އަންކާރާ، ތުރުކީ (އޮކްޓޯބަރު 24) - ޖަލުގައި ބަންދުކޮށްފައި ހުރި އެކްޓިވިސްޓެއް މިނިވަން ކުރަން ބާރު އެޅި 10 ގައުމެއްގެ ސަފީރުން ފޮނުވާލަން ތުރުކީގެ ރައީސް ތައްޔިބް އުރުދުގާން ފޮރިން މިނިސްޓްރީ އަށް އަންގަވައިފި އެވެ.
ޖަރުމަން ވިލާތާއި އެމެރިކާގެ އިތުރުން އަށް ގައުމެއްގެ ސަފީރުން މިދިޔަ ހޯމަ ދުވަހު ނެރުނު ބަޔާނެއްގައި ސިފަކޮށްފައި ވަނީ ފްރާންސަށް އުފަން އެކްޓިވިސްޓު އުސްމާން ކަވާލާ ޖަލުގައި ބަންދުކޮށްފައި ހުރުމަކީ ތުރުކީގެ މައްޗަށް "ހިޔަންޏެއް އެޅުން" ފަދަ ކަމެއްގެ ގޮތުގަ އެވެ.
"އަޅުގަނޑު ފޮރިން މިނިސްޓަރަށް އަމުރުކޮށްފައި ވާނީ އެ 10 ސަފީރުންނަކީ ޕާސޮނާ ނަން ގްރާޓާގެ ގޮތުގައި ވީ އެންމެ އަވަހަކަށް ކަނޑައެޅުމަށް،" ސަފީރުން ފޮނުވާލުމަށް ބޭނުން ކުރާ ޑިޕްލޮމެޓިކް ބަހުރުވައިން އުރުދުގާން ވިދާޅުވި އެވެ.
"ތުރުކީ އަށް އިހްތިރާމް ކުރުން ހުއްޓާލައިފި ނަމަ އެ މީހުން ވަގުތުން މި ގައުމުން ފައިބަން ޖެހޭނެ."
ނަމަވެސް ޔޫރަޕްގެ ބައެއް ގައުމުތަކުން ބުނީ ތުރުކީ އިން ސަފީރުންނާ މެދު ނިންމި ގޮތުގެ މައުލޫމާތު އެ ގައުމުތަކާ ހިއްސާކޮށްފައި ނުވާ ކަމަށެވެ.
"އަޅުގަނޑުމެން މި ވަގުތު ވެސް މަޝްވަރާ ކުރަމުން މި ދަނީ މިކަމުގައި ހިމެނޭ ނުވަ ގައުމަކާ އެކު،" ޖަރުމަނުގެ ފޮރިން މިނިސްޓްރީން ބުންޏެވެ.
"ގައުމަށް ފޮނުވާލަން ޖެހޭ ފަދަ އެއްވެސް ކަމެއް އަޅުގަނޑުމެންގެ ސަފީރު ނުކުރައްވާ،" ނޯވޭ ފޮރިން މިނިސްޓްރީގެ ތަރުޖަމާނު ޓްރޫޑޭ މަސެއިޑޭ ވިދާޅުވި އެވެ.
ނޯވޭގެ އިތުރުން ޑެންމާކް އާއި ނެދަލޭންޑްސްގެ އޮފިޝަލުން ބުނީ އިންސާނީ ހައްގުތަކާއި ޑިމޮކްރަސީގެ ކަންކަމުގައި ތުރުކީ އަށް ޕްރެޝަރު ކުރުން ހުއްޓާނުލާނެ ކަމަށެވެ.
އެމެރިކާ ސްޓޭޓް ޑިޕާޓްމަންޓުން ބުނީ ތުރުކީ އިން ސަފީރުން ފޮނުވާލަން ނިންމި ކަމުގެ ރިޕޯޓު ލިބިފައިވާ ކަމަށާއި އެކަމާ ގުޅޭ ގޮތުން ތުރުކީ ފޮރިން މިނިސްޓްރީއާ ވާހަކަދައްކަމުންދާ ކަމަށެވެ.
ދެހާސް ސަތާރަ ވަނަ އަހަރުން ފެށިގެން ޖަލުގައި ހުރި އުމުރުން 64 އަހަރުގެ އުސްމާން ކަވާލާގެ މައްޗަށް އެއްވެސް ހުކުމެއް ސާބިތުވެފައެއް ނުވެ އެވެ. އޭނާ ބަންދުކޮށްފައި ހުރީ 2013 ވަނަ އަހަރު ސަރުކާރާ ދެކޮޅަށް ކުރި މުޒާހަރާތަކާއި 2016 ވަނަ އަހަރު ނާކާމިޔާބުވި އަސްކަރީ ބަގާވާތާ ގުޅޭ ތުހުމަތުތަކުގަ އެވެ.
ހުޅަނގުގެ 10 ގައުމެއްގެ ސަފީރުން ގޮވާލައްވާފައި ވަނީ އޭނާގެ މައްސަލަ "އިންސާފުވެރިކަމާ އެކު އަވަހަށް" ނިންމުމަށެވެ.
ޝަރީއަތް ފެށެން ދެން ކަވާލާ މިނިވަން ކުރުމަށް 2019 ވަނަ އަހަރު ޔޫރަޕްގެ އިންސާނީ ހައްގުތަކާ ބެހޭ ކޯޓުން އަމުރު ކުރި އެވެ. އިންސާނީ ހައްގުތަކުގެ ހާލަތު މޮނީޓާ ކުރާ ކައުންސިލް އޮފް ޔޫރަޕުން ވަނީ އެ އަމުރާ އެއް ގޮތަށް އަމަލު ކުރުމަށް ތުރުކީ އަށް އެންމެ ފަހުގެ އިންޒާރު ދީފަ އެވެ.
އެ އަމުރު ތަންފީޒު ނުކޮށްފި ނަމަ އީޔޫގައި ތުރުކީ އަށް ލިބިދޭ ވޯޓުލުމުގެ ހައްގު ނިގުޅައިގަތުމުގެ ބާރު އޮވެ އެވެ. ނުވަތަ އީޔޫގެ މެމްބަރުކަމުން ތުރުކީ ވަކިކުރެވިދާނެ އެވެ.
