ވީޑިއޯތަކުން ފެނުނު މަންޒަރަށް ބަލާއިރު ރާއްޖޭގެ ފުޓްބޯޅައިގެ ލެވަލް ރަނގަޅު ކަމަށް ގައުމީ ފުޓްބޯޅަ ޓީމުގެ ކޯޗުކަމާ ހަވާލުވި އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މިޑްފީލްޑަރު ފްރެންޗެސްކޯ މޮރިއޭރޯ ބުނެފި އެވެ.
ގައުމީ ޓީމާ އެކު މިދިޔަ ހަފްތާގައި ކޮންޓްރެކްޓްގައި ސޮއިިކުރުމަށް ފަހު އިޓަލީގެ ނޫހެއް ކަމަށްވާ ކަލްޗިއޯމެރްކާޓޯ އަށް ދިން އިންޓަވިއުއެއްގައި މޮރިއޭރޯ ބުނީ ރާއްޖޭގެ ގައުމީ ޓީމާ ހަވާލުވާން ލިބުނު ފުރުސަތުގެ ބޭނުންހިފި ސަބަބާއި ކުރިއަށްދާން އޭނާގެ ވިސްނުން ހުރި ގޮތުގެ ބައެއް ކަންކަން ހިއްސާކޮށްފަ އެވެ.
އުމުރުން 52 އަހަރުގެ މޮރިއޭރޯ ބުނީ ފާއިތުވި ދޮޅު އަހަރެއްހާ ދުވަހު އޭނާ ދިޔައީ ޔޫރަޕުން ބޭރުން ރަނގަޅު ޕްރޮޖެކްޓެއް ނަގައިގެން ފުޓްބޯޅައިގައި ރަނގަޅު މަސައްކަތްތަކެއް ކުރަން ފުރުސަތެއް ހޯދަމުން ކަމަށެެވެ. އެ ގޮތުން ޕޯޗުގަލް ގައުމީ ޓީމަށް ކުރިން ކުޅުނު މަޝްހޫރު ފޯވާޑް ނޫނޯ ގޯމޭޒްގެ ފަރާތުން ކުރެވުނު މަޝްވަރާތަކަށް ފަހު ރާއްޖޭގެ މި އޮފާ އޮތްކަން އެނގުނު ކަމަށް މޮރިއޭރޯ ވަނީ ބުނެފަ އެވެ.
"ރާއްޖޭގެ ކޯޗަކަށް ވުމަކީ އަހަރެންގެ ނެގި ރަނގަޅު ޑިޒިޝަނެއް. އެއީ ވަރަށް ގިނަ ދުވަސްތަކެއް ވަންދެން އަހަރެން ކޯޗެއްގެ ގޮތުގައި މަސައްކަތް ކުރިއިރު މިހާ ޝައުގުވެރިވެގެން މަސައްކަތް ކުރާހިތުން ކޯޗަކަށް ވެގެން ކުރިއަށްދާން އަހަރެން ބޭނުންވެފައެއް ނުވޭ، މިއީ ރަނގަޅު ފުރުސަތެއް ގޮތު ދެކެނީ،" އިޓަލީގެ ދެ ވަނަ އަދި ތިން ވަނަ ޑިވިޝަން ޓީމުތަކުގައި ކޯޗިންގެ މަސައްކަތްތަކެއް ކޮށްފައިވާ މޮރިއޭރޯ ބުންޏެވެ.
"ރާއްޖޭގެ ފުޓްބޯޅައިގެ ވީޑިއޯތައް ބަލާފައި އަހަންނަށް އެނގޭ ކަމަކީ ލެވަލް ދަށެއް ނޫން ކަން. ރަނގަޅު ކުރެވޭނެ ކަންކަން އެބަހުރި. ޓެކްޓިކަލް ނޫނީ ޑިފެންސިވް ވިސްނުމަށް ބަލާއިރު ރަނގަޅު ކުރަން ޖެހޭ. އެކަން ޔަގީން. ކުޅުންތެރިންގެ ޖޯޝް ރަނގަޅުކޮށް ކާމިޔާބުގެ މަގަށް ގެންނަން ކުރެވެން ހުރި މަސައްކަތް ކުރަން އަހަރެން ތައްޔާރު،"
ކޯޗިންގެ ދާއިރާ އަށް 2006 ވަނަ އަހަރު ނުކުތް މޮރިއޭރޯ ބުނީ ފުޓްބޯޅައިގައި އޭނާ ގަބޫލުކުރާ ވިސްނުމަކީ ކުރު މުއްދަތުގެ ނަތީޖާ ނެރުމަށް ވުރެ، ދެމެހެއްޓެނިވި ގޮތެއްގައި ނަތީޖާ ނެރެވޭނެ ޕްލޭނެއްގައި މަސައްކަތް ކުރުން ކަމަށެވެ.
އިޓަލީގައި އަބަދުވެސް ކޯޗުންނާ މެދު ގޮތް ނިންމަނީ ކުރު މުއްދަތުގެ ނަތީޖާ އިން ކަމަށާއި މީގެ އެންމެ މުހިއްމު ކަމަކީ ނަތީޖާ ނެރެން ކުރާ މަސައްކަތުން އެ ހާސިލްކުރާ ކަންކަން މުސްތަގުބަަލަށް ވެސް ފައިދާވެފައި އޮތުން ކަން މޮރިއޭރޯ ވަނީ ފާހަގަކޮށްފަ އެވެ.
ރާއްޖެ ގޮވައިގެން މޮރިއޭރޯ ނުކުންނާނެ ފުރަތަމަ މުބާރާތަކީ އަންނަ މަހު 7-18 އަށް ކޮލަމްބޯގައި ބާއްވާ މަހިންދުރަ ރާޖަޕަކްސަ ފޯ ނޭޝަންސް ކަޕް އެވެ. ރާއްޖެ އާއި ސްރީ ލަންކާގެ އިތުރުން ދެން އެ މުބާރާތުގައި ކުޅޭނީ ބަންގްލަދޭޝް އާއި ސީޝެލްސް އެވެ.
ކުޅުމުގެ ކެރިއަރަށް ބަލާނަމަ 1986 އިން 1992 އަށް މޮރިއޭރޯ ކުޅުނީ ލެޗޭ އަށެވެ. އޭގެ ފަހުން ދެ ސީޒަނުގައި ކަލިއަރީ އަށް ކުޅުމަށް ފަހު ދެން 1994 އިން 1997 އަށް މޮރިއޭރޯ ފެނުނީ ރޯމާ އިންނެވެ. މޮރިއޭރޯ، އިޓަލީގެ އޭރުގެ ގަދަބާރު އިންޓަ އަށް ބަދަލުވީ 1997 ވަނަ އަހަރު އެވެ. ބްރެޒިލްގެ ރޮނާލްޑޯ ނަޒާރިއޯއާ އެކު އިންޓަ އަށް ކުޅުނު މޮރިއޭރޯ އެ ޓީމުގައި ތިން އަހަރު ހުރުމަށް ފަހު ކެރިއަރު ނިންމާލުމުގެ ކުރިން ދެ ސީޒަނުގައި ނަޕޯލީ އަށް ވެސް ކުޅުނެވެ. އަދި އިޓަލީ ގައުމީ ޓީމަށް އަށް މެޗުން ދެ ގޯލު ޖަހައިދީފައިވެ އެވެ.
މޮރިއޭރޯ ބުނީ އޭނާގެ ކުޅުމުގެ ކެރިއަރުން ދަސްވި ކަންތައްތައް ކޯޗިންގެ އެކި ހާލަތްތަކުގައި ވެސް ބޭނުންކުރާނެ ކަމަށާއި ފުޓްބޯޅައިގައި ކުރެވިފައިވާ ހުރިހާ ތަޖުރިބާއެއް ވެސް މުހިއްމު ކަމަށެވެ.
