އުކުޅަހުގެ ބިޒްނަސް ކޮމިއުނިޓީގެ ފަރާތުން ރަށުގެ ވިޔަފާރިއާ ފަތުރުވެރިކަން އިތުރަށް ކުރިއެރުވުމަށްޓަކައި ފަސް ކަމެއް ހިމެނޭ ގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ޕްރޮޕޯޒަލެއް ހުށަހަޅައިފި އެވެ.
އެ ޕްރޮޕޯޒަލް ހުށަހެޅީ އއ. އަތޮޅަށް ރައީސް ސޯލިހު މިހާރު ކުރައްވަމުން ގެންދަވާ ދެ ދުވަހުގެ ރަސްމީ ދަތުރުފުޅުގެ ތެރެއިން، އުކުޅަހަށް ވަޑައިގެން އެރަށުގެ ބިޒްނަސް ކޮމިއުނިޓީއާއެކު ރޭ ބޭއްވި ބައްދަލުވުމުގެ ތެރެއިންނެވެ.
އެކަމުގެ އޮފިޝަލެއް ކަމަށްވާ އަބްދުލް ސަމީއު ވިދާޅުވީ އެ ޕްރޮޕޯޒަލްގައި ރައީސްގެ އަރިހުން އެދިފައިވާނީ އުކުޅަހަކީ ބިމުގެ ދަތިކަން ކުރިމަތިވެފައިވާ އަދި ފަތުރުވެރިކަން އިންތިހާއަށް ތަރައްގީވެފައިވާ ރަށެއްކަމުން ލާމަރުކަޒީ ގާނޫނުގެ ދަށުން އިހުތިސޯސް ކަނޑައަޅާއިރު، އެ ރަށުގެ އިހުތިސޯސްގެ ތެރެއަށް ފަޅެއް އަދި ފަރެއް ވެސް ނުވަންނާތީ އެކަމަށް ހައްލެއް ހޯދައިދިނުމަށް ކަމަށެވެ.
"އަޅުގަނޑުމެން އެދުނިން، އުކުޅަސް ކައިރީގައި އޮންނަ ގަލަގިލި ނަމަކަށް ކިޔާ ފަޅެއް އުކުޅަހުގެ އިހުތިސޯސްގައި ހިމަނައިދިނުމަށް. ދެން އެތަނުގައި ޕިކްނިކް އައިލެންޑެއް ތަރައްގީކުރާއިރު، އެތަނުގައި ސީޕްލޭން ޕްލެޓްފޯމެއް އަޅައިދިނުމަށް ވެސް،" ސަމީއު ވިދާޅުވި އެވެ.
އޭގެ އިތުރުން ވެސް އެ ރަށާ ކައިރީގައި އޮންނަ ގާމަތި އިތުރު ރަށެއް ވެސް އުކުޅަހުގެ ބައެއްގެ ގޮތުގައި ހަދައިދިނުމަށް ބިޒްނަސް ކޮމިއުނިޓިން އެދުނު ކަމަށް ސަމީއު ވިދާޅުވި އެވެ. އަދި ސޭންޑް ބޭންކެއް ވެސް ފަތުރުވެރިކަމުގެ ސިނާއަތް އިތުރަށް ކުރިއަރުވަން ރަށުގެ ބައެއްގެ ގޮތުގައި ހިމެނުމަށް ވެސް އެދުނެވެ.
"ދެން މި ރަށް ކައިރީގަ އޮންނާ މަންޓާ ޕޮއިންޓެއް. އެތަން އަޅުގަނޑުމެން އެދުނިން ހަނިފަރު ބޭ ގޮތަށް ބައޮސްފިއާ ރިޒާވްއަކަށް ހަދަން ވެސް، އެއީ ހަމަ ފަތުރުވެރިކަމުގެ ދާއިރާގެ ކުރިމަގަށް،" ސަމީއު ވިދާޅުވި އެވެ.
ރައީސްގެ ފަރާތުން ވަރަށް ހިތްހަމަޖެހޭ ޖަވާބެއް މިކަންކަމަށް ލިބިގެން ދިޔަ ކަމަށް ސަމީއު ވިދާޅުވި އެވެ. އަދި ދައުލަތުގެ ކަމާބެހޭ އިދާރާތަކާއި، ކެބިނެޓް މެމްބަރުންނާއެކު މަޝްވަރާކުރުމަށްފަހު އެކަންކަން ކުރެވޭނެ ގޮތެއް ހޯއްދަވާނެ ކަމަށް ރައީސް ވިދާޅުވިކަމަށް ސަމީއު ބުންޏެވެ.
އުކުޅަހަށް ވަޑައިގެން ރައީސް ވަނީ ރަށުގެ އާއްމުންގެ އިތުރުން ކައުންސިލާ ވެސް ބައްދަލުކުރައްވާފަ އެވެ. އާއްމުންނާ އެކު ބެއްވި ބައްދަލުވުމުގެ ތެރެއިން ޔުޓިލިޓީޒް އަށް ނަގާ ޓެރިފް ބޮޑުވުމުގެ ސަބަބުން ހުރި ކަންބޮޑުވުންތަކާއި ވިޔަފާރިތައް ހިންގުމަށް ނަގާ ލޯނުގެ އިންޓްރެސްޓާ ގުޅޭގޮތުންހުރި ކަންބޮޑުވުންތައް އެ ފަރާތްތަކުން ވަނީ ރައީސްއަށް ދަންނަވައިފަ އެވެ.
އަދި ރަށުގެ ސިއްހީ މަރުކަޒާއި، ފެރީ ޓާމިނަލްއެއްގެ އިތުރުން މަގު ހެދުމުގެ މަސައްކަތާއި ގުޅޭ ގޮތުން ވެސް ރައީސް ވަނީ އުކުޅަހުގައި ބޭއްވި ބައްދަލުވުންތަކުގައި މަޝްވަރާކުރައްވައިފަ އެވެ.
