ކުވެއިތު ފަންޑުގެ އެހީގައި އއ. އަތޮޅު ހޮސްޕިޓަލް ތަރައްގީކުރުމުގެ މަޝްރޫއު ކުރިޔަށްގެންދިޔުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް ސޯލިހު މިހެން ވިދާޅުވީ، މިހާރު އއ. އަތޮޅަށް ކުރައްވަމުންދާ ރަސްމީ ދަތުރުފުޅުގެ ތެރެއިން އއ. އަތޮޅު ކައުންސިލާ އެކު ރަސްދޫގައި މިއަދު ބޭއްވި ބައްދަލުވުމުގެ ތެރެއިންނެވެ.
އެ ބައްދަލުވުމުގައި ކައުންސިލުން ވަނީ އއ. އަތޮޅުގެ ހޮސްޕިޓަލް ތަރައްގީ ކުރުމުގެ މަސައްކަތް އަވަހަށް ފައްޓަވައިދެއްވުމަށް ރައީސްއަށް ދަންނަވައިފަ އެވެ. ޖަވާބުގައި ރައީސް ވަނީ، ކުވެއިތު ފަންޑުގެ އެހީގައި އަތޮޅު ހޮސްޕިޓަލް ތަރައްގީކުރުމަށް ހަމަޖެހިފައިވާކަމަށް ކައުންސިލަށް ދަންނަވައިފަ އެވެ.
ބައްދަލުވުމުގައި ކައުންސިލުން ވަނީ ކައުންސިލުން ވަނީ އއ. އަތޮޅުގައި ސީ އެމްބިއުލާންސް އެއް ނެތުމުން ދިމާވާ ގޮންޖެހުންތަކާ އެކަމުގައި ހުރި ކަންބޮޑުވުންތައް އަދި އިރުގެ އަލިން ހަކަތަ އުފައްދާ މަޝްރޫއު ނުފެށޭތީ އެކަމާ ގުޅިގެން ކަންބޮޑުވުން ފާޅުކޮށްފަ އެވެ.
އަދި މަޑިވަރު ފިނޮޅުގެ މައްސަލައިގައި ހުރި ކަންބޮޑުވުންތަކާއި، ރަށްރަށުގެ ދަފްތަރެއް އޮތުމުގެ މުހިންމުކަމާގުޅޭގޮތުން ވެސް ކައުންސިލުން ވަނީ ރައީސްއާ މަޝްވަރާކުރައްވާފަ އެވެ.
ރައީސް ވަނީ އއ. އަތޮޅަށް އަންނަ އަހަރު ތެރޭ ސީ އެމްބިއުލާސް ލިބޭނެކަމަށް ވިދާޅުވެފަ އެވެ، އަދި ރާއްޖޭގެ ހުރިހާ ރަށެއްގެ މައުލޫމާތު އެއްތަނަކުން އެނގޭނެގޮތަށް ދަފްތަރެއް ތައްޔާރުކުރުމުގެ މަސައްކަތް ސަރުކާރުން މިހާރު ވެސް ކުރައްވަމުންގެންދަވާ ކަމުގައި ރައީސް ވިދާޅުވި އެވެ.
އޭގެ އިތުރުން ވެސް ކައުންސިލުން ވަނީ އަތޮޅު ފިހާރައިން ލިބޭ އާމްދަނީ ލިބެނީ ކޮން އުސޫލަކުންކަމާ ކިހިނެއްކަން އޮޅުންނުފިލުމުގެ ސަބަބުން ދިމާވާ ދަތިތަކާ، އެ ފިހާރައިން އާމްދަނީ ލިބޭނެ ގޮތް ހައްދަަވައިދެއްވުމަށް ވެސް ރައީސްގެ އަރިހުގައި ދަންނަވާފައެވެ.
އަދި ކައުންސިލަށް ކުރިމަތިވާ އިތުރު ގޮންޖެހުންތަކުގެ ތެރޭގައި އިދާރީ މުވައްޒަފުން މަދުވުމުގެ ސަބަބުން ދޭންޖެހޭ ހިދުމަތްތައް ދިނުމުގައި ދިމާވާ ދަތިތައް ވެސް ކައުންސިލް މެމްބަރުން ވަނީ މިއަދުގެ ބައްދަލުވުމުގައި ފާހަގަކުރައްވާފަ އެވެ.
އޭގެ އިތުރުން މާލީ ގޮތުން ކުރިމަތިވެފައި ހުރި ދަތިތަކާ ބެހޭ ގޮތުން މަޝްވަރާ ކުރަމުން ކައުންސިލަށް އިތުރު އާމްދަނީ ލިބޭނެ ގޮތްތަކެއް ސަރުކާރުން ފަހިކޮށްދެއްވުމަށް ވެސް ކައުންސިލުން ވަނީ މިއަދުގެ ބައްދަލުވުމުގައި އެދިފަ އެވެ.
ރައީސް ސޯލިހު އއ. އަތޮޅު ހޮސްޕިޓަލަށް ކުރެއްވި ޒިޔާރަތުގެ ތެރެއިން.-- ފޮޓޯ: ރައީސް އޮފީސް
ރައީސް ސޯލިހު ވަނީ އެ ވާހަކަކާ ގުޅޭ ގޮތުން ކަމާބެހޭ ފަރާތްތަކާ އެކު މަޝްވަރާކުރެއްވުމަށް ފަހު އެދެވޭ ގޮތަކަށް އެކަންކަން ފަހިކޮށްދެއްވާނެކަމުގެ އުންމީދީ ޖަވާބެއް އަތޮޅު ކައުންސިލަށް ދެއްވާފަ އެވެ.
ކައުންސިލުން ވަނީ އެ ބައްދަލުވުމުގައި އއ. އަތޮޅުގެ ހުރިހާ ރަށެއްގައި ސަރުކާރުން ކުރިޔަށް ގެންދާ ތަރައްގީގެ މަޝްރޫތައް ހަމަހަމަކަމާއެކު ކުރިޔަށް ގެންދިޔުމަށް ވެސް ރައީސްގެ އަރިހުގައި މިއަދު ދަންނަވައިފަ އެވެ.
ރައީސް ވަނީ މިއަދު ރަސްދޫއިން ފުރާވަޑައިގަތުމުގެ ކުރިން ރަސްދޫގައި ހުންނަ އަތޮޅު ހޮސްޕިޓަލަށް ޒިޔާރަތްކުރައްވާފަ އެވެ.
ދެ ދުވަހުގެ އެ ދަތުރުފުޅުގައި ރައީސް ވަނީ މިހާރު ތޮއްޑޫ އަދި ރަސްދުއަށް ވަޑައިގެންފަ އެވެ. ރައީސް މިހާރު ހުންނެވީ އއ. އުކުޅަހުގަ އެވެ. އެޔަށްފަހު ދެން ވަޑައިގަންނަވާނީ މަތިވެރި، ބޮޑުފޮޅުދޫ އަދި ހިމަންދުއަށެވެ.
