީގެ ސްޓްރެޓަޖީ އަކީ އެކުލަވާލެވިފައިވާ ޑިޖިޓަލް މަގުޗާޓާ އެއްގޮތަށް ފެންވަރު ރަނގަޅު ބޭންކިން ހިދުމަތް ފޯރުކޮށްދިނުން އެއީ ބޭންކް ގެ މައިގަނޑު އެއް އަމާޒު ކަމަށްވެސް ޓިމް ވިދާޅުވި އެވެ.
ޓިމް ވަނީ ބޭންކުގެ ހިދުމަތުގެ ފެންވަރާއި ކަސްޓަމަރުންނަށް ފޯރުކޮށްދޭ ހިދުމަތްތަކަށް އެކަށީގެންވާފަދަ ބަދަލުތަކެއް އަންނަމުންދާތަން ފެންނަކަން ފާހަގަކުރައްވާފަ އެވެ. ބޭންކުގެ އަމާޒަކީ ހިދުމަތްތައް އިތުރަށް ރަނގަޅު ކުރުން ކަމަށާއި އެއަމާޒަށް ވާސިލްވުމުގެ މަސައްކަތް ހުއްޓުމެއް ނެތި ކުންފުނިން ކުރަމުންދާ ކަމަށް އޭނާ ވިދާޅުވި އެވެ.
