ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6، ގައި ބޮން ގޮއްވި މައްސަލައިގައި ދައުލަތުން ދައުވާ ކުރާ އިތުރު ތިން މީހަކު މިއަދު އެ ދައުވާތަކަށް އިންކާރު ކޮށްފި އެވެ.
ނަޝީދު އަވަހާރަކޮށްލަން ސައިކަލެއްގަ ބޮމެއް ހަރުކޮށްގެން ގޮއްވާލި މައްސަލައިގައި މިއަދު ކުރިއަށް ގެންދިޔައީ ތަހުމީން އަހުމަދާއި މުޖާޒް އަހުމަދާއި އަލީ ހައިޝަމް އާއި މުހައްމަދު ނާޒިމް އާއި އިސްހާގާއި ފަހުމީ އަލީގެ މައްސަލައިގައި ބޭއްވި ދެ ވަނަ އިބްތިދާއީ އަޑުއެހުމެވެ.
މިއަދުގެ އަޑުއެހުމުގައި ހައިޝަމް އާއި ނާޒިމް އާއި ފަހުމީ އަލީގެ މައްޗަށް ކުރާ ދައުވާތައް އިއްވުމުން އެ އެންމެން ވެސް ވަނީ ދައުވާތަކަށް އިންކާރުކޮށްފަ އެވެ.
ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. މުހައްމަދު ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ.
މިއަދުގެ އަޑުއެހުމުގައި އިސްހާގުގެ ފަރާތުން ދައުވާއާމެދު އެއްޗެކޭ ނުބުނެ އެވެ. އޭނާގެ ފަރާތުން އެދުނީ މައްސަލައިގައި ހިމެނޭ ހެކިތައް ވަޒަން ކުރުމަށްފަހު ދައުވާއާމެދު އެއްޗެއް ބުނާނެ ފުރުސަތަކަށެވެ. މީގެ ކުރިން ބޭއްވި އަޑުއެހުމުގައި މުޖާޒް އާއި ތަހުމީނު ވަނީ އެމީހުންގެ މައްޗަށް ކުރާ ދައުވާތަކަށް އިންކާރުކޮށްފަ އެވެ.
އޭގެ އިތުރުން، އޭނާގެ މައްސަލައިގެ އަޑުއެހުންތައް ސިއްރު ކުރުމަށް އިސްހާގުގެ ފަރާތުން ވަނީ އެދިފަ އެވެ. ނަމަވެސް ކޯޓުން ނިންމީ މި ވަގުތު އަޑުއެހުން ސިއްރު ކުރާނެ ޖާގައެއް ނެތް ކަމަށެވެ.
މިއަދު ކުރިއަށް ގެންދިޔަ އަޑުއެހުމުގައި އެ ހަ މީހުންގެ ބަންދު މުރާޖައާކޮށް، އެ އެންމެން ވެސް ބަންދުން ދޫކުރެވޭނެ ތަނެއް ނެތް ކަމަށް ކްރިމިނަލް ކޯޓުން ވަނީ ކަނޑައަޅައިފަ އެވެ.
މެއި 6، ގައި ބޮން ގޮއްވި މައްސަލައިގައި މިއަދު އަދުހަމްގެ މައްޗަށް ވެސް ޝަރީއަތް ހިންގި އެވެ. ނަމަވެސް ކުށަށް އިއުތިރާފްވެފައިވާތީ އޭނާގެ ޝަރީއަތް ކުރިއަށްގެންދިޔައީ ވަކިންނެވެ. އަދި އަދުހަމުގެ ބައި ސިއްރުކުރުމަށްވެސް މީގެ ކުރިން ކޯޓުން އޮތީ ނިންމާފަ އެވެ.
އެމީހުންގެ އިތުރުން ބޮން ގޮއްވި މައްސަލައިގައި ހއ. މޮޅަދޫ، ބަހާރުގެ، އަބްދުﷲ އަލިމަނިކާއި ހއ. ހޯރަފުށި، އަލަނާސިގެ، މުހައްމަދު ތަސްލީމްގެ މައްޗަށް ދައުވާ ކުރުމަށް މިއަދު ޕީޖީ އޮފީހުން ވަނީ ކޯޓަށް ހުށަހަޅައިފަ އެވެ.
