ޝަރީއަތް ނިމި, ހުކުމް ތަންފީޒުކުރުން ލަސްވާ މައްސަލަ ސަރުކާރުގެ ލެޖިސްލޭޓިވް އެޖެންޑާގައި ހިމަނަން އެޓާނީ ޖެނެރަލްގެ އޮފީހުގައި އެދުމަށް މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ނިންމައިފި އެވެ.
މިއަދު ބޭއްވި ކޮމިޓީ ބައްދަލުވުމުގައި މިގޮތަށް ހުށަހެޅުއްވީ ޝަރީއަތް ލަސްވުމުގެ ސަބަބުން ތުހުމަތު ކުރެވޭ ފަރާތްތަކަށާއި އަނިޔާ ލިބޭ ފަރާތްތަކުގެ ހައްގުތަކުގެ މައްސަލައާ ބެހޭގޮތުން ވާހަކަ ދައްކަވަމުން ވައިކަރަދޫ ދާއިރާގެ އެމްޑީޕީ މެންބަރު ހުސެއިން ޒިޔާދު އެވެ. ޒިޔާދުގެ އެ ހުށަހެޅުއްވުމަށް ތާއިދު ކުރެއްވީ ހުރާ ދާއިރާގެ މެންބަރު ޑރ. އަނާރާ ނައީމް އެވެ.
ޒިޔާދު ވިދާޅުވި ގޮތުގައި މި މައްސަލަ މަޖިލީހަށް ހުށަހަޅަން ޖެހުނީ ޝަރީއަތް ލަސްވުމުގެ ސަބަބުން ހިނގާ ކަންކަމުންގެ ސަބަބުން އަންހެނުންނަށް ދިމާވާ ދަތިތަކާ ގުޅިގެންނެވެ. އަދި އެކަމުގެ އަސަރު އަންހެނުންނަށް ސީދާ ގޮތުންނާއި ނުސީދާ ގޮތުން ވެސް ކުރާކަން އޭނާ ފާހަގަ ކުރެއްވި އެވެ.
"ސަރުކާރުގެ އެބައޮތް މިހާރު ވަރަށް ބޮށު ލެޖިސްލޭޓިވް އެޖެންޑާއެއް, އެ އެޖެންޑާއިން މިއަށް ހައްލެއް ލިބޭތޯ ކުރިން ދެނެގަތުން އެއީ ރަނގަޅު [ކަމެއް]. ނެތް ކަމަށް ވެއްޖިއްޔާ, އެ އެޖެންޑާއަށް މިބައި ލައިގެން ގެންދިއުންހެން އަޅުގަނޑަށް ހީވަނީ ވަށާޖެހޭ ގޮތުން މިކަން ނިންމޭނީ," ހިއުމަން ރައިޓްސް ކޮމިޓީގައި އެމްޑީޕީ ތަމްސީލުކުރައްވާ ހަމައެކަނި މެންބަރު, ޒިޔާދު ވިދާޅުވި އެވެ.
ޝަރީއަތް ލަސްވާ ކަމުގެ ވާހަކަ ދެކެވެމުން އެންމެނަށް ވެސް ވިސްނެނީ ޖަލުގައި ވާނުވާ ބަންދުގައި ތިބޭ މީހުންގެ ވާހަކައަށް ކަމަށް އޭނާ ވިދާޅުވި އެވެ. ނަމަވެސް ޝަރީއަތް ނިމި, ހުކުމް ތަންފީޒު ކުރުން ލަސްވުމުގެ ސަބަބުން މިނިވަންކޮށް ތިބެ, ވަޒީފާއަށް ނުދެވި, މުޅި ދިރިއުޅުން ހުއްޓިފައި ތިބޭ މީހުން ވެސް ތިބިކަން އޭނާ ފާހަގަކުރެއްވި އެވެ.
"އަޅުގަނޑަށް ފެންނަނީ މިހާރު ހުރި ލެޖިސްލޭޓިވް އެޖެންޑާގައި އަންނަން ހުރި ބިލުތަކުގައި މިއަށް ހައްލެއް ލިބޭ ކަހަލަ ބިލުތައް ހުންނާނެ ކަމަށް އަޅުގަނޑު މި ބަލަނީ, އެ ބިލުތަކުގައި މިބައި [ހުކުމް ތަންފީޒު ކުރުން ލަސްވުން] ކަވަރު ކުރެވޭތޯ ނޫންތޯ, ނުވާ ކަމަށް ވެއްޖިއްޔާމު ކޮމިޓީން އިސްނަގައިގެން ވެސް އެ ފަރާތްތަކުގައި އެދުން" ޒިޔާދު ވިދާޅުވި އެވެ.
ޝަރީއަތް ލަސްވާ މައްސަލައަކީ ނިމިދިޔަ މަޖިލީހުން ވެސް ބަލަމުން ދިޔަ މައްސަލައަކަށް ވެފައި އެ މަޖިލީހުން އަމަލުކުރި ގޮތަށް, މި މައްސަލަ ބެލުމުގައި މުޅި މަޖިލީހުގެ ހާއްސަ ކޮމިޓީއެއް ނަގައިގެން ކުރިއަށް ގެންދިއުމަށް ވެސް މިއަދުގެ ކޮމިޓީގައި ފާސްކުރި އެވެ. އެހެންކަމުން ކޮމިޓީން ވަނީ މި މައްސަލަ މުޅި މަޖިލީހުގެ ސަމާލުކަމަށް ގެނައުމަށް މަޖިލީހުގެ ރައީސް އަބްދުއްރަހީމް އަބްދުالله އަށް ސިޓީ ފޮނުވުމަށް ނިންމާފަ އެވެ.
