ވޮޝިންޓަން، އެމެރިކާ (އޮކްޓޯބަރު 19) - އަފްގާނިސްތާނާ ގުޅޭ ގޮތުން މަޝްވަރާ ކުރުމަށް ރަޝިއާ އިސްވެ، އަންގާރަ ދުވަހު ފަށާ ބައްދަލުވުމުގައި ބައިވެރިނުވާނެ ކަމަށް އެމެރިކާ އިން ބުނެފި އެވެ.
ސްޓޭޓް ޑިޕާޓްމަންޓުން ބުނީ ބައްދަލުވުމުގައި ބައިވެރިވެވެން ނެތީ "ލޮޖިސްޓިކަލް" މައްސަލަތަކާ ހެދި ކަމަށެވެ. ނަމަވެސް ރަޝިއާގެ އިސްނެގުމަކީ "ރަނގަޅު" ކަމެއްގެ ގޮތަށް ސިފަކުރި އެވެ.
"ކުރިއަށް އޮތް ތަނުގައި މި ފޯރަމްގައި ބައިވެރިވާން އަޅުގަނޑުމެން އުއްމީދު ކުރަން. އެކަމަކު މި ހަފުތާގައި ބައިވެރިވެވޭކަށް ނެތް،" ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވި އެވެ.
ރަޝިއާގެ މަންދޫވު ޒާމިރު ކަބުލޮވް މިދިޔަ ހުކުރު ދުވަހު ވިދާޅުވީ އަފްގާނިސްތާނާ ގުޅޭ ގޮތުން ހަތަރު ގައުމަކުން މަޝްވަރާ ކުރާނެ ކަމަށެވެ. އެއީ ރަޝިއާ، އެމެރިކާ، ޗައިނާ އަދި ޕާކިސްތާނެވެ.
އެ މަޝްވަރާތަކުގެ އަމާޒަކީ "ބަދަލުވަމުންދާ އަފްގާނިސްތާނުގެ ހާލަތުގައި ހަތަރު ގައުމަށް އެއްބަސްވެވޭނެ ޕޮޒިޝަނަކާ ހަމައަށް ދިއުން" ކަމަށް ބުނެފައިވެ އެވެ.
މިދިޔަ އޯގަސްޓު މަހު ތާލިބާނުން ވެރިކަމަށް އައުމަށް ފަހު އަފްގާނިސްތާނާ އެންމެ ބޮޑު ގުޅުމެއް ބާއްވަނީ ރަޝިއާ، ޗައިނާ އަދި ޕާކިސްތާނެވެ.
އެމެރިކާ އިން ގައުމުތަކަށް ބާރު އަޅަމުން ދަނީ ތާލިބާން ސަރުކާރު ބަލައިނުގަތުމަށެވެ. އެއީ އަންހެނުންގެ ހައްގުތައް ފަދަ މުހިއްމު ކަންކަމުގައި ތާލިބާނުންގެ ވައުދު ފުއްދަން ޕްރެޝަރު ކުރުމުގެ ގޮތުންނެވެ.
އަންގާރަ ދުވަހު ފަށާ ހަތަރު ގައުމުގެ ފުރަތަމަ ބައްދަލުވުމުގައި އެމެރިކާ އިން ބައިވެރިނުވެވޭ ސީދާ ސަބަބު ހާމަކޮށްފައެއް ނުވެ އެވެ.
