ނުކުޅެދުންތެރިކަން ހުންނަ މީހުންގެ ހުނަރުތައް ދައްކާލުމަށް "ރިވެލި ތަރި" ގެ ނަމުގައި ސަރުކާރުން ބާއްވަމުން އަންނަ މުބާރާތުގައި ބައިވެރިވުމުގެ ފުރުސަތު މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސާސް އިން ހުޅުވާލައިފި އެވެ.
"ރިވެލި ތަރި" ގެ މައިގަނޑު މަގުސަދަކީ ނުކުޅެދުންތެރިކަން ހުންނަ މީހުންނާއި ކުދިންގެ ތެރެއިން އެކި ދާއިރާތަކުން ހުނަރުވެރިން ކުރަމުން އަންނަ މަސައްކަތާއި އުފެއްދުންތައް ދައްކާލުން ކަމަށް ޖެންޑާ މިނިސްޓްރީގެ ފަރާތުން މިއަދު ނެރުނު ބަޔާނެއްގައި ބުނެފައިވެ އެވެ.
އޭގެ އިތުރުން، ނުކުޅަދުންތެރިކަން ހުންނަ މީހުންގެ މަސައްކަތާއި އުފެއްދުންތައް ކުރިއަރުވާ މާކެޓްކުރުމާއި ނުކުޅެދުންތެރިކަން ހުންނަ ފަރާތްތަކުގެ ހުނަރާއި ގާބިލުކަމުގެ މައުލޫމާތު ފުޅާދާއިރާއެއްގައި ފެތުރުމަކީ ވެސް މުބާރާތް ބޭއްވުމުގެ މަގްސަދެއް ކަމަށް އެ ބަޔާނުގައިވެ އެވެ.
ނުކުޅެދުންތެރިކަން ހުންނަ ޒުވާނުންގެ ތެރެއިން މަސައްކަތްތެރިކަމާއި ވިޔަފާރި ކުރިއެރުމަށް ޝައުގުވެރިކަން ހުންނަ ފަރާތްތަކަށް އެކަމަށް ހިތްވަރުދީ މަގުފަހިކޮށްދިނުމަކީ ވެސް މުބާރާތް ބޭއްވުމުގެ ބޮޑު މަގްސަދެއް ކަމަށް މިނިސްޓްރީން ބުނެ އެވެ.
އެ މިނިސްޓްރީން ބުނީ "ރިވެލި ތަރި"އަށް ކުރިމަތިލުމުގެ ފުރުސަތު މި މަހުގެ 12 ވަނަ ދުވަހުން ފެށިގެން އާންމުކޮށް ހުޅުވައިލައިފައިވާ ކަމަށެވެ. ކުރިމަތި ލުމުގެ އެންމެ ފަހު ތާރީހަކީ އަންނަ މަހުގެ 15، ކަމަށް ވެސް މިނިސްޓްރީން ބުނެ އެވެ.
"ރިވެލި" ތަރި މުބާރާތަށް ކުރިމަތިލާނީ ރިވެލި ތަރިއަށް ހުށަހަޅާ ފޯމުންނެވެ. މި މުބާރާތުގައި ބައިވެރިވާން އެޕްލިކޭޝަން ހުށަހަޅާ ފަރާތްތަކުން މިނިސްޓްރީއަށް އެޕްލިކޭޝަން ހުށަހެޅުމުން ވީޑިއޯ އަޕްލޯޑް ކުރަންވީގޮތުގެ މައުލޫމާތު މިނިސްޓްރީން ހިއްސާކުރެވިގެންދާނެ އެވެ. އަދި ފުރިހަމަކޮށްފައިވާ އެޕްލިކޭޝަން ފޯމް disability@gender.gov.mv މެއިލަށް ފޮނުވަން ޖެހެ އެވެ.
